• Кичик вә оттура тиҗарәт
  • 24 Желтоқсан, 2015

Иссиқ нанға мәрһәмәт

Йеқинда Яркәнт шәһиридә тиҗарәтчи Аюповларниң заманивий үлгидики йеңи навайханиси пайдилинишқа берилди. Униң ечилиш мәрасимиға шәһәр турғунлири билән наһийә рәһбәрлигиму қатнашти. Дәсләп сөзгә чиққан наһийә һакиминиң орунбасари Шөһрәт Қурбанов мундақ деди:— Елимиз мустәқиллиги күни һарписида  йеңи  навайханиниң ечилиши һәммимиз үчүн чоң хошаллиқ. Елимиз Президенти – Милләт Лидериниң  қазақстанлиқларға йоллаватқан әнъәнивий мәктүплиридә оттура вә кичик тиҗарәтни тәрәққий әткүзүшкә алаһидә әһмийәт бериватиду. Мана бүгүн  ишқа қошулуватқан навайхана шуниң ярқин испати. Уни Президентимиз көрсәтмилиригә әмәлий иш билән җавап бериватқинимиз болуп һесаплиниду, дәп чүшинишимиз керәк. Шундақ екән, наһийә турғунлири намидин ишбиләрмән Маһинур Садиқ қизи билән Әркин Аюповқа наһийә турғунлирини иссиқ нан вә нан мәһсулатлири тәминләштәк шәрәплик  ишиға утуқ, амәт, бәрикәт тиләймән. Шуниңдин кейин сөзгә чиққан «Даму» акционерлиқ җәмийити наһийәлик шөбисиниң мәслиһәтчиси Несихан Жазилбекова бу навайханиниң дөләт программилири асасида оттура вә кичик тиҗарәтни тәрәққий әткүзүш бойичә несийә елиш арқилиқ әмәлгә ашқанлиғини мәмнунийәт билән тәкитлиди. Алмута вилайәтлик Ишбиләрмән аяллар бирләшмиси рәисиниң орунбасари Сүрийәм Һезимова, наһийәлик мәслиһәтниң кативи Тилеуберген Оспанов, «Нұр Отан» партияси наһийәлик шөбиси рәисиниң орунбасари Ермек Нурахметов вә башқилар сөзгә чиқип, Аюповларға  утуқ тиләп, миннәтдарлиғини изһар қилишти. Рәмзлик лента қийилип, жиғилғанларға навайхана мудири Маһинур Садиқ қизи Италиядин кәлтүрүлгән пәчләрдә пишириливатқан булка, тоғач вә нан мәсулатлирини көрсәтти. Навайхана һойлисида кәң йейилған дәстиханда қуръан тилавәт қилинғандин  кейин  мәрасим қатнашқучилири қатар-қатар тизилған уйғур тонурлирида пишиватқан мейизлик тоғач вә нанлардин дәм тартти. Андин навайханиниң ечилиш мәрасимиға беғишланған зияпәт «Ирадә» кафесида давамлашти. Бу йәрдә Қазақстан хәлқи Ассамблеясиниң әзаси Реһимҗан Тохтахунов, Уйғур этномәдәнийәт мәркизи рәисиниң орунбасари Абдуссалам Алиев, «наһийәлик  ишбиләрмән аяллар» мәктивиниң мудири Айгүл Әлимжан вә башқилар сөзгә чиқип, тиҗарәтчи Аюповларға утуқ вә амәтләр тилиди.

Гөһәрбүви ИСМАЙИЛҖАНОВА.

 Панфилов наһийәси.    

791 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы