• Йеңилиқлар
  • 23 Қаңтар, 2012

Сәясий активлиғини көрсәтти

Уйғурлар зич орунлашқан Алмута шәһириниң Түрксиб наһийәсидики 411-сайлам участкисидиму Қазақстан Җумһурийити Парламенти Мәҗлиси билән Алмута шәһәрлик мәслиһәт депутатлириниң новәттин ташқири сайлими көңүлдикидәк өтти. 411-сайлам участкисиниң рәиси Малик Исмайиловниң тәкитлишичә, сайлиғучилар тизимиға киргүзүлгән 2455 сайлиғучиниң 1965и аваз беришкә қатнашқан. Аваз бериш йәкүни бойичә йәттә сәясий партияниң арисида «Нур Отан» Хәлиқ-демократик партиясини сайлиғучиларниң 89,9 пайизи қоллап-қувәтләп аваз бәргән. Әнди Түрксиб наһийәлик 33-сайлам округи бойичә Алмута шәһәрлик мәслиһәтниң депутатлиғиға намзат сүпитидә ройхәткә елинған миллитимиз вәкили — «АЗМК» җавапкәрлиги чәкләнгән йолдашлиғиниң мудири Әхмәтҗан Шардинов 89,5 пайиз авазға егә болди. Шәмшидин АЮПОВ. СҮРӘТТӘ: 411-сайлам участкисиниң рәиси Малик Исмайилов (оттурида), униң орунбасари Сухраб Обулов (оңда) вә 33-сайлам округи бойичә депутат болуп сайланған Әхмәтҗан Шардиновниң ишәшлик вәкили Ғәйрәт Мәмәтәлиев. «Алға, «Нур Отан», алға Қазақстан!» Қазақстан Җумһурийити Парламенти Мәҗлисиниң, вилайәтлик вә наһийәлик мәслиһәтләр депутатлириниң сайлими Уйғур наһийәсидә қизғин тәйярлиқлар билән өтти. Йәрлик мәтбуатта барлиқ намзатларниң сайлам алдидики программилири елан қилинди вә улар, ишәшлик вәкиллириниң һәмралиғида, аһали билән учришип, хәлиқниң муң-муһтаҗидин вақип болди. Наһийә сайлиғучилири бу қетимму активлиқ көрсәтти. Наһийәлик сайлам комиссияси чиқарған йәкүн бойичә, сайламға аваз бериш һоқуқиға егә аһалиниң 92 пайизи қатнашти. Сайлиғучиларниң 84,8 пайизи «Нур Отан» ХДПни, 7,2 пайизи «Ақ жол» Қазақстан демократик партиясини, 5,7 пайизи Қазақстан Коммунистик хәлиқ партиясини яқлап аваз бәрсә, Қазақстан Вәтәнпәрвәрләр партияси билән Умуммиллий социал-демократик партияси бир пайиздин аваз топлиди. Әнди «Ауыл» Қазақстан социал-демократик партияси билән «Әділет» демократик партияси бир пайизға йәткидәкму аваз топлалмиди. «Нур Отан» ХДП намзат қилип көрсәткән Сәйдәхмәт Қасимов билән Ақжолтай Мамбеталиев бу қетимму хәлиқ ишәнчисигә еришип, үчинчи қетим уда Алмута вилайәтлик мәслиһәтниң депутати болуп сайланди. Сайлам «Нур Отан» ХДПниң ғалибийити билән йәкүнләнди. Сайламниң әтиси наһийәлик мәмурийәт бенаси йенидики мәйданда нуротанлиқларниң сайламдики үзүл-кесил ғалибийәткә йәткәнлигиниң ипадиси болған форум болуп өтти.  Униңда сөзгә чиққан наһийә һакими Көйүмчан Өмәров, вилайәтлик мәслиһәтниң депутати Ақжолтай Мамбеталиев вә Чонҗа йезилиқ Ақсақаллар кеңишиниң рәиси Мирзахмәт Җәмиев хәлиқ хаһиши бойичә сайланған йәрлик мәслиһәтләр депутатлириниң кәлгүси паалийитигә утуқ  тилиди. Махмут ИСРАПИЛОВ. Уйғур наһийәси. Җәмийәт һаятиға бепәрва әмәслигини намайиш қилди Сайлам — һәқиқий демократияниң ярқин ипадисидур. 15-январь күни өткүзүлгән Қазақстан Җумһурийити Парламенти Мәҗлисиниң вә барлиқ дәриҗиләрдики мәслиһәтләрниң сайлими пүткүл дунияниң диққәт мәркизидә болуп, униң очуқ вә демократик асаста өткәнлиги етирап қилинди. Сайлам күни Челәк тәвәсидики барлиқ участкиларда бу муһим сәясий кампания қанунға мувапиқ өтти. Җүмлидин Аси сайлам округи тәркивидики 144- Қизилшәриқ сайлам участкисида, шундақла Бартоқай сайлам округи тәркивидики 145-Аси сайлам участкисида сайлиғучиларниң қатнишиш активлиғи жуқури болди. Шуниң нәтиҗисидә һәр икки участкида бу көрсәткүч 100 пайизни тәшкил қилди. Әнъәнә бойичә, сайлам башлиниш алдида наһийәниң көплигән сайлам участкилирида әң чоң вә әң яш сайлиғучилар сөз елип, өзлириниң мошундақ бәхтияр һаят кәчүрүватқанлиғи үчүн Президентимиз Нурсултан Назарбаевқа вә асасини салған «Нур Отан» партиясигә миннәтдарлиқлирини изһар қилишти. Умумән, сайлам күни тәвә хәлқи өзлириниң җәмийәт һаятиға бепәрва әмәслигини, сәясий аң-сәвийәсиниң жуқури екәнлигини намайиш қилди. Мәһәмәтҗан ҺАПИЗОВ. Әмгәкчиқазақ наһийәси. Сайлиғучиларниң 92,9 пайизи қатнашти Қазақстан Җумһурийити Парламенти Мәҗлиси билән вилайәтлик вә наһийәлик мәслиһәтләр депутатлириниң сайлими Панфилов наһийәсидиму һәртәрәплимә тәйярлиқлар билән өтти. 3 вилайәтлик вә 17 наһийәлик округтики 56 сайлам участкиси аваз бериш үчүн болған барлиқ васитиләр билән алдин-ала толуқ тәминләнди. Шундақла саламәтлигигә бола сайлам участкилириға келәлмәйдиған сайлиғучилар үчүн көчмә ящикләрму ойлаштурулди. Наһийәдә сайлиғучиларниң умумий сани 62262 адәмдин ибарәт болуп, улардин 57826 яки 92,9 пайизи сайламға қатнашти. Аваз беришниң йәкүни бойичә йәттә сәясий партияниң арисида «Нұр Отан» Хәлиқ-демократик партияси һәммидин көп авазға егә болди. Ениғирақ ейтқанда, сайлиғучиларниң 85,7 пайизи, мошу партияни қоллап-қувәтләп аваз бәрди. Әнди «Ақ жол» Қазақстан демократик партияси — 6,8 пайиз, Қазақстан Хәлиқ коммунистик партияси — 5,5, «Ауыл» Қазақстан социал-демократик партияси — 2,1 пайиз авазға егә болса, Қазақстан Умуммиллий социал-демократик, Қазақстан Вәтәнпәрвәрләр һәм «Әділет» Демократик партиялириниң аваз елиш үлүши 0 пайизни тәшкил қилди. Ройхәткә елинған 6 депутатлиққа намзаттин 3 адәм Алмута вилайәтлик мәслиһәткә, 36 намзаттин 17 адәм наһийәлик мәслиһәткә депутат болуп сайланди. Уларниң арисида наһийәлик мәслиһәтниң 1 депутати миллитимиз вәкили болуп һесаплиниду. Нурәхмәт ӘХМӘТОВ. Панфилов наһийәси.

524 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы