- Җәмийәтлик тәшкилатларда
- 02 Шілде, 2012
Анилар кеңишигә — он жил
Йеқинда Қ.Ғоҗамияров намидики җумһурийәтлик дөләт Уйғур музыкилиқ комедия театрида «Уйғур анилар кеңиши» җәмийәтлик фонди тәшкил қилинғининиң он жиллиғини атап өтти. Мәзкүр бирләшмә җумһурийәтлик Уйғур мәдәнийәт мәркизиниң сабиқ рәислириниң бири Пәрһат Һасановниң тәшәббуси билән қурулуп, униң рәислигигә Турсунай Тейипова сайланған еди. Анилар кеңиши он жилниң ичидә уйғур анилириниң җәмийәттики ролини ашурушта көп ишларни әмәлгә ашурди. Шундақла улар аилидики, мәктәптики бала тәрбийисигиму көп көңүл бөлди. Анилар кеңиши шу йосунда 2004-жили Алмутида дәсләпки қетим ата-анилар билән уйғур мәктәплиридә паалийәт елип бериватқан педагогларниң бешини қошуп, хәлиқара конференция уюштурди. Униңға Өзбәкстан, Қирғизстан җумһурийәтлиридин, ШУАРдин делегатлар қатнашти. Кейин бу хилдики конференция 2006-жили елимиз пайтәхти Астана шәһиридә, 2007 — 2008-жиллири Әмгәкчиқазақ вә Уйғур наһийәлиридә болуп өтти.
Анилар кеңишиниң 10 жиллиғи мунасивити билән өткүзүлгән мәрасимда сөзгә чиққан «Санаәтчиләр, тиҗарәтчиләр вә йеза егилиги хадимлири» җумһурийәтлик ассоциациясиниң президенти Дилмурат Кузиев, Уйғур театриниң бәдиий рәһбири Әхмәтҗан Қадиров, язғучи Мәсүмҗан Зулпиқар, Уйғур миллий ассоциациясиниң рәиси Тамара Мәмәтова вә башқилар Анилар кеңиши тәрипидин әмәлгә ашурулған ишларни мәмнунийәт билән тилға алди. «Бейбітшілик әлемі» хәлиқара қазақ иҗадий бирләшмиси болса, Турсунай Тейипованиң җәмийәтлик паалийитини жуқури баһалап, уни мәзкүр бирләшмә тәрипидин тәсис қилинған «Әлемдің мейірімді адамы» алтун медали билән тәғдирлиди.
Бәхтишат СОПИЕВ.
СҮРӘТЛӘРДӘ: 1. Минбәрдә Т.Тайипова. 2. Залдин көрүнүш.
Муәллип чүшәргән сүрәтләр.
1142 рет
көрсетілді0
пікір
