- Кичик вә оттура тиҗарәт
- 03 Қараша, 2016
Чонҗидики қәндәләт цехиға мәрһәмәт!
Елимиз Президенти Нурсултан Назарбаев өзиниң қазақстанлиқларға йоллиған «Қазақстан йоли – 2050: бир мәхсәт, бир мәнпийәт, бир келәчәк» намлиқ Мәктүбидә кичик вә оттура тиҗарәтниң ихтисаттики үлүши 2030-жилға қәдәр, кам дегәндә, икки һәссә өсүши керәклигини алаһидә тәкитлигән еди. Һә, мана бүгүнки күндә ушбу йөнилишниң һәрикәтләндүргүчи күчи болуп һесапланған вәтәнлик тиҗарәт күндин-күнгә кәң қанат яймақта. Бу әснада Қазақстан Җумһурийитиниң 2010 – 2020-жилларға беғишланған Стратегиялик тәрәққий етиш планини әмәлгә ашуруш мәхситидә, өткәндә Чонҗа йезисида «У Дили» дәп нам алған қәндәләт цехи тәнтәнилик түрдә ечилди.
Содиниң һәшими тола. Һәрбир херидарниң көңлидин чиқип, улар үчүн һәммә шараит яритип, тәләп-хаһишини қанаәтләндүргәндила тиҗарәт илгириләшкә йүзлиниду. Бу әснада цех рәһбири Дилбирим Қәмирдиноваға (сүрәттә оттурида) муһим вәзипә жүкләнгәнлиги ениқ. Чүнки у моҗут имканийәтләрдин үнүмлүк пайдилинип, яш тиҗарәтчиләрниң ғәмхорчисиға айланған.
Бүгүн наһийәдә қәд көтирип, хәлиқ хизмитидә болуватқан супермаркетларниң көпийишигә бенаән кичик дуканларниң херидарлири хелила азийип қалди. Буни яхши чүшәнгән Дилбирим һәдә қәндәләт цехиниң һаҗәт екәнлигини тоғра һис қилди вә «Даму – 2020» дөләт программиси даирисидә 7,5 миллион тәңгә несийә елип қәндәләт цехини ачти. Цех заманға мувапиқ җабдуқлар билән җабдуқланған. Дилбирим һәдә бүгүн алтә адәмни турақлиқ иш билән тәминләпту.
Наһийә аһалисиға сүпәтлик хизмәт көрситиватқан улар той-төкүн вә һәрхил мәрикилик сорунлар үчүн түрлүк таамларға буйрутма алидекән. Херидар көп, чүнки көрситиливатқан хизмәт сүпити жуқури. Дайим шундақ болуп қелишиға Алла несип қилғай демәкчимиз.
Шахризада САБИТОВА, Уйғур наһийәси.
1124 рет
көрсетілді0
пікір