• Хәйрихаһлиқ
• 23 Желтоқсан, 2016

Имканийити чәкләнгәнләрниң хошаллиғида чәк болмиди

Сешәнбә күни Алмута шәһиридики «Аммар» кафесида бир топ сахавәтлик инсанларниң уюштуруши билән туғма мәйип балилар үчүн йеңижиллиқ арча мәйрими өткүзүлди. Бу күни һаятида хошаллиқ дәмлири һәр күни болувәрмәйдиған гөдәкләр пуғани қанғичә көңүл көтирип, Қиш бовайға билгән шеир-нахшилирини ейтип бәрди. Адәттикидәк, уму халтисидики соғиларни балиларға тарқитип һармиди. Мәйрәмлик арча меһманлириниң көпчилиги накалар һарвулирида олтарсиму, шох музыка чиққанда қоллирини һәрикәткә кәлтүрүп, жүргүзгүчиләр уюштурған көңүллүк оюнларға паал қатнашти. Шундақла алаһидә тәклип қилинған мультфильм қәһриманлириму имканийитиниң келишичә, уларниң көңлини елишқа тиришти. Мәлумки, һәрқандақ мәрасимни өткүзүш мәбләққә бағлиқ. Әнди хәйрихаһлиқ йөнилиштики чарә-тәдбирләрни униңсиз әсла тәсәввур қилиш мүмкин әмәс. Шуңлашқа бүгүнки мәрасимниң уюштурғучилири, җүмлидин «Инайәт» ассоциациясиниң рәиси Һакимҗан Арупов, «Амир» нака балилар җәмийәтлик фондиниң рәиси Кәнҗә Исаев вә «Doppalіfe» яшлар Интернет порталиниң йетәкчиси Сүлфи Мәшрәпов сөзгә чиқип, бүгүнкидәк қийин заманда өзлири башлиған бу сахавәтлик ишни һәртәрәплимә қоллап-қувәтлигән «Асфальтбетон 2» җавапкәрлиги чәкләнгән йолдашлиғиниң мудири Шавдун Исламовқа, ҖУЭМ йенидики «Нураний анилар» кеңишини рәиси Гүлҗаһан Муратоваға, «Җанан» ханим-қизлар кеңишиниң рәиси Мизангүл Авамисимоваға, «Бейбітшілік әлемі» қазақ иҗадий бирләшмисиниң рәиси, академик Абен Нурмановқа, җумһурийәтлик «Уйғур авази» гезитиниң баш муһәррири Ершат Әсмәтовқа вә бу изгү иштин чәттә қалмиған бир топ инсанларға Тәшәккүрнамиларни тапшурди. Тәкитләш керәкки, сөз болуватқан нака балиларни хошаллиққа бөләп, уларниң һөрмитигә кәң дәстихан йейишта һәр жили қол учини сунуп келиватқан миллитимиз вәкиллири екәнлиги һәммимизни хошал қилиду, әлвәттә. Мәсилән, һәрқандақ хәйрихаһлиқ паалийәтләрдин чәттә қалмайдиған сахавәтлик инсанлар – Гүлҗаһан Муратова, Мизангүл Авамисимова, Шәмшиқәмәр Абдурахманова, Таҗиниса Тохтиева вә Каминур Сопиева қатарлиқ ханим-қизлиримиз бийилму бу йәргә қуруқ қол кәлмәпту. Улар бу күни уюштурғучиларни маддий җәһәттин қоллап-қувәтлигәндин ташқири, йеңижиллиқ арча меһманлириға атиған соғилирини тапшурди. Қисқиси, туғма мәйип гөдәкләрниң ядида узун вақит сақлинидиған бу мәйрәмлик кәчниң ахири меһманларға һәрхил назу-немәтләргә вә оюнчуқларға толған соғиларни тарқитиш билән аяқлашти. Мәшүр САСИҚОВ.