• Хәйрихаһлиқ
• 20 Қаңтар, 2017

Бәндидин қайтмисиму, Алладин қайтсун

Рашидәм РӘҺМАНОВА, «Уйғур авази»/ Челәклик ағиниләр Һәмраҗан Қәмбәров билән Рашит Абаков һәр жилқи әнъәнә бойичә Йеңи жилни өз аилилири билән қарши елип, кәчни ағинә-достлири билән давамлаштуруш нийитидә мәшрәп әһли жиғилған өйгә маңиду. Йолда улар ялаң кийинивалған кичик икки қизни учритиду. Дәрру машинидин чүшүп, түн йеримида ялғуз жүргән қизлардин «Нәгә кетип барисиләр? Кечидә немишкә ялғуз жүрисиләр?» дәп сорайду. Бирақ, қизлар өзлиригә қоюған соалларға җавап беришниң орниға, наһайити музлап кәткәнлигини һәм қосиғиниң бәк ачқанлиғини ейтиду. Ағиниләр балиларни өйигә апириду. Бириниң путлирида пайпақниң йоқлуғини көргән Һәмраҗан билән Рашит әһвалниң нәқәдәр еғир екәнлигини дәрру чүшиниду. Балиларниң үз-көзини жуюп, тамақландуриду. У балилар – йәттә яшлиқ Гүлфия билән бәш яшлиқ Зулфия екән, улар аилисиниң мүшкүл әһвали һәққидә сөзләп бериду. Жигитләр қизларниң ейтқан мақан-җайи бойичә уларни өйигә йәткүзиду. Балиларниң кечидә кочиға ялғуз чиқип кетишигә йол қойған ата-анисини көрүшкә алдирайду. – Аилә икки еғизлиқ кона өйдә туридекән, — дәп сөзини башлиди Һәмраҗан. —  Әтрапи қоршалмиған, һаңғирқай очуқ. Өйниң сирти бузулуп, чүшүп кәткән. Ичкиригә кирдуқ. Бөлмиләр қараңғу һәм соғ. Биринчи бөлмидә бузулуп, йерилип кәткән пәч бар екән. Униң йенида 3-4 тал отун һәм бирнәччә очум көмүр йетипту. Бирақ, от йеқилмиған. Йеқилған һаләттиму, аллиқачан кардин чиққан пәчтики оттин өйниң иссип кетиши натайин. Өйниң ичидин боран чиқип туратти. Ичкиригә кирдуқ. Орун-көрпә, кийим-кечәк көрүнмәйду. Гиләмниң үстидә дақ йәрдила Гүлфия билән Зулфияниң акилири билән һәдиси сиртқи кийимлирини йәшмәйла ухлаветипту. Жүригимиз техиму моҗуп кәтти. Ениқлап көрсәк, биз тепивалған қизлиримизниң бәш қериндиши баркән. Әпсус, биз бу күни балиларниң атисиниму, анисиниму көрәлмидуқ. Амма балиларни өз ғәмхорлуғимизға алимиз, дегән қарарға кәлдуқ. Һәмраҗан билән Рашит бу аилә һәққидә мәшрәп әһлигә әһвални чүшәндүриду. Ағиниләр уларға ярдәм қолини сунушқа келишиду. Әтиси әтигәнлиги улар балиларни иссиқ өйгә елип келип, монча йеқип, жуюндуруп, үстигә пакиз кийимләрни кийдүриду. Шу арилиқта балиларниң аниси Майгүл (мәлум сәвәпләргә бола, әр-аялниң исимлири өзгәртилди — Р.Р.) тепилиду. Һә, жуқурида сөз болған аилиниң мәсилиси буниңдин бирәр жил бурун җумһурийәтлик «КТК» телеканалида ток-шоуларниң биридә көпчилик тәрипидин муһакимә қилинған екән. Шу чағда аилиниң муң-зарини чүшинип, ярдәм бәргәнләрму көп болған. Биз жигитләрдин Майгүлниң телефон номерини елип хәвәрләштуқ. У бешидин өткәнни сөзләп бәрди. Майгүл Аюп исимлиқ уйғур жигити билән муһәббәтлишип, аилә қурупту. Һәр иккиси уйғурлар зич яшайдиған тәвәләрниң биридин. Бир-бирини чин сөйгән яшлар йәттә пәрзәнт сөйүп, инақ яшайду. Кейинирәк Әмгәкчиқазақ наһийәсигә көчүп кәпту. Униң ейтишичә, Тәшкәнсу йезисида бу аилиниң өз өйи болған екән. Бирақ буниңдин бирнәччә жил бурун униңға от кетипту. Шуниңдин кейин көпбалилиқ аилиниң еғир күнлири башлинипту. Қийинчилиқларға бәрдашлиқ берәлмигән Аюп аяли билән балилирини ташлап кетипту. – Һаятимдики ялғуз хошаллиғим – пәрзәнтлирим. Көп қийинчилиқларни көрдуқ һәм көрүп келиватимиз. Ач қалған күнлиримиз  көп болди. Балиларниң атисиму, униң уруқ-туққанлириму бизгә һеч ярдәм көрсәткини йоқ. Шүкри, һаятта башқиниң дәрдини өзиниңкидәк қобул қилип, ярдимини айимайдиған адәмләр баркән. Шуларға рәхмәт, – дәйду көпбалилиқ ана. Майгүлниң Арман (17 яш), Алфия (16 яш), Алимҗан (11 яш), Һакимҗан (10 яш), Рәһман (9 яш), Гүлфия (7 яш) вә Зулфия (5 яш) исимлиқ йәттә балиси бар. Майгүлниң ейтишичә, КТК каналидики хәвәрдин кейин жүриги кәң, аллиқини очуқ адәмләрниң қоллап-қувәтлиши билән аилиниң әһвали хелила яхшиланған  көрүниду. Амма, бир арилиқта у телефонини йоқитип қоюп, алақисиз қапту. Аилиниң бирдин-бир тапавити – көпбалилиқ аниға дөләт тәрипидин берилидиған ярдәм пули. Уни өйниң иҗарисигә төләп, қалғиниға ун вә макарон мәһсулатлирини сетивелип жүргән. Бирақ, бир йәрдин иккинчи йәргә көчүп жүрүп, Майгүл һөҗҗәтлирини йоқитивапту. Шуңлашқиму 5-6 айдин бери ярдәм пулниму алалмайветипту. Һәмраҗан билән Рашит вәдә қилғинидәк, әтисила Челәкниң бирқатар ишбиләрмән жигитлири билән хәвәрлишип, хәйрихаһлиқ ишларни башлаветипту. Интернет арқилиқ учурларни әвәтип, мүмкинчилиги бар адәмләрни аилигә ярдәм беришкә чақириду. Баш-панасиз қалған аилиниң мүшкүл һали жүригидә оти барларни ойландуридиғанлиғи вә  т????????????????????? ???????. әшвишләндүридиғанлиғи һәқиқәт. Тез арида икки бөлмилик өйму, бираз җабдуқму тепилди. «Көп түкәрсә – көл болур»  дегәндәк, бири отун-көмүр чүширип бәрсә, йәнә бири балиларни кийим-кечәк билән тәминлиди. Һазир Майгүлниң балилири иссиқ өйдә, қосиғи тоқ, кәйпияти үстүн яшаватиду. Һәтта уларниң телевизориму бар. Майгүл йеқиндила чоң қизи Алфияни турмушқа бәрди. Қалған балилири Абай намидики мәктәптә билим еливатиду. Шуни қошумчә қилиш керәкки, челәклик сахавәтлик жигитләр буниң билән чәклинип қалғини йоқ. Улар Майгүлниң һөҗҗәтлирини дуруслап, буниңдин кейин дөләт тәрипидин ярдәм пул елишиға қол йәткүзди. Һакимийәттин аилигә өй селип бериш үчүн йәр аҗритип, униң һөҗҗәтлириниңму рәткә кәлтүрүшини қолға алди. Әтиязда қурулуш ишлирини башлимақчи. Униң үчүн һаҗәтлик материаллирини елип беридиғанларму  тепиливатқан охшайду. Хәлқимиздә «Оң қолуң бәргәнни, сол қолуң билмисун» дегән мақал бар. Майгүлгә ярдәм бәргән сахавәтлик жигитләрму өз исимлирини гезит арқилиқ көрсәтмәслигимизни өтүнди. «Кочида қалған балилар  баш-паналиқ болуп, иссиқ орунда ятсекән, бизгә кериги мошу» деди улар кәмтарлиқ билән. Әмгәкчиқазақ наһийәси.