• Футбол
• 02 Ақпан, 2017

Тәшкәнсаздин — Бразилиягә

Рашидәм РӘҺМАНОВА,  «Уйғур авази»/ Әмгәкчиқазақ наһийәсиниң «ІSSYK» балилар вә өсмүрләр футбол клуби булту дәсләпки қетим Алмута шәһәрлик балилар вә өсмүрләрниң футбол лигисиға қатнашти. Чемпионат 13-марттин 22-майғичә вә 4-сентябрьдин 30-октябрьғичә давамлишип, барлиғи болуп 18 матч өтти. Униңға «ІSSYK» клубиниң 105 балидин тәркип тапқан 4 командиси қатнашти. Бу оюнларда наһийәниң 2006-жили туғулған яш футболчилири маһир үлгисини көрситип, І орунни егилиди. Йеқинда чемпионатта ғалип чиққан командиларни рәғбәтләндүрүш тәнтәниси болуп өтти. «ІSSYK» клубиниң асасини салғучи Ейдар Айдаровниң тәкитлишичә, клуб 2013-жили бәрпа болди. Өскиләң әвлатни сағлам һаят тәризигә җәлип қилиш мәхситидә қурулған клубқа дәсләпки күнила балилар топ-топи билән келишкә башлиди. Ейдарму шуни күткән. Шуңлашқиму ишқа қизғин киришти. Үч йерим жилниң ичидә клуб әзалири футболниң қир-сирини һәртәрәплимә үгинип келиватиду. Улар наһийәлик, вилайәтлик вә җумһурийәтлик чемпионатлардин ташқири хәлиқара турнирларға қатнишип, мукапатлиқ орунлардин көрүнмәктә. 2015-жили «ІSSYK» клубиниң тәрәққият стратегияси қобул қилинип, клубқа округ, йезиларниң балилирини җәлип қилиш ишлири қолға елинди. Униң тәкливигә әң дәсләп Тәшкәнсаз округиниң футбол ишқивазлири җавап бәрди. Тәшкәнсазда футбол ишқивазлири интайин нурғун. Шуңлашқиму спортниң бу түри йезида яхши тәрәққий әткән. 12-13 жил бурун футбол клуби қурулған. 100дин ошуқ балини Нурмәһәмәт Ниязов мәшиқләндүрүватиду. Уларниң тәңдин-толиси «ІSSYK» клубиға әза болди. Жуқурида ейтип өткинимиздәк, Алмута шәһириниң лига оюнлирида 2006-жили туғулған яш футболчилардин тәркип тапқан команда ғалип чиқти. Командиниң тәркивидә 13 бала болса, уларниң йәттиси – тәшкәнсазлиқлар. Мукапат билән қайтқан яш футболчилар — Аруп Савутов, Ифрат Сидиқҗан, Рамзан Зайитов, Имран Ибрагимов, Сухраб Тайиров, Мәхсүт Давутов вә Тамирлан Алиевни Тәшкәнсаз йеза округиниң һакими Мәһәмәтҗан Султанияров, спорт инструктори Рано Ниязова, мәшиқләндүргүчи Нурмәһәмәт Ниязов, 9 йешидин футбол билән шуғуллинип, булту, йәни 15 йешида җумһурийәтниң 25 футболчиси қатарида Бразилияниң «Крузейро» футбол клуби билән 3 жиллиқ шәртнамә түзүшкә муйәссәр болған Рустәм Эмиров вә униң атиси Руслан Эмиров қарши алди. – Округта һамийларниң, Алмута шәһиридә истиқамәт қиливатқан тәшкәнсазлиқларниң, йеза активистлириниң ярдими билән стадион бәрпа болди, — дәйду округ һакими Мәһәмәтҗан Султанияров. — Наһийәлик мәслиһәтниң депутати, Тәшкәнсазда туғулуп өскән тиҗарәтчи Руслан Қалиев стадионни қоршап, униң әтрапиға 500дин ошуқ түп дәл-дәрәқ көчәтлирини олтарғузуп бәрди. Стадионға баридиған йолму рәткә кәлди. Кейинки жилларда футбол бойичә «Конфедерация кубоги», «Наһийә һакиминиң кубоги» вә «Наһийә чемпионати», булту Кеңәш Иттипақиниң Қәһримани Мәсим Яқупов намидики турнир бизниң стадионда өтти. Мошуниң барлиғи йезидики балиларниң футболға болған қизиқишини техиму  ашурмақта. – Мәшиқлиниш дәрислири асасән Тәшкәнсаздики Һезмәт Абдуллин намидики мәктәпниң спорт залида өтиду, – дәйду Нурмәһәмәт Ниязов. – Әнди һәптисигә бир қетим наһийә мәркизидики Тәнтәрбийә вә сағламлаштуруш комплексида үч саат мәшиқлиниду. Һазирчә Ишиктигә ата-анилар балилирини өзлири тошуватиду. Турнирларға қатнишиш мәсилисиму шуларниң ярдими билән әмәлгә ешиватиду. Булту Қирғизстанда өткән хәлиқара турнирға, Алмута шәһәрлик футбол лигисиға Руслан Қалиевниң қоллап-қувәтлиши билән берип кәлдуқ. Әнди бәзидә һамийларниң йоқлуғидин, турнирларға қатнишалмай қалған пәйтлиримизму болиду. Ата-аниларниң нурғуни деханчилиқ билән шуғулланғанлиқтин, бәзи вақитларда уларму бизгә ярдәм берәлмәй қалиду. Поңзәклиримизму конирап қалди. Қисқиси, проблема йетиду. Тәтилгә кәлгән Рустәм Эмиров изини бесип келиватқан инилирини тәбрикләп, уларға ақ йол тилиди. Үчинчи синиптин футбол билән шуғулланған у һазир Бразилияниң «Крузейро» футбол клубиниң алдинқи қатарлиқ футболчиси аталди. Өз командисиниң капитани. Булту ҚҖ Президентиниң кубоги үчүн Чимкәнт шәһиридә өткән турнирға қатнашти.  «Қайрат» клубиниң тәркивидә ойнашни арман қилиду. Тәшкәнсаз йеза округида мана мошундақ спортчилар йетилип келиватиду. Уларниң келәчәктә чоң пәллиләрдин көрүнүшигә тиләкдашлиқ билдүримиз. Әмгәкчиқазақ наһийәси. СҮРӘТТӘ: тәшкәнсазлиқ футболчилар мәшиқләндүргүчилири, йеза һакими вә Рустәм Эмиров (оңдин биринчи) билән.