• Әхбаратлар еқими
• 17 Наурыз, 2017

Ишәнчини ақлаш пәриз

Дөләт рәһбири Нурсултан Назарбаев 14-март күни иш бабидики сәпәр билән Ақмола вилайитидә болди. Президент вилайәт активи билән регионниң иҗтимаий-ихтисадий тәрәққият мәсилилири бойичә кеңәшмә өткүзди.Президент жиғин қатнашқучилириға вилайәтлик мәслиһәтниң новәттин ташқири сессиясидә намзити бәкитилгән вилайәтниң йеңи һакими Малик Мырзалинни тонуштурди. Қазақстан Президенти вилайәт активиға беғишланған сөзидә бирқатар көрсәткүчләр бойичә, шуниң ичидә санаәт, йеза егилиги мәһсулатлирини йетиштүрүш, инвестицияләрни җәлип қилиш, шундақла турушлуқ өй қурулуши мәсилилиригә әтраплиқ тохталди. Биз чоң үч боһранни баштин өткүзсәкму, елимиздики турақлиқни сақлап қалдуқ вә тәрәққий етиватимиз. Ихтисадий қийинчилиқларни йеңишкә шараит яритидиған миллий фонд қурдуқ. Әнди алдимизда дунияда тәрәққий әткән 30 дөләтниң қатариға кириш үчүн «Қазақстанниң Үчинчи йеңилиниши: дуниявий риқабәткә қабиллиқ» Мәктүбини әмәлгә ашуруш даирисидә йеңи вәзипиләр туриду, — деди Нурсултан Назарбаев. Дөләт рәһбири индустрияләштүрүш программилирини әмәлгә ашурушниң, регион вә пүткүл җумһурийәт бойичә инфрақурулумни тәрәққий әткүзүшниң муһимлиғиға тохталди. Шундақла Нурсултан Назарбаев М.Мырзалинға вилайәтниң йеза егилиги секторини буниңдин кейинму тәрәққий әткүзүшкә мунасивәтлик бирқатар вәзипиләрни жүклиди. Шуларниң ичидә йеза егилиги кооперативини қуруш, илмий иқтидарни пайдилинип, мәһсулдарлиқни ашуруш, йеза егилигигә кичик несийәләрни бөлүш, кичик вә оттура тиҗарәтни риваҗландуруш арқилиқ агросанаәт комплексини тәрәққий әткүзүшниң әһмийитигә тохталди. Жиғин ахирида Қазақстан Президенти қатнашқучиларға бийил һосулниң мол болушиға әтиязлиқ терилғу ишлириниң утуқлуқ өтүшигә тиләкдашлиқ билдүрди.