• Хәйрихаһлиқ
• 04 Мамыр, 2017

Тәбиий апәт инсанларға синақ

Мәшүр САСИҚОВ, «Уйғур авази»/ Бийилқи әтияз өзини һәммә тәрәптин тонутти. Униң созулғини аздәк, ямғур-йешин адәттикидин көп болуп, җумһурийитимизниң бәзи вилайәтлирини су бесип, йүзлигән турғунлар өй-макансиз қалди. Пәвқуладдә әһваллардин сақлаш органлириниң хадимлири тәбиий апәттин зәрдап чәккәнләрни бехәтәр җайларға көчирип, иссиқ тамақ вә кийим-кечәкләр билән тәминләватсиму, бу ярдәм азлиқ қиливатиду. Униң үстигә чиқимға учриғанларниң сани күндин-күнгә өсүп, адәмләрниң кәйпиятини хелила чүширивәтти. Бешиға күн чүшкәнләрни өз дәрди билән ялғуз қоймиған қазақстанлиқлар бу йеқимсиз хәвәр тарқалған пәйттин башлап, һәрким имканийитиниң йәткиничә ярдәм қолини сунушқа башлиди. Елимиз меһриван һәм хәйри-сахавәтлик инсанларға толуп-ташқан екән. Аз вақит ичидә озуқ-түлүк, кийим-кечәк вә башқиму керәклик ярдәмләр топлинип, улар зәрдап чәккүчиләргә йәткүзүлди. Һәрхил хәйрихаһлиқ акцияләр билән концертлар уюштурулуп, униңдин чүшкән мәбләғ вә бюждет хадимлириниң биркүнлүк иш һәққи ярдәм сүпитидә әвәтилди. Әнди Астана шәһәрлик Уйғур этномәдәнийәт мәркизиниң рәиси Рустәм Абдусаламовниң хәвәрлишичә, Йеқинда «Нур Отан» партиясиниң Астана шәһәрлик шөбиси, уйғур, өзбәк, корей, туңган вә татар этномәдәнийәт мәркәзлири билән «WBC cares» дуниявий бокс кеңишиниң хәйрихаһлиқ бөлүмчиси, «Bіg Шанхай» базириниң тиҗарәтчилири бирлишип, бирнәччә тонна озуқ-түлүк вә кийим-кечәкләрни һәм маддий ярдәм пулини Ақтөбә вилайитиниң Астрахань наһийәсигә апирип тарқитипту. Акция уюштурғучилири өзлириниң тәшәббусини мунчилик адәм қоллап-қувәтләйду, дәп ойлимиған екән. Шуңлашқа улар вақитни үнүмлүк пайдилинип, жиғилған барлиқ маддий ярдәмни вилайәт мәркизидин 600 километр жирақтики наһийәгә йәткүзгән. — Бу йәрдә бизниң акция тоғрисидики хәвәрни тарқатқан әхбарат васитилиригә ейтар миннәтдарлиғимиз чәксиз – дәйду Рустәм Абдусаламов. – Һәрқандақ балаю-апәттин һечкимниң қечип қутулалмайдиғанлиғини ядимизға алсақ, мошундақ күнләрдә бир-биримизгә ярдәм қолумизни сунушни унтумаслиғимиз керәк. Шәхсән мән су басқан районларда болдум. У йәрдики әһвал һәрқандақ адәмниң жүригини моҗуйдиғанлиғи чоқум. Пүткүл бар бисатидин мәһрум болған қери-чүриләр билән көпбалилиқ аилиләрниң жиға-зерисини аңлашниң өзи бир дәһшәт. Қандашлиримизға мошундақ еғир әһвалларда ярдәм қилмисақ, бизниң инсан болғинимиз қени? Бүгүн мундақ хәйрихаһлиқ ярдәм җумһурийәт бойичә кәң қанат яймақта.