• Йеңилиқлар
  • 09 Қаңтар, 2012

Тиләйдиғини — яхшилиқ-изгүлүк

Биз хошна йезиларда — Узунағаш вә Фабричное йезилирида өсүп чоң болған. Атилиримиз яхши тонушлардин, анилиримиз йеқин достлардин еди. Бир университетниң бир факультетида тәһсил көрдуқ. Балилиқ чағлиримиздин тартипла умумий мәхсәтни көзләп, умумий қәдрийәтләрни әзизләп өстуқ. Һәр иккилимиз бизниң мәрһум ата-анилиримиз наһайити һөрмәтләйдиған адәмниң көз алдида чоң болдуқ десәк, ашуруп ейтқанлиқ әмәс. У — Тохтахун ака Сәйдинов. Биз уни дайим өзимизгә үлгә тутаттуқ вә һазирму шундақ қиливатимиз. Бир қаримаққа Тохтахун ака аддийғинә адәм. Бирақ униң билән йеқин мунасивәттә болсиңиз, милләт мәнпийити үчүн җан көйдүридиған, наһайити кәмтар, адәмләргә дайим яхшилиқ-изгүлүк тиләйдиған инсан екәнлигигә очуқ көз йәткүзисиз. Тохтахун ака 1937-жили 1-январьда тарихий вәтинимизниң Қорғас йезисида дехан аилисидә туғулған. Униң ата-аниси жутдашлириниң арисида чоң һөрмәт-еһтирамға егә еди. Улар оғлиға яхши билим беришни арман қилатти. Шуңлашқиму яш Тохтахун мәктәпни тамамлиши билән, Үрүмчи қурулуш техникумиға оқушқа чүшиду. Уни утуқлуқ тамамлиғини билән таллавалған мутәхәссислиги бойичә анчила узақ ишлимәйду. Бу 1962-жил еди. Ғулҗида вә Хитай — Кеңәш чегарисида йүз бәргән паҗиәлик вақиәләрдин кейин миңлиған уйғурлар ана диярини тәрк етип, Қазақстанға көчүп келишкә мәҗбур болиду. Уларниң арисида 25 яшлиқ Тохтахунму бар еди. Қазақстан униң иккинчи вәтинигә айлиниду. Тәғдир тәқазаси билән Тохтахун Сәйдинов Узунағашқа келип орунлишиду. Бу йәрдә у һайдиғучилар курсини тамамлап, шоферлуқ гуванамә алғандин кейин Ленин намидики колхозда ишләшкә башлайду. Яш һайдиғучи аз вақитниң ичидила кәсипдашлири билән жутдашлириниң һөрмәт-еһтирамиға сазавәр болиду. Қоли гүл, техникини яхши өзләштүргән у егиликниң барлиқ иш-саһалириға арилишиду десәк, хаталашмаймиз. Өз кәспини чин дилидин сөйгән Тохтахун бир аз вақиттин кейин партия сепигә қобул қилиниду вә Җамбул наһийәлик партия комитетиниң әзаси, наһийәлик кеңәшниң депутати болуп сайлиниду. У шундақла Алмута вилайәтлик партия конференциясиниң делегатиму болған. Бир нәччә қетим социалистик мусабиқиларда ғалип чиқип, көплигән медальлар вә ярлиқлар билән тәғдирлиниду. У 1962-жилниң октябрь ейида өзи сөйгән Селимәм исимлиқ қизға өйлинип, иккиси бәш оғул вә үч қизни чоң қилип қатарға қошиду. Пәрзәнтлириниңму һәммиси атиси охшаш кәмтар вә әмгәк сөйгүч адәмләрдин. Әпсуски, уларниң қизиғини көридиған вақитта, буниңдин бир нәччә жил илгири рәпиқиси аләмдин өтиду. Мана мошу сөзи вә иши әмәлиятқа уйғун келидиған кам сөзлүк инсан биз үчүн һәқиқий зияли адәм болуп һесаплиниду. У өз тәғдирини хәлқиниң тәғдиридин бөлүп қаримай, пүткүл һаяти давамида наһийәдики уйғурларниң җамаәтчилик ишлириға паал арилишип келиватиду. 1990-жили Тохтахун ака наһийәлик Уйғур мәдәнийәт мәркизини қурғучиларниң бири болди, мәркәз рәисиниң орунбасари вәзиписини атқурди. Кейинки жилларда у наһийәлик Уйғур этномәдәнийәт мәркизи йенидики Ақсақаллар кеңишини башқуруп кәлмәктә. У шундақла наһийәлик Ақсақаллар кеңишиниң әзаси. Бийил наһийәмиздә үч йүзгә йеқин адәм «Уйғур авази» гезитиға муштири болди. Буниңға ана тилимиздики гезитқа муштири топлаш комиссиясигә рәһбәрлик қилған Ақсақаллар кеңиши рәисиниң алаһидә һәссә қошқанлиғини тилға елиш орунлуқтур. У шәхсән өзи һәр бир өй-һойлиға кирип, жутдашлириниң гезитқа йезилишини тәминлиди. Алаһидә тәкитләш керәкки, Тохтахун ака көп милләтлик наһийәмиз турғунлири арисидиму чоң һөрмәткә егә. Йеқинда у 75 яшлиқ тәвәллудини нишанлиди. Шу мунасивәт билән биз  кишиләргә дайим яхшилиқ-изгүлүк тиләйдиған Тохтахун акини сәмимий тәбрикләп, униңға саламәтлик, аиләвий хатирҗәмлик тиләймиз.

Әркинтай ИБРАГИМОВ,

Исмайилҗан ИМИНОВ.

Җамбул наһийәси.    

607 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы