• Хәйрихаһлиқ
• 07 Қыркүйек, 2017

Өмлүгимизниң ярқин ипадиси

Бала-қаза көрүнүп кәлмәс/ Мәшүр САСИҚОВ, «Уйғур авази»/ Буниңдин бир ай илгири, ениғирағи, 29-июль күни кәчки саат тоққузлар әтрапида Талғир наһийәсиниң Туздыбастав йезисида «Талғир – Алмута трассиси бойидики өйләрниң биригә өрт кетипту», дегән шум хәвәр чақмақ тезлигидә тарқиди. Дәрһал жут турғунлири, болупму яшлар қоллириға бирдин челәк яки су тошулидиған қачиларни елип, паҗиә йүз бәргән җайға алдирашти һәм пәйдин-пәй күчигә кириватқан, йәни өз вақтида өчирилмисә, хошна өйләргиму тутушуп кетишкә тайин тапқан өрт билән күрәшти. Бу паҗиәдин хәвәр тапқан хошна Бесағаш, Қизил Ғәйрәт вә Талғир шәһириниң  турғунлириму туздыбаставлиқларға ярдәмгә кәлди. Шундақ қилип, көпчилик «қол-қолчә» тилсиз йеғини тизгинләшкә тиришқан болсиму, үч аилиниң өй-макани күл астида қалди. Амма, әң муһими, шу бир-биригә меһриван, өзгиләрниң ғәм-қайғусиға бепәрва қаримайдиған инсанларниң күч чиқириши түпәйли адәм чиқими болмиди. Паҗиә йүз бәргән күнниң    әтисила җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Абдурешит Мәхсүтов башлиған Алмута шәһириниң, «Султанқорған» мәһәллисиниң вә «Алатав» наһийәсиниң баш жигитбашлири Инәмҗан Худайбәрдиев, Ғәйрәт Мәмәтәлиев билән Ярмәһәмәт Кебиров келип, бешиға күн чүшкән қериндашлиримизниң һалини сориди. Тилсиз йеға күлгә айландурған өйләрни көргән Абдурешит Мәхсүтов дәрһал барлиқ уйғур жутлиридики жигитбашлириға зәрдап чәккәнләргә маддий җәһәттин яр-йөләк болуш тоғрилиқ мураҗиәт қилди. Мана шу күндин етиварән, миллитимиз вәкиллири истиқамәт қиливатқан барлиқ жутларда ианә топлаш иши қизғин жүргүзүлди. Өткән йәкшәнбә күни «Нур» кафесида баш қошқан жигитбашлири зәрдап чәккәнләрниң бири Тудахун Тохтахуновқа көпчиликтин жиғилған ярдәм пулини тапшурди. Баш қошушта Абдурешит Мәхсүтов сөзгә чиқип, өзиниң «Мошу бешиға күн чүшкән қериндашлиримизға ярдәм қолумизни сунайли», дегән тәшәббусимизни йәкдиллиқ билән қоллиған жигитбашлириға миннәтдарлиғини билдүргәч, мундақ деди: – Биз, жигитбашлири, һәрдайим ярдәм беришкә тәйяр қошун десәм, хаталашмаймән. Мәсилән, жигитбашлириниң «җеним-теним» дәп әмгәк қилиши арқилиқ Алмута вилайитиниң Қизилағаш йезисида, Уйғур наһийәсиниң Чарин йезисида, кейинирәк Алмута шәһири йенидики Қарағайлы йезисида тәбиий апәт йүз бәргәндә, уларға һәртәрәплимә ярдәмләштуқ. Бүгүн мана Туздыбастав йезисиниң турғуни Тудахун Тохтахуновқа жутлардин жиғилған пулни тапшурмақчимиз. Бу болсиму биз, уйғурларниң, өмлүгиниң ярқин ипадиси. Шундақ екән, бу ишқа паал арилашқан барлиқ жутларниң җамаәтчилигигә чәксиз миннәтдарлиғимни билдүримән. Кейин сөз новитини алған Талғир наһийәсиниң баш жигитбеши Октябрь Қурбанниязов жут-жутлардин жиғилған ианиниң тизимини елан қилди. (Төвәндә уларниң тизими елан қилиниватиду). Андин Талғир наһийәлик Уйғур этномәдәнийәт мәркизиниң рәиси Иминҗан Тохтахунов, Туздыбастав йезисиниң баш жигитбеши Турғанҗан Вахияров вә башқилар сөзгә чиқип, көпчиликни мошундақ ғәм-қайғудиму биллә болушқа чақирди вә бешиға еғир күн чүшкән жутдишиниң дәрдигә дәрман болған барчә қериндашларға миннәтдарлиғини изһар қилди. Бу күни шундақла Горный Гигант мәһәллисидин исмини аташни халимиған бир топ жигитләр 10 тонна цемент, шехил вә қум-таш охшаш қурулуш материаллирини елип беришкә тәйяр екәнлигини йәткүзсә, Бесағаш йезисидин Һашимахун Кулеков, Абдуллам Өмәров охшаш йеши тохсәнгә тақиған мөтивәрләр вә бир топ яшлар мошу улуқ ай, улуқ күнләрдә қилинидиған қурванлиқлириниң һәққини йәнә шу тилсиз йеғидин зәрдап чәккәнләргә тапшурупту. Яшлардин Ринат Мәмәттохтиев өзиниң аилиси намидин 100 миң тәңгә берип, уларниң дәрдигә дәрман болди. Бу йәрдә шу нәрсә ениқ болдики, мошу өрт бар-бисатидин айриған аилигә ярдәм қилиш ишида туздыбаставлиқлар, болупму йеза яшлири паалийәтчанлиқ көрситиватиду. Шуниң нәтиҗисидә һазирға қәдәр уларниң жутдишиға жиққан ианиси тоққуз йүз миң тәңгә әтрапида болуватиду. Жут егилириниң ейтиши бойичә, көп өтмәй бу рәқәм чоқум өсиду. Шундақла өзиниң сахавәтлик ишлири билән тонулған мәрт-мәрданә инсан Әхмәтҗан Шардинов өрт кетип макансиз қалғанларға өйлирини турғузушқа лазим болған материалларни беришкә тәйяр екәнлигини йәткүзүпту. Баш қошуш ахирида жут башқуруп әлниң ишәнчисигә егә болған жигитбашлириниң өзигә диққәт ағдуруп, хәлиқтин жиғилған ианини тапшурғанда,  Тудахун Тохтахуновниң еғизиға «Хәлқимгә, жутумға рәхмәт» дейиштин башқа сөз кәлмиди. Әлвәттә, көпчилик униң әһвалини яхши чүшинип туратти. Алмута шәһири бойичә Жетису наһийәси Султанқорған мәһәллиси – 400 000 тәңгә. Наурызбай наһийәси Қарағайлы, Абай, Жаңатұрмыс вә Қошмәмәт мәлилири – 200 000 тәңгә. Алатав наһийәси Заря Востока мәһәллиси – 110 000 тәңгә. Һөҗҗәт мәһәллиси — 70 000 тәңгә. Әвезов наһийәси Достлуқ мәһәллиси – 85 000 тәңгә. Алатав мәһәллиси – 70 000 тәңгә. СМУ – 15 мәһәллиси 63 000 тәңгә. 1 – 12 микрорайонлар – 60 000 тәңгә Ақбулақ мәһәллиси – 50 400 тәңгә. Алмагүл мәһәллиси –50 000 тәңгә. Медеу наһийәси Горный Гигант – 65 000 тәңгә. Көктөбә мәһәллси – 35 000 тәңгә. Алмута вилайитиниң Талғир наһийәси Туздыбастав йезиси – 850 000 тәңгә. Бесағаш йезиси – 683 000 тәңгә. Қизил Ғәйрәт йезиси – 70 000 тәңгә. Гүлдала йезиси – 70 000 тәңгә. Белбулақ йезиси – 41 000 тәңгә. Талғир шәһири – 30 000 тәңгә. Җәми: 3 002 400 тәңгә. Концерттин чүшкән мәбләғ зәрдап чәккүчиләргә тапшурулди Йеқинда Туздыбастав йезисида өрттин зәрдап чәккән аилиләргә маддий җәһәттин ярдәм көрситиш мәхситидә Қуддус Ғоҗамияров намидики дөләт Уйғур академиялик музыкилиқ-комедия театриниң уюштуруши билән мәзкүр йезидики Мәдәнийәт өйидә хәйрихаһлиқ концерт болуп өтти. Концертқа «Яшлиқ», «Нава», «Рухсарә» ансамбльлири, «Дәрвишләр», «Нур» топлири вә шундақла сәнъәт мухлислириға өзиниң йеқимлиқ нахшилири билән тонулған иҗрачи һәм продюсер Артур Илахунов иштрак қилди. Концертқа зәрдап чәккәнләрни мәнивий вә маддий җәһәттин қоллап-қувәтләш үчүн хошна йезилардинму адәмләр көп кәлди. Муңлуқ саз-нәғмиләр билән әвришим уссуллардин бәһирләнгән тамашибинлар сәнъәткарларниң һәрбир нахшисини гүлдирас чаваклар билән қарши алди. Исми көпчиликкә яхши мәлум иҗрачиларму уларниң көңлидин чиқишқа тиришти. Шу түпәйли тилсиз йеға бар мал-дуниясидин айриған қериндашларға ярдәмлишиш истигидә уюштурулған концерт жуқури дәриҗидә һәм қизиқарлиқ өтти. Өз новитидә, Талғир наһийәлик мәслиһәтниң депутати Мухит Дюсебаев зәрдап чәккүчиләргә өз аилиси намидин 100 АҚШ доллирини ианә қилса, Туздыбастав мәһәллисиниң Ақсақаллар кеңиши намидин 40 миң тәңгә тапшурулди. Әнди концерттин чүшкән 646 миң тәңгини Талғир наһийәсиниң баш жигитбеши Октябрь Қурбанниязов өрттин зәрдап чәккән икки аилигә, хусусән Тудахун Тохтахунов билән Наталья Патрогинаға тапшурди. Концерт ахирида тилсиз йеға нәтиҗисидә бар-бисатидин айрилған шәхсләр сөзгә чиқип, ушбу хәйрихаһлиқ концертни уюштурғучиларға чәксиз миннәтдарлиғини билдүрди. Альбина ӘМӘТОВА. Талғир наһийәси.