• Хәйрихаһлиқ
• 30 Қараша, 2017

Изгү нийәт рояпқа чиқти

Мәшүр САСИҚОВ,«Уйғур авази»/ Рошәнгүл Тохтахунова (сүрәттә, оңда) — пәрзәнди нака аталған аниларниң бири. Қизи мошундақ мәйип болуп туғулғинида, униң үчүн һаят тохтап қалғандәк билингән еди. Жиғлиди, қахшиди. Ахири көз яшниң униңға ярдәм қилалмайдиғанлиғини убдан чүшәндидә, белини мәккәм бағлап, пәрзәндиниң путиға туруп кетиши үчүн бар күч-ғәйритини сәрип қилди. Қизини спортниң һәрхил секциялиригә апирип, өзи биллә мәшиқләнди. Нәтиҗидә қизи Мәликәм суда үзүшни таллавалди һәм көп вақит өтмәй, дәсләпки утуқларғиму қол йәткүзди. Буниңдин илһамланған Рошәнгүл Тохтахунова пәқәт өзиниң қизиғила әмәс, бәлки мошундақ әһвалға дуч кәлгән башқа балиларғиму ярдәмлишишни қәтъий қарар қилди. Шу-шу болдидә, у узун жиллар мабайнида имканийити чәкләнгән балилар билән иш елип бериватиду. Униң армини мәхсус мәркәз ечип, шу йәрдә нака балиларниң һәртәрәплимә өсүп-йетилиши үчүн шараит яритиш еди. Бу йолда у нурғун күч чиқарди. Бир мәсилини һәл қилса, йәнә бири тәйяр турған. Униң үстигә мәбләғ җәһәттин қийналғиничу? Җапалиқ әмгәк өз нәтиҗисини бәрмәй қоймиди. Әтрапимизда сахавәтлик инсанлар көп екән, уни қоллап-қувәтлигүчиләр арқа-арқисидин тепилди. Йәни улар Рошәнгүл Тохтахунованиң немигә интиливатқанлиғиға көз йәткүзүп, униңға қол учини сунушни тоғра көрди. Шундақ қилип, Рошәнгүл Тохтахунованиң тәшәббуси билән мошу дүшәнбә күни Талғир наһийәсиниң Қизил Ғәйрәт йезисида «Ақ жол» намлиқ заманивий реабилитация мәркизи ечилди. Униң рәмзлик лентисини, әлвәттә, келәчәктә мәзкүр мәркәздә иҗадий ишләйдиған, оқуйдиған, тәнтәрбийә билән шуғуллинидиған һәм вақтини хошал-хорам өткүзидиған балилар қийди. Мәркәзниң рәсмий ечилишида сөзгә чиққанлар, җүмлидин Миллий балилар реабилитация мәркизи Алмута шәһәрлик шөбисиниң мудири, медицина пәнлириниң доктори, профессор Шолпан Бөлекбаева, «Алатау» җумһурийәтлик клиникилиқ балилар санаториясиниң мудири Ханшайым Мусаева, ТНТС түрк тиббий туризм ассоциациясиниң Қазақстандики вакаләтханисиниң мудири Халида Садыкова, америкилиқ Тейлорлар аилиси вә башқилар Рошәнгүл Тохтахунованиң намиға иллиқ тиләклирини ейтқач, атиған соғилири тапшурди. Уларниң арисида чоң реабилитация мәркәзлиридә вә санаторияләрдә балиларға саламәтлигини яхшилаш үчүн берилгән йолланмиларму бар. Әнди бу мәркәздә наһийәдики барлиқ мәйип вә нака балиларға саламәтлигини яхшилаш мүмкинчилиги туғулиду вә уларға 30 салаһийәтлик педагог дәрис бериду. Илгири-кейин мундақ имканийәткә егә болмиған, йәни тәғдир тәқәзаси билән нака аталған балиларниң бу күни хошаллиғида чәк болмиди. Мәрасим ахирида, барлиқ меһманлар Талғир наһийәлик Уйғур этномәдәнийәт мәркизи вә Қизил Ғәйрәт йезисиниң жут-җамаәтчилиги тәрипидин йейилған дәстихандин дәм тартти.