• Жут адәмлири
• 11 Қаңтар, 2018

Казнарощтики тәнтәнә

Йеңи жил һарписида Казнарощ мәһәллисидә «Әлахан Султан» кафесида жут-җамаәтчиликниң баш қошуш мәрасими өткүзүлди. Шуни алаһидә тәкитләш керәкки, хелидин мәйрәмлик кәйпият билән жут адәмлири мундақ мәрасимларни өткүзмигән еди. 2000 — 2007-жиллири Түрксиб наһийәлик Ханим-қизлар кеңишиниң, андин Казнарощ мәһәллиси ханим-қизлар кеңишиниң рәиси болуп ишлигән Гүлбәһрәм Үсәнованиң жут-җамаәтчилик ишлиридики топлиған тәҗрибиси мол. Шуңлашқа улар йеңидин сайланған жигитбеши Алимҗан Һосмановқа һәртәрәплимә ярдәмлишип, бу кәчни уюштурушқа көп күч чиқарди. Йәнә хошал болидиған йеңилиқларниң бири, бу жили, Казнарощ мәһәллисидә «Уйғур авази» гезитиға муштири болғучиларниңму сани хелила көпәйди. Жут мөтивәрлири, оттура вә яш әвлат вәкиллири иштрак қилған бу кәчтә бирликтә, өмлүктә болуш, яш әвлатни миллий қәдрийәтләр вә инсаний пәзиләтләр асасида тәрбийиләш, жут мөтивәрлиригә, уруш вә әмгәк ветеранлириға ғәмхорлуқ қилиш һәққидә иллиқ пикирләр ейтилди.. Мәсилән, Алмута шәһәрлик Уйғур этномәдәнийәт мәркизи тәрипидин уюштурулған «Ата-аниларни һөрмәтләш күнидә» Алимҗан Һосманов вә Гүлбәһрәм Үсәнова қатарлиқ җанкөйәрләр бу мәһәллидики йеши сәксәндин алқиған мөтивәрләрни өйлиригә йоқлап барди. Казнарощ мәһәллисидики бу кәчкә меһман ретидә Алмута шәһәрлик Уйғур этномәдәнийәт мәркизи Ханим-қизлар кеңишиниң рәиси Маһинур Исрайилова, Түрксиб наһийәлик Уйғур мәдәнийәт мәркизи Ханим-қизлар кеңишиниң рәиси Нурбүви Пазилова қатнашти. Мәрасимда яңриған нахша-саз, орунланған уссуллар арамбәхш дәмләрни һәдийә қилди. Азнат ТАЛИПОВ.