• Йеңилиқлар
• 30 Қаңтар, 2012

Йеңи Һөкүмәтниң дәсләпки мәҗлиси

Сешәнбә күни Астанада җумһурийәт Һөкүмитиниң йеңиланған тәркиптики дәсләпки селекторлуқ мәҗлиси болуп өтти. Мәҗлистә Премьер-Министр Кәрим Мәсимов өз орунбасарлириниң вәзипилирини тәхсим қилди вә уларниң асасий иш йөнилишлирини бәлгүләп бәрди. —   Дөләт рәһбири вә Парламент бир нәччә қетим бизниң Министрлар кабинетиға ишәнчә билдүрүватиду. Мән мошу ишәнчә үчүн йәнә бир қетим тәшәккүр изһар қилимән. Шундақла Һөкүмәтниң барлиқ әзалириға, һакимларға, барлиқ дөләт органлириниң хадимлириға миннәтдарлиқ билдүримән, чүнки бу ишәнчә бизниң бирләшкән ишимизниң нәтиҗилири арқилиқ қолға кәлтүрүлди, — деди Кәрим Мәсимов мәҗлисни ечип. Андин кейин Министрлар кабинетиниң башлиғи Һөкүмәтниң йеңи әзалирини тәбриклиди. Кәрим Мәсимов вәзипиләрни тәхсим қилип, дөләт органлириға болған барлиқ тайинлашларниң аяқлашқанлиғини тәкитлиди. Әнди беваситә Дөләт рәһбири бәргән тапшуруқларни орунлаш керәк. Мәсилән, биринчи вице-премьер Серик Ахметов ихтисатниң вә регионал сәясәтниң оператив мәсилилири, Сүръәтлик индустриал-инновациялик тәрәққият программисиниң әмәлгә ашурулуши, санаәт, электр энергетикиси, туризм саһалириниң тәрәққий етиши охшаш мәсилиләр үстидин назарәт қилиду. Шундақла у аграр-санаәт комплекси, йәр-су мунасивәтлири, әтрап муһитни қоғдаш, тәбиәт ресурслирини пайдилиниш, космос паалийити, қурулуш вә турушлуқ өй-коммунал егилигини йеңилаш, транспорт инфраструктурисини тәрәққий әткүзүш үчүнму җавапкәр. Премьер-Министрниң орунбасари Ербол Орынбаев билим, илим-пән, саламәтликни сақлаш, иҗтимаий сәясәт, иҗтимаий шериклик, мәдәнийәт вә спорт мәсилилирини, шундақла кичик вә оттура тиҗарәтни тәрәққий әткүзүш, бизнес-бирләшминиң дөләт органлири билән өз ара һәрикитини уйғунлаштуруш, мәмурий ислаһатни әмәлгә ашуруш охшаш мәсилиләр үстидин назарәт қилиду. Униңдин ташқири, «Тиҗарәтниң йол хәритиси — 2020» вә «Иш билән тәминләш — 2020» программилириниң әмәлгә ашурулушиниму уйғунлаштуриду. Вице-премьер Қайрат Келимбетов макроихтисадий бюджет сәяситини, дөләт активлирини, малийә секторини башқуруш, селиқ вә бажхана сәясити, дөләт-хусусий шерикликни тәрәққий әткүзүш, тәбиий монополияләрни тәңшәш, сода вә тариф сәяситиниң риқабәтчилигини тәрәққий әткүзүш, дөләт планлаш системиси, Қазақстанниң Дуниявий сода тәшкилатиға кириш мәсилилири вә ЕврАзЭС, Бажхана иттипақи вә Бир пүтүн ихтисадий кәңлик даирисидики һәмкарлиқ мәсилилирини назарәт қилиду. —        Өткән жили ихтисатниң 2015-жилғичә һәр жили йәттә пайиз өсүшини тәминләш бойичә план тәстиқләнгән еди, — дәп тәкитлиди Кәрим Мәсимов. — Һазир биз новәттики дуниявий ихтисадий вә малийә боһрининиң босуғисида туримиз. Еврозона малийә секториниң турақсизлиғи униң еһтималлиғини тәстиқләйду. Бирақ шуниңға қаримай, тапшуруқни орунлаш керәк, шундақ екән, биз паалийитимизни уйғунлаштурушимиз лазим.