• Кичик вә оттура тиҗарәт
• 05 Шілде, 2018

«Бу бизниң бовимиз»

Мәшүр САСИҚОВ, «Уйғур авази» Мәлумки, Дөләт рәһбири Нурсултан Назарбаевниң қазақстанлиқларға йоллайдиған әнънивий мәктүблиридә аһалиға хизмәт көрситиш билән шуғуллиниватқанларни һәртәрәплимә қоллап-қувәтләш керәклиги һәққидә пат-пат ейтилиду. Өзлириниң тиҗаритини йолға селип, Талғир наһийәсиниң Бесағаш йезисидики «Алтынай» балилар бағчисини ачқан Һәмраҗан Мәңсүров әйнә шу имтиязлардин тоғра пайдилинишни билди.Буниңдин үч жил илгири Һәмраҗан Мәңсүров өз өйидә балилар бағчисини ечиш нийити бар екәнлиги тоғрилиқ чоң оғли Рустәм билән мәслиһәтләшкәндә, кичик вә оттура тиҗарәткә һөкүмәт тәрипидин көрситиливатқан йеникчиликләрдин убданла хәвири бар болғачқа, у дадисиниң пикрини бирдинла қоллап-қувәтләйду. Шундақ қилип, Һәмраҗан акиниң узундин буян көңлигә пүккән балилар бағчисини ечиш ойи аилә әзалириниң, җүмлидин рәпиқиси Реһангүл Мәңсүрованиң ярдими түпәйли рояпқа чиқти. Һәммә нәрсигә қоли әплик, һәрқандақ ишқа җавапкәрлик билән қарайдиған Һәмраҗан Мәңсүров балилар бағчисиға һаҗәт болған җабдуқ-җиһазниң жипидин-жиңнисиғичә өзи ясап чиқиду. Һәммә нәрсисиниң балилар үчүн қолайлиқ һәм бехәтәр болуши, заманивий җиһазлар билән толуқ тәминлинишигә алаһидә диққәт ағдуриду. 75 орунлуқ бағчини арилап, униң һәқиқәтәнму дит билән селинғанлиғиға көз йәткүздуқ. Шундақла 1,5 яштин башлап, мәктәп йешиғичә болған балиларни қобул қилидиған бағчиниң тазилиғи, гөдәкләрниң вақтини көңүллүк өткүзүшигә вә уларниң әқил-параситини тәрәққий әткүзүшигә беғишланған оюнчуқларниң йетәрликлигиму һәркимни қайил қилиду. Ишәшлик ейтишқа болидуки, шәхсән өзимизниң тәҗрибисидин мәлумки, айрим балилар бағчилирида балиларниң арамхуда ойнап-күлүшигә шараит яр бәрмәйду. Һә, бу йәрдә болса, әң кичикләр үчүн алаһидә чирайлиқ безәлгән бөлмиләр худди «чөчәкләр дуниясини» әслитиду. Бағчә ечилип, униңға бала топлашниң, херидарларниң көңлидин чиқип, өзлириниң аброй-инавитини көтиришниң дәсләпки жиллири хелила қийинға чүшкини раст. Амма буниң һәммисигә бәрдашлиқ берип, коммунал хизмәтлирини өз пенсиясидин төләп, тутқан йолидин қайтмиған Һәмраҗан Мәңсүровниң бағчиси бийилдин башлап «Балапан» программиси даирисидә иш елип баридиған болди. «Дөләт тәрипидин қоюлидиған тәләпләрниң һәммисигә җавап бериду» дегән хуласә чиқарған коммисия йеқинда бағчида болуп, ахирқи чекитни қоюп кәтти. Демәк, әнди бу йәрдә хизмәт көрситиш техиму яхшилинип, балилар үчүн кәң спорт зали билән музыка вә уссул мәйданчиси ечилмақчи. Шуниң билән биллә, һойлидики гүлзарлиқтин орун алған бүглүктә ойнаватқан балиларға йеқинлаштуқ. Бағчә ғоҗайинини көргән уйғур балилири «Бу бизниң бовимиз» десә, өзгә милләт вәкиллири «Это наш бувака» дәп чуқирашти. Уларни көргән Һәмраҗан ака «Мана, ука, буларниң һәммиси мениң нәврилирим», деди мәғрурланған һалда. — Гөдәкләрни көрсәм, һадуғум чиқиду, — деди сөһбәтдишим. — Кейинки вақитларда уларсиз һаятимни тәсәввур қилалмайдиған дәриҗигә чүшүп қалдим. Сәһәр туруп, балилар кәлгичә һойла-арамни сүпүрүп-тазилап, уларни тәқәзалиқ билән күтимән. Тәрбийичиләрдин балилар билән мунасивәттә меһри-шәпқәтлик болушини қаттиқ тәләп қилимән. Пәрзәнтлирини бизниң бағчиға елип кәлгән ата-аниларниң, һеч пушайман қилмайдиғанлиғиға ишәнчим камил. Тәкитләш керәкки, Һәмраҗан Мәңсүров пәқәт бағчә ечип, бала тәрбийиләш биләнла шуғулланмайду. Шундақла мошу йезида яшаватқан жутдашлириға иш бәргүчи сүпитидә уларниң алқишиға сазавәр болғанларниң бири. Гәпара сөһбәтдишим һазирниң өзидә икки тәрбийичигә орун бар екәнлигини, дөләт программисиниң барлиқ рәсмийәтлири тоғриланғандин кейин йәнә бирнәччә хадимни ишқа елиш мүмкинчилигиниң туғулидиғанлиғини ейтти. Қисқиси, онға йеқин адәм әмгәк қиливатқан бағчида балилири тәрбийилиниватқан ата-анилар улардин бәк рази. Шуңлашқиму бу йәргә кәлгүчиләр сани күн санап өсүватиду. Төрт вақлиқ тамақ вә башқа хизмәт түрлири алий дәриҗидә. Төлинидиған һәқму унчивала жуқури әмәс. Демәк, Һәмраҗан Мәңсүров рәһбәрлик қиливатқан бағчә һөкүмәтниң қоллап-қувәтлиши арқилиқ келәчәктә техиму гүллинип, ишлириниң алға басидиғанлиғиға ишәнчимиз камил.