• Җәмийәтлик тәшкилатларда
• 11 Шілде, 2018

Хәшкиләңдә жигитбеши сайланди

Бәхтишат СОПИЕВ, «Уйғур авази» Қарасай наһийәсиниң Хәшкиләң шәһиридә йүздин ошуқ уйғур аилиси истиқамәт қилидекән. Бу һәққидә бизгә Қарасай наһийәлик Уйғур этномәдәнийәт мәркизиниң рәиси Айшәм Норузова ейтип бәрди. Шу учришишимизда у «Амма уларниң бешини қошидиған жигитбеши кам болуватиду» дегән еди гәпләрни ейтқан еди.Өткән һәптидә Қарасай наһийәсидә истиқамәт қилидиған уйғур җамаәтчилиги Хәшкиләң шәһиридики «Айша озеленение» ширкитиниң идарисидә жиғин өткүзүп, баш қошуп, ушбу вә башқиму мәсилиләр әтрапида мәслиһәтләшти. Бу баш қошушқа жумһурийәтлик Уйғур этномәдәнийәт мәркизи йенидики Жигитбашлири кеңиши рәисиниң вәзиписини вақитлиқ атқурғучи Ярмәһәммәт Кибиров, Қарасай наһийәсиниң баш жигитбеши Қасим Исрайилов иштрак қилди. Жиғин қатнашқучилири алди билән наһийәлик Уйғур этномәдәнийәт мәркизиниң атқурған ишлири вә иш-реҗилири билән тонушти. Андин тәшкилий мәсилә қарилип, җәмийәтлик ишларниң активистлири Гүлнара Абдуғапова, Гүлбанум Сулейманова вә Анаргүл Давлетова Хәшкиләң наһийәлик Уйғур этномәдәнийәт мәркизи рәисиниң орунбасарлири болуп сайланди. Баш қошушта наһийәниң баш жигитбеши Қасим Исрайилов Қарасай наһийәсидики уйғурларниң турмуш-тирикчилиги һәққидә қисқичә чүшәнчә бәрди. – Наһийәдики қериндашлиримизниң көпчилиги Қошмәмәт йезисида яшайду, – дәп сөзини давам қилди натиқ. – Һәр мәйрәмдә бешимиз қошулуп туриду. Әнди Хәшкиләңдики қериндашлиримизни бир йәргә жиғидиған жигитбеши йетишмәйватиду. Уйғурларда жигитбешисиз иш пүтмәйдиғини һәқиқәт. Өзимизму шуниңға үгинип қаптимиз. Шундақ қилип, көпчиликниң қоллап-қувәтлиши билән Хәшкиләң шәһириниң турғуни Рушидин Махмутов (сүрәттә солда) бир еғиздин жигитбеши болуп сайланди. Қарасай наһийәси