• Җәмийәтлик тәшкилатларда
  • 19 Шілде, 2018

Җан. Ана. Нан.

Бәхтишат СОПИЕВ, «Уйғур авази» Бу 2008-жилниң август ейи еди. Миллий мәдәнийитимизниң тәрәққияти үчүн пулини айимай чачқан байлиримиз бир пәс «тәнәпус» елан қилған пәйт. Шуниңдин кейин «сәһнигә» “бир қоли билән бөшүкни тәвәтсә, йәнә бир қоли билән аләмни тәвритидиған” анилар чиқти. Шу әснада бир топ ханим-қизлар пәқәт аяллардин тәркип тапқан хәйрихаһлиқ фонд тәшкил қилиду. Шу вақитта уни қандақ аташ тоғрилиқ һәрхил пикирләрму ейтилған екән. Ахири «Җан. Ана. Нан.» дегән нам көпчиликниң авазиға егә болиду. Бу фонд бүгүнки күндә «Жанан» дәп атилиду. Һазир униңға тонулған юрист, миллий мәдәнийитимизниң җанкөйәри Мизангүл АВАМИСИМОВА рәһбәрлик қилмақта.Анилар: «җандин, анидин, нандин улуқ нәрсә йоқ» дегән шиар астида иш башлайду. Дәсләп фондқа 14 аял әза болиду. Һазир уларниң йәттиси техичила «еғир жүкни» көтирип келиватиду. Улар: Турсунай Иминова, Модәнгүл Җүмәева, Гүлистан Һезмахунова, Рошәнгүл Махмутова, Парпийәм Йолдашева, Аминәм Ғәниева, Раһиләм Һосманова. Ханим-қизлар ишниң «бисмилласини» мәктәпләрдин башлайду. Уларниң әсли мәхситиму шундақ болған. Биринчи қетим улар Алмута шәһиридики А. Розибақиев намидики гимназияниң ашханисиға пәрдә елип бәргән екән. Бир қаримаққа анчә чоң соға әмәс. Амма мәктәп рәһбәрлиги аниларниң бу соғисидин бәк миннәтдар болди. Аниларниң 89-рус -уйғур мәктивигә компьютер ианә қилғинини униң сабиқ мудири Асийәм Йүсүпова мошу кәмгичә ейтип жүриду. Қазақстан Хәлиқ артисти Мәрийәм Семәтованиң хатирә кечиниму шулар уюштуриду. Балилар өйи билән нака балиларғиму ярдәм қолини суниду. – Бизниң паалийитимиздин хәвәр тапқандин кейин, наһийәләрдинму ярдәм сорайдиғанларму көпәйди, – дәйду Мизангүл Авамисимова. – Бәзиләр телефон қилип һалини ейтидиған болди. Ахири төрт- бәшимизгә бирнәччә йезини арилашқа тоғра кәлди. Уйғур наһийәсиниң Долата йезисида 1-4-синипларға дәрисликләр йетишмәйдекән. Бу әһвални өз көзүмиз билән көрдуқ. Ахири уларни керәк дәрисликләр билән тәминлидуқ. Қорам йезисидиму нәқ мошундақ әһвалға дуч кәлдуқ. Әмгәкчиқазақ наһийәсиниң Ғәйрәт йезисидики мәктәпниң бир синипиға ишик қоюп бәрдуқ. Мундақ вақиәләрму болуп туриду. Яркәнттики мону бир учришиш задила ядимдин кәтмәйду. Әву бир жили Садир мәктивигә йолумиз чүшүп қалди. Бизниң паалийитимиздин хәвәрдар болған мәктәпниң илмий мудири: «мәктәпкә кона орундуқ болсиму елип берәләмсиләр?» дәп илтимас қилди. Анилар баш қошуп бу мәсилиниму иҗабий һәл қилдуқ. Техи йеқиндила Алмутидики бир мәктәпниң сәнъәт һәвәскарлириға миллий кийимләрни соға қилдуқ. Һазир улар шәһәр бойичә һәрхил мәрасимларға паал қатнишип келиватиду. Уларниң сепиму өсүпту. Буни көрүп хошал болдуқ. Демәк, қиливатқан ишимиз өз мевисини бериватиду. Бәзидә “әгәр миллий мәктәплиримиздики дәрисликләрниң йетишмәслиги вә башқиму проблемиларниң йешилишигә ат селишидиған болсақ, уйғур синипиға бала топлап аварә болмаймизмекин” дегән ойғиму келимән.. Йошуридиғини йоқки, муһтаҗларға қолимиздин келидиған ярдимимизни айимаймиз. Жилиға икки адәмгә турақлиқ мәбләғ аҗритимиз. Булту Алмутида колледжда оқуватқан икки қизниң айиғиға өтүк елип бәрдуқ. Бәзидә биздин айрим фондларму ярдәм сорайду. Мәсилән, «Уйғур мәктәплирини қоллап-қувәтләш» җәмийәтлик фонди тәрипидин уюштурулуватқан «Билим» фестивалиниң Баш мукапити – Гран-при бизниң зиммимиздә. Нахшичи Мурат Насиров намидики конкурсниң баш һамийи болдуқ. Ахирқи вақитларда җумһурийәтлик Уйғур этномәдәнийәт мәркизигиму маддий җәһәттин йеқиндин яр-йөләк болуватимиз. Мана техи йеқиндила бир топ яш шаирларниң «Арзу булақлири» намлиқ китавиниң йоруқ көрүшигә ярдәм қилдуқ. Мундақ мисаллар наһайити көп. Бу гәпләрниң һәммисини махтиниш үчүн әмәс, бәлки көпчилик аңлап қалсун, дегән нийәттә ейтиватимән. Мошу йәрдә «Пулни нәдин алисиләр?» дегән соалниң туғулуши тәбиий. Биз байларниң аяллири яки бай аяллардин әмәс. Азду-тола тапқан-тәргинимизни миллитимизниң пайдисиға ишлитишни өзимизниң муқәддәс борчи дәп чүшинимиз. – Мәнму шуни сорай девидим, пулни нәдин алисиләр? – Бу коммерциялиқ сир. Һәр айда жиғидиған әзалиқ бәдилимиз бар. Униң көләмини ейтмаяқ қояй. Бәзи һәдилиримиз пенсия пулини әкелип оттуриға ташлайду. Әйнә шундақ аниларниң бири – султанқорғанлиқ Шәмшинур Һаҗим Қурбанова еди. Қошақчи аял болидиған. Көпчиликкә роһий озуқму берәтти. Әпсус, у һазир аримизда йоқ. «Җананлар» жиғилған мәбләғни һәқиқәтәнму муһтаҗларға ишлитиду. Чәттин һеч қачан пул алмайдекән. Һазир фонд әзалириниң сани – рәисни қошуп һесаплиғанда, 17. Жуқурида исми аталғанларниң қатаридин Бостангүл Ғазиева, Меһрибан Сабитова, Зорәм Султанова, Эльмира Тейипова, Тамара Сайдимова, Җәннәтбүви Сидиқова, Ильмира Курбанова, Ипархан Нурахунова, Мубарәк Турдиева охшаш миллий мәдәнийитимиз җанкөйәрлирини учритишқа болиду. Фондқа әза болуш хаһишини билдүрүватқанларму көп охшайду. Амма ахирқи вақитларда фондниң низамнамисиға хелә өзгиришләр киргүзүлүпту. Униңдики мону бир пунктму диққәткә сазавәр: фондқа әзалиққа киришкә болмайду, чиқип кәткүчиләргә һәр дайим ишик очуқ. Амма «җананлар» бир-биригә яр-йөләк болуп, он жилдин буян бир-бирини ташлимай паалийитини қизғин давамлаштуруватиду.

971 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы