• Җәмийәтлик тәшкилатларда
• 19 Шілде, 2018

Тийинни тийинсиз ясашқиму болидекән

Насирахун РОЗАХУНОВ, «Уйғур авази». Биз гезитимизниң өткән санида Алмутидики «Атакент» иш бабидики һәмкарлиқ мәркизи алдида егизлиги 13 метрлиқ тийин инсталяциясиниң орнитилғанлиғи тоғрилиқ хәвәр қилған едуқ. Мәзкүр объектниң ечилиши шәһәр аһалиси арисида, болупму Интернет сәһипилиридә һәрхил пикирләрни пәйда қилди. Буниңға тийин тәсвириниң шәһәр мәркизидә қәд көтүрүши әмәс, униңға сәрип қилинған ахча миқдари аһали арисида чүшәнмәсликләрни туғдурди.Йеқинда студент-яшларниң тәшәббуси вә күч чиқириши билән Алмута вилайитидә «Атакент» иш бабидики һәмкарлиқ мәркизиниң алдиға орнитилған тийинниң көчүрмиси ясилип, амма диққитигә һавалә қилинди. Уларниң пәрқи — кейинки тийин үчүн бир тәңгиму хәшләнмигәнлигидә. – Биз, йеза егилиги пәнлириниң яш алимлири вә Қазақ миллий аграрлиқ университетиниң студентлири, силәрни Етиз күнигә тәклип қилимиз. Бизгә һәқсиз саман елиш имканийитини яратқан «Каскелен» агропарки хадимлири билән бирликтә мана мошундақ йеқимлиқ тийинни ясап чиқтуқ, – дәп билдүрди лайиһәгә қатнашқан студентларниң бири. Тәкитләш лазимки, студентларниң бу әмгиги Интернет сәһипилиридә мунасип баһаға еришти. Уларда: «Ярайсиләр жигитләр! Әҗайип бопту! Биздә һәқиқәтәнму пүткүл әл-Фараби проспектини саман тийинлар билән толтурувәткидәк саман бар», «Дәсләпки тийинға кәткән ахчини студентларға бәргиниңлар тоғра болар еди» дегәнгә охшаш изаһларни оқушқа болиду.