• Җәмийәтлик тәшкилатларда
• 02 Тамыз, 2018

Әвезов наһийәсидә – йеңи баш жигитбеши

Мәшүр САСИҚОВ, «Уйғур авази» Йеқинда Алмута шәһиридики «Яшар» кафесида Әвезов наһийәлик жигитбешиниң һесават-сайлам жиғини болуп өтти. Униңға мәзкүр наһийәдики мәһәллиләрниң барлиқ жигитбашлири қатнашти. Жиғинниң күн тәртивидики асасий мәсилә бойичә наһийәниң баш жигитбеши Инәмҗан Худайбәрдиев һесават бәрди. У өз сөзидә атқурулған ишларға тохтилип, өзиниң саламәтлигигә бола, хизмитини яшларға тапшуруп бериш нийити бар екәнлигини йәткүзди. Шу түпәйли көпчилик тәрипидин Әвезов наһийәсиниң жигитбашлиғиға икки шәхс, йәни Бурһандин Таҗидинов (сүрәттә) билән Абдухелил Бавдиновниң намзитини көрситилди.Бурһандин Таҗидиновниң намзитини көрсәткән «Ақсай», «Таугуль», «Мамыр» вә «Жетису» микрорайонлириниң жигитбашлири Аюпҗан Тайиров, Әзиз Мунаров, Фарух Иминов билән Марат Қаватовлар униң маһир тәшкилатчи екәнлигини алаһидә тилға елип, һәрқандақ җавапкәр вәзипиләрниң һөддисидин чиқалайду, дегән пикирни алға сүрди. Әнди 12-микрорайон турғунлири намидин сөзгә чиққан Турған Гайитов болса, наһийәлик жигитбеши хизмитигә Абдухелил Бавдиновни тәвсийә қилди. Өз новитидә, Абдухелил Бавдинов көпчиликниң ишәнчисигә миннәтдарлиғини билдүрүп, хәлиқ билән ишләштә бай тәҗрибигә егә Бурһандин Таҗидиновниң лайиқ екәнлигини тәкитләп, өзиниң намзитини елип ташлашни илтимас қилди. Жиғин давамида сабиқ жигитбеши Бурһандин Таҗидиновни өзиниң шагирти дәп һесаплайдиғанлиғини һәм униң бу вәзипә һөддисидин бемалал чиқалайдиғанлиғини ейтип, көпчиликни униң намзитини қоллап-қувәтләшкә чақирди. Шундақ қилип, көпчиликниң бесим аваз бериши нәтиҗисидә Бурһандин Таҗидинов Әвезов наһийәсиниң баш жигитбеши болуп сайланди. Йеңи жигитбеши өзигә жүкләнгән бу ишәнчини имканийәтниң яр беришичә, ақлайдиғанлиғини ейтип, уларға миннәтдарлиғини билдүрди. Андин жиғинниң күн тәртивидики башқиму мәсилиләр муһакимә қилинип, ҖУЭМ йенидики Жигитбашлири кеңиши рәисиниң вәзиписини вақитлиқ атқурғучи Ярмәһәмәт Кибиров, мөтивәр Сабирҗан Ғаппаров вә Алмута шәһириниң баш жигитбеши Сабит һаҗим Йүсүпов миллий мәтбуатимиз тоғрисида сөз қозғап, муштирилар санини көпәйтиш һәққидә өз ой-пикирлирини оттуриға салди. Шундақла натиқлар уйғур мәктәплириниң бүгүнки тәғдири, ана тилимизни, миллий мәдәнийитимиз билән сәнъитимизни сақлап қелишниң муһим екәнлигини алаһидә тәкитләп өтти.