• Җәмийәтлик тәшкилатларда
• 26 Қыркүйек, 2018

«Бизгә пәқәт бирлик вә өмлүк һаҗәт»

Мәшүр САСИҚОВ, «Уйғур авази» Өткән һәптидә Талғир наһийәсиниң Қизил Ғәйрәт йезисидики «У Березки» кафесида мәзкүр наһийәдики йезиларниң жигитбашлири, мәдәнийәт мәркәзлириниң рәислири билән ханим-қизлар кеңәшлириниң әзалири баш қошқан жиғин болуп өтти. Униңға җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Ярмуһәммәт Кибиров вә җумһурийәтлик «Уйғур авази» гезитиниң баш муһәррири Ершат Әсмәтов меһман сүпитидә қатнашти. Баш қошушниң рәсмий қисмида Талғир наһийәлик Уйғур этномәдәнийәт мәркизиниң рәиси Иминҗан Тохтахунов көпчиликни бүгүнки жиғинниң мәхсәт-муддиаси билән тонуштуруп, униңда асасән миллий маарип, ана тилимизда йоруқ көридиған нәширләргә муштири топлаш һәм Уйғур театриниң абонементлирини тарқитиш бойичә мәсилиләр қарилидиғанлиғини йәткүзди. Шундақла у бийил Қизил Ғәйрәт йезисидики оттура мәктәптә уйғур синипини сақлап қелишқа аянмай күч чиқарған бирқатар шәхсләргә миннәтдарлиқ билдүрүп, келәчәктә һәммимиз әйнә шу милләтпәрвәр инсанлар кәби «бир йәңдин қол, бир яқидин баш чиқирип» һәрикәт қилсақ, йешилмәйдиған мәсилә йоқ екәнлигини алаһидә тәкитлиди. Андин сөз новитини алған Ершат Моллахун оғли Талғир наһийәсиниң активистлири барлиқ җәһәттин башқиларға үлгә болуватқанлиғини тилға алғач, өткән жили муштири топлаш мәвсүмидә уларниң алдинқи қатардин көрүнгәнлигини вә бу жигитбашлири билән бирликтә тинимсиз әмгәк қиливатқан ханим-қизларниң әҗри екәнлигини жуқури баһалиди. Шуниң билән биллә натиқ көпчиликни хәлқимиз арисида бирлигигә дәхил йәткүзүватқан айрим һәрикәтләрдин еһтият қилиш лазимлиғи һәққидә әскәртти. У болупму иҗтимаий торларда йүз бериватқан орунсиз илләтләрниң бизниң миллитимизгә ят екәнлигини вә уларни ойлап тепиватқанлар бизниң достлиримиз әмәслигини әмәлий мисаллар арқилиқ чүшәндүрүп өтти. Андин Ярмуһәммәт Кибиров сөз елип, җамаәтчилик билән ишләшниң нәқәдәр қийин екәнлигигә қаримай, «жутум», «хәлқим» вә «миллитим» дәп ат чепип жүргән наһийә активистлириға тәшәккүр изһар қилған һалда, кәлгүсидиму ана тилимизни вә мәдәнийитимизни сақлап қелиш үчүн атқурулидиған ишларниң йетип- ашидиғанлиғини ейтти һәм мошу җәриянда һәммимиздин сәвир-тақәтлик, һәрқандақ мәсилидә әтраплиқ ой-пикир қилиш тәләп қилинидиғанлиғини тәкитлиди. Натиқ шундақла бийил җумһурийәт бойичә уйғуртиллиқ синипларға бала топлаш ишлири сәл кечикип башлинип, униңда бирмунчә камчилиқларға йол қоюлғанлиғини ечиниш илкидә йәткүзди вә келәр жили бу хаталиқларни чоқум рәткә селинидиғанлиғиға ишәнчә билдүрди. Мошундақ муһим мәсилиләр қаралған баш қошуш давамида сөз алған бирқатар шәхсләр, җүмлидин Талғир наһийәсиниң баш жигитбеши Октябрь Қурбанниязов, Туздыбастав йезисиниң баш жигитбеши Турғанҗан Вахяров, Бесағаш йезисиниң баш жигитбеши Әхмәтҗан Ахмоллаев, Қизил Ғәйрәт йезилиқ Ханим-қизлар кеңишиниң рәиси Гүлбанәм Бақиева вә башқилар җәмийәтлик ишларниң утуқлуқ болуши үчүн пәқәт инақлиқ билән өмлүк һаҗәт дегән пикирни алға сүрди. Тәкитләш лазимки, бу күни Җумһурийәтлик Уйғур этномәдәнийәт мәркизи йенидики Спорт комитетиниң рәиси Әкрәм Нурдунов сөз елип, уйғур яшлири арисида өткүзүлүватқан спорт мусабиқилиригә һамийлиқ қиливатқан бирқатар сахавәтлик яшларниң исмини атап, уларни көпчиликкә тонуштурди. Шундақла у наһийәдики яшларниң жигитбешини сайлаш мәсилисини көтирип, Зумрат Сасиқовниң намзитини шу орунға лайиқ дәп көрсәтти. Андин униң қисқичә паалийитидин әхбарат берилгәндин кейин Зумрат Сасиқов көпчиликниң очуқ аваз бериши билән Талғир наһийәлик Уйғур этномәдәнийәт мәркизи йенидики яшлар кеңишиниң рәиси болуп сайланди. Икки саатқа созулған вә бәс-муназириләргә толған баш қошушқа иштрак қилған ханим-қизларму айрим мәсилиләргә бағлиқ пикирлирини оттуриға селип, бәзи чағларда униңсизму «рәхмити йоқ» җамаәтчилик ишлирида көңүлсизликләргә дуч келиватқанлиғини ейтти. Шуниңға қаримай, улар хәлқиниң хизмитидә жүргәнлигигә һәргиз өкүнмәйдиғанлиғини тилға алди. Мәсилән, Бесағаш йезилиқ ханим-қизлар кеңишиниң әзаси Зәйнәпбүви Аблизова көпчиликкә мураҗиәт қилип, мундақ деди: – Һөрмәтлик жиғин қатнашқучилири, силәр биз үчүн үнчә-марҗан һесаплинидиған инсанлар. Һәрбириңларниң җәмийитимиздә өзәңларға лайиқ орнуңлар бар. Жуқурида наһайити орунлуқ пикирләр ейтилди. Шуларниң арисида мениң көңлүмгә яққини, биз бирлигимизгә дәхил йәткүзидиған һәрикәтләрдин еһтият қилишимиз керәк. Әгәр үнчә-марҗанлиримиз чечилип кәтсә, уни жиғивелишниң нәқәдәр қийинға тохтайдиғанлиғи һәққидә унтимайли. Шуңлашқа ана тилимизни, мәктәплиримизни вә гезит-журналлиримиз билән йеганә театримизни сақлап қалимиз дәйдекәнмиз, бизгә биринчи новәттә бирлик вә өмлүк һаҗәт. Әнди аяллар тоғрилиқ сөз қозғалса, силәрдә бизни “дайим чай ойнап жүриду”, дегән чүшәнчә қелиплишип қалди. Шәхсән мән буниңға тамамән қошулмаймән. Чүнки биз шу чайлардиму бүгүн мошу йәрдә көтирилгән мәсилиләр тоғрилиқ гәп қилимиз. Мәсилән, «Уйғур авазиға» йезилмиған достумизға «әндики чайға кәлмәң» дәп қәтъий ейталаймиз. Умумән, жут активистлириға йеңи тапшурма, күч-қувәт вә алаһидә роһ бәргән баш қошушниң хуласисини Иминҗан Тохтахунов чиқирип, көпчиликни әвәтилгән камчилиқлардин савақ алған һалда йеңичә ишләшкә чақирди. Талғир наһийәси.