• Җәмийәтлик тәшкилатларда
  • 22 Қараша, 2018

Шәһәрдә – йеңи шөбә, вилайәттә – йеңи рәис

Йеқинда Алмута шәһиридики «Достлуқ өйидә» җумһурийәтлик Уйғур этномәдәнийәт мәркизиниң кәңәйтилгән мәҗлиси өтти. Униңға ЖУЭМниң Уйғур, Әмгәкчиқазақ, Талғир, Қарасай, Или наһийәлиридики шөбилиридин вәкилләр, Алмутидики бирқатар жутлардики җәмийәтлик ишларниң активистлири вә зияли әһли қатнашти. Бәхтишат СОПИЕВ, «Уйғур авази» Баш қошушни киришмә сөз билән ачқан җумһурийәтлик Уйғур этномәдәнийәт мәркизиниң рәиси, Қазақстан Җумһурийити Мәҗлисиниң депутати Шаһимәрдан Нурумов техи йәқиндила Дөләт рәһбириниң новәттики Мәктүбини тәшвиқат-тәрғибат қилиш мәхситидә бирқатар вилайәт вә наһийәләрни арилап қайтқанлиғини тилға алди. – Әлвәттә, барған йеримиздә Қазақстан хәлқи Ассамблеясиниң, уйғур этномәдәнийәт мәркизиниңму гепини қиливатимиз, – деди натиқ. – Чүнки Президент һәр Мәктүбидә «елимиздики хәлиқләр достлуғи билән бирлиги — бизниң әң чоң байлиғимиз» дәп ейтип келиватиду. Биз милләтләрара достлуқни мустәһкәмләш мәхситидә көп ишларни әмәлгә ашуруватимиз вә келәчәктиму бу һәрикитимизни давам қилимиз. Өзәңларға мәлум, җумһурийәтлик Уйғур этномәдәнийәт мәркизиниң көплигән вилайәт вә наһийәләрдә шөбилири моҗут. Шуларниң бири елимиз пайтәхти Астана шәһиридә паалийәт елип бериватиду. Миллитимиз вәкиллириниң көпчилиги Алмута вилайитидә вә Алмута шәһиридә яшайду. Мәркәзниң ишини техиму җанландуруш мәхситидә Алмутида ҖУЭМниң шәһәрлик шөбисини қурмақчимиз. Чүнки елимизниң илмий-мәдәний мәркизи болған җәнубий пайтәхттә яшайдиған уйғурларниң җәмийәттики орни алаһидә. Бу тәшәббусимиз Қазақстан хәлқи Ассамблеяси вә Алмута шәһәрлик ҚХА кативати тәрипидин қоллап-қувәтләшкә егә болди. Шундақ қилип, исми җумһурийәткә тонулған хирург Әбәйдуллам Җаппаров бир еғиздин ҖУЭМниң Алмута шәһәрлик шөбисиниң рәиси болуп сайланди. Униң орунбасарлиғиға тәвсийә қилинған Алмута шәһири бойичә баш жигитбеши Сабит һаҗим Йүсүпов, «MetallPromGroup» җавапкәрлиги чәкләнгән йолдашлиғиниң мудири, тонулған меценат Долқунтай Абдухелил, Қазақстан уйғур яшлири бирлигиниң рәиси Рустәм Хәйриевларниң намзитини жиғин қатнашчилири толуғи билән қоллап-қувәтләйдиғанлиғини билдүрди. Шундақла ханим-қизлар кеңишигә тиҗарәтчи Модәнгүл Җүмәева, Яшлар кеңишигә болса, Рустәм Хәйриев рәһбәрлик қилидиған болди. Йеңидин қурулған шөбиниң паалийитигә муваппәқийәтләр тилигән Шаһимәрдан Үсәйин оғли көпчиликни йеқинда ҖУЭМ бюросиниң мәҗлисидә Алмута вилайәтлик Уйғур этномәдәнийәт мәркизигә ҖУЭМниң башқарма әзаси Алмута вилайәтлик мәслиһәтниң депутати Закир Кузиевниң сайланғанлиғидин хәвәрдар қилди. Новәттә сөзгә чиққан ҚХА Алмута шәһәрлик Кативатиниң рәһбири Назар Балғимбаев, ҖУЭМниң паалийитигә өзиниң иҗабий баһасини берип: – Йеңи қурулған шөбиниң ишиға пәқәт утуқ тиләймән, – дәп сөзини давам қилди. – Мән ҖУЭМ билән ишләватқинимға көп вақит болди. Бүгүнки күндә ҖУЭМ Президент Мәктүбини тәшвиқат қилишта, хәлиқләр достлуғини мустәһкәмләштә көп ишларни атқуруватиду. Уларниң йеңидин қәдәм басқан шөбиниң ишини җанландуридиғанлиғиға ишәнчим камил. Шуниңдин кейин сөзгә чиққан 153-мәктәп-гимназияниң мудири, Алмута шәһәрлик мәслиһәтниң депутати Шавкәт Өмәров. «Туран дунияси» җәмийәтлик фондиниң мудири Карлин Мәхпиров, ҖУЭМ йенидики Жигитбашлири кеңишиниң рәиси Ярмәһәмәт Кибиров көпчиликни уйғурлар һаятиға мунасивәтлик бу тарихий вақиә билән сәмимий тәбрикләп, ҖУЭМниң Алмута шәһәрлик вә Алмута вилайәтлик шөбилириниң паалийитигә утуқ тилиди.   Закирҗан КУЗИЕВ 1969-жили Алмута шәһиридә туғулди. 1987-жили 16-кәспий-техникилиқ-училищени тамамлиди. Әмгәк паалийитини 1990-жили «Ремстройтехника» мәһкимисидә башлиди. Андин кейин «Четыре и К» кичик ишләпчиқириш коммерциялик карханисида, «Единство» кичик дөләт карханисида, «Назугум» кичик хусусий карханисида һәрхил лавазимларда ишлиди. Һәрхил жилларда «Универсал» АҖниң президенти, «Универсал» ЙАҖниң мудири, баш мудири, «БеНТ-Анак» бирләшкән карханисиниң баш мудири, «Яркәнт крахмал-ширнә заводи» ҖЧЙниң баш мудири, «Универсал» ҖЧЙниң Президенти, баш мудирниң мәслиһәтчиси, «Яркәнт крахмал-ширнә заводи» ҖЧЙ Мудирлар кеңиши башқармисиниң, «Универсал» ҖЧЙниң рәиси болуп сайланди. Әқлий мүлүк объекти болған 30ға йеқин кәшпиятниң муәллипи. «Ерен еңбегі үшін» медали билән мукапатланди. Алмута вилайәтлик мәслиһәтниң депутати. Қазақстан хәлқи Ассамблеясиниң әзаси. Әбәйдуллам ҖАППАРОВ 1950-жили Әмгәкчиқазақ наһийәсиниң Қорам йезисида туғулған. 1976-жили Алмута дөләт медицина институтиниң стоматология факультетини тамамлиған. Һазир 5-шәһәрлик клиникилиқ ағриқхана Иңәк-үз хирургияси бөлүминиң башлиғи. Медицина пәнлириниң намзити, доцент. Алий категориялик врач. Медицина пәнлиринң намзити Әбәйдуллам Җаппаров он сәккиз жилдин буян педагогикилиқ паалийәт биләнму шуғулланмақта. У 100дин ошуқ илмий мақалиниң, 2 монографияниң, 8 медицинилиқ оқуш қуралиниң, 14 кәшпиятниң, 20дин ошуқ рационализаторлуқ тәклипниң муәллипи. Бирнәччә қетим Саламәтликни сақлаш министрлигиниң вә шәһәрлик саламәтликни сақлаш бөлүминиң пәхрий ярлиқлири билән тәғдирләнди. Хәлиқара «Алтун медаль «Алтун скальпель» мукапитиниң саһиби. «Қазақстан алимлириниң алтун фонди» қамусиға киргүзүлди. Саламәтликни сақлаш министрлигиниң «Қазақстан Республикасы денсаулық сақтау ісінің үздігі» бәлгүси, Қазақстан хәлқи Ассамблеясиниң «Бірлік» алтун медали билән мукапатланған.

1017 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы