• Хәйрихаһлиқ
• 09 Қаңтар, 2019

“Йеқиниңға ярдәм қил!”

Рашидәм МИРЗӘХМӘТОВА, «Уйғур авази» Җумһурийәтлик Уйғур этномәдәнийәт мәркизи йенидики ҚУЯБ яшлар тәшкилати «ИНСАН» хәйрихаһлиқ җәмийити билән бирликтә бу йеңи акцияни Талғир наһийәсиниң Гүлдала йезисидин башлиди. “Немишкә йезидин?” дегән соалимизға «ИНСАН» хәйрихаһлиқ фондиниң рәиси Дәвран Илиевтин төвәндики җавапни алдуқ: Йеңи жил һарписида у йәрдә исмини аташни халимиған бир сахавәтлик анимизниң күч чиқириши билән «Анилар өйи» барлиққа кәпту. Бу йәрдә сәккиз аилә истиқамәт қилидекән. Пәқәт анилар. Балиларниң умумий сани 25. Һәрбир аилиниң тәғдири һәрхил. Бирлири атисидин бевақит айрилип қалған. Айримлирини атиси ташлап кәткән. Амма у күни мундақ йеқимсиз гәпләр аз болуп, толирақ балиларниң көңлини елишқа тириштуқ. Әсли мәхситимизму шу еди. Балиларниң һүнәрлирини намайиш қилғандин кейин уларға атап елип кәлгән соғилиримизни тапшурдуқ. Улар бизгә, өз новитидә, мошундақ йоған өйни селип бәргән анимизға рәхмитини һәм салимини ейтти. *** Шу күни ҚУЯБ билән “ИНСАНниң” әтрапиға топланған меһир-сахавәтлик яшлар Тәшкәнсаз йезисиға қарап йол туттуқ. У йәрдә мүмкинчилиги чәкләнгән 15 балиниң өйлиригә берип, уларға соғиларни тәғдим қилдуқ. Балилар билән болған учришишлардин алған тәсиратлиримизни ейтип түгәткүсиз. Уларниң һаятқа болған көзқариши, интилиши, тиришчанлиғи бизни қайил қилди. Пурсәттин пайдилинип, бизгә йеқиндин ярдәм қилған тәшкәнсазлиқ Гүлнисәм Исламова билән Ризвангүл Азнибақиеваға миннәтдарлиғимизни изһар қилимиз. Шундақла келәчәктә бизниң мошундақ «Йеқиниңға ярдәм қил!» намлиқ акциясигә қатнишишқа хаһиши бар яшларға ишигимиз дайим очуқ. Халиғучилар @kuyab _kz вә @іnsan _molodezh инстаграмм тор бәтлири арқилиқ хәт язса болиду.