• Җәмийәтлик тәшкилатларда
• 06 Ақпан, 2019

Мәркәз рәиси сайланди

Шәмшидин АЮПОВ, «Уйғур авази» Сешәнбә күни Алмута шәһиридики 6-Оқуғучилар өйидә Алмута шәһәрлик Уйғур этномәдәнийәт мәркизиниң новәттин ташқири сайлам конференцияси болуп өтти. Күн тәртивидики мәсилиләр – Алмута шәһәрлик Уйғур этномәдәнийәт мәркизиниң йеңи рәисини вә униң орунбасарлири билән башқарма әзалирини сайлаш һәм мәркәз низамнамисиға өзгиришләрни киргүзүш. Конференция башлиништин авал ҖУЭМ 2011-жилқи паалийити әкис етилгән видеоролик көрситилди. Шуниңдин кейин минбәргә көтирилгән ҖУЭМниң Пәхрий рәиси, ҚХА әзаси Әхмәтҗан Шардинов мәзкүр баш қошушниң асасий мәхситини чүшәндүргәч, конференция қатнашқучилириға буниңдин қириқ күн илгири дуниядин өткән Алмута шәһәрлик Уйғур этномәдәнийәт мәркизиниң рәиси, ҚХА әзаси Абдуллам Һошуровни әскә елип, бир минут сүкүт сақлашни илтимас қилди. Андин у көпчиликкә мандат вә санақ комиссияси, кативат һәм президиум әзалириниң тәркивини елан қилип, уларни очуқ авазға салди. Андин минбәргә Алмута шәһәрлик Уйғур этномәдәнийәт мәркизи рәисиниң орунбасари Маһинур Исрайилова, филология пәнлириниң доктори, профессор Алимҗан Тиливалди, Алмута шәһәрлик мәслиһәтниң депутати Шавкәт Өмәров, «Инайәт» ассоциациясиниң рәиси Сүлһи Мәшрәпов, хәлиқара спорт маһири Гафур Тохтиев көтирилип, өз сөзидә җәмийәтлик тәшкилатларниң роли, улар атқурушқа тегишлик ишлар тоғрилиқ тохтилип өткәч, Алмута шәһәрлик Уйғур этномәдәнийәт мәркизиниң ролиниң алаһидә һәм атқурған ишлириниң тилға аларлиқ екәнлигини тәкитлиди. Шундақла мәзкүр тәшкилатни он үч жил башқурған Абдуллам Һошуровниң иш-паалийитигә иҗабий баһасини берип, күн тәртивидики мәсилиләр бойичә өз ой-пикирлири билән ортақлашти. Конференция давами АШУЭМниң 52 адәмдин тәркип тапқан башқарма әзалирини сайлаш мәсилисигә улашти. Баш қошуш тизгинини қолға алған Әхмәтҗан Шардинов мәркәз рәиси лавазимиға үч салаһийәтлик шәхсниң – Алмута шәһәрлик Уйғур этномәдәнийәт мәркизиниң башқарма әзалири Һосманҗан Обуловниң, Маһинур Исрайилованиң, Мурат Хизмәтовниң намзити көрситилгәнлигини ейтти. Көрситилгән намзатларниң ичидә Маһинур Исрайилова билән Мурат Хизмәтов өзлириниң намзитини еливетишни илтимас қилди. Нәтиҗидә очуқ аваз бериш арқилиқ Түрксиб наһийәлик Уйғур этномәдәнийәт мәркизиниң рәиси Һосманҗан Обулов бир еғиздин Алмута шәһәрлик Уйғур этномәдәнийәт мәркизиниң рәиси болуп сайланди. Йеңи рәис өзиниң нутқида шәһәрлик мәдәнийәт мәркизиниң кәлгүси паалийити, иш-реҗилири һәққидә тохтилип, мәзкүр җәмийәтлик тәшкилатниң җумһурийәтлик Уйғур этномәдәнийәт мәркизи вә башқа тәшкилатлар билән бирлишип паалийәт елип баридиғанлиғини алаһидә тәкитлиди. Шуниңдин кейин авазға селиш арқилиқ Алмута шәһәрлик Уйғур этномәдәнийәт мәркизи рәисиниң алтә орунбасари сайланди. Конференциягә Алмута шәһәрлик ҚХА рәисиниң орунбасари Казбек Мансуров, Алмута шәһәрлик ҚХА Кативатиниң рәһбири Назар Балғимбаев қатнашти.