• Йеңилиқлар
  • 06 Ақпан, 2012

Йеңилиниш Мәктүби

Бәрикәт-бирлигимиздин айримисун

Тараз шәһиридики Достлуқ өйидә Махмут Қәшқәрий намидики Җамбул вилайәтлик Уйғур этномәдәнийәт мәркизиниң әзалири елимиз Президенти — Милләт Лидери Нурсултан Әбиш оғли Назарбаевниң Қазақстан хәлқигә йоллиған әнъәнивий Мәктүбини зор ихлас билән тиңшиди. Униңда илгири сүрүлгән он асасий йөнилиштики вәзипиләр көпчилигимиздә чоңқур қанаәтлиниш туйғулирини ойғитип, көңлимиздин чиқти. Дөләт рәһбири бу қетим өткән жигирмә жил җәриянида қол йәткүзгән утуқлиримизни тәһлил қилған һалда, йеңи йөнилишләрни илгири сүрди. Әгәр униңдики вәзипиләрни әмәлгә ашуридиған болсақ, йеңи мунасивәтләр, йеңи көз қарашлар шәкиллинидиғанлиғи шүбһисиз. Ойлаймизки, әнди йеңи Парламент йеңиланған Һөкүмәт билән зич һәмкарлишип, Президент жүклигән вәзипиләрни һәл қилиду. Мәктүптә ишчиларниң, яшларниң, пенсионерларниң мәнпийәтлири инавәткә елинған. Мәсилән, униңда тәкитләнгинидәк, яшларни турушлуқ өй билән тәминләшниң бүгүнки таңда қанчилик муһим әһмийәткә егә екәнлигини ейтмисақму чүшинишлик. Йеза фермерлири үчүн несийә бериш, иш билән тәминләш мәсилилириму бийилқи Мәктүптә өз ипадисини тапқан. Умумән, Мәктүп җәмийитимизниң иҗтимаий-ихтисадий, мәдәний, сәясий вә башқа саһалирини толуқ өз ичигә алди. Новәттә биз Мәктүптә илгири сүрүлгән он йөнилиштики вәзипиләрни хәлиққә чүшәндүрүшимиз керәк. Әйнә шу чағдила хәлиқ өзигә яритиливатқан мүмкинчиликләр тоғрилиқ ениқ билидиған болиду. Җәмләп ейтқанда, Мәктүптә шундақла хәлиқләр достлуғи билән милләтләр ара разимәнлик вә униң әһмийити тоғрилиқ алаһидә қәйт қилинди. Ихтисадий тәрәққиятқа роһий разимәнлик билән милләтләр ара достлуқ әң муһим тирәк, дәп ойлаймән. Шуңлашқа Алла таала разимәнлигимиз билән бәрикәт-бирлигимиздин айримисун!

Муһәббәт ТУРДИЕВА,

М.Қәшқәрий намидики Җамбул вилайәтлик Уйғур этномәдәнийәт мәркизиниң рәиси, Қазақстан хәлқи Ассамблеясиниң әзаси.

Тараз шәһири.  

Тәрәққиятимизниң муһим йөнилишлири

Дөләт рәһбири — Милләт Лидери Нурсултан Назарбаевниң Қазақстан хәлқигә йоллаватқан әнъәнивий Мәктүплириниң һәр қайсиси өзиниң һаятий әһмийәткә егә екәнлиги вә актуаллиғи билән пәриқлиниду. Мустәқилликниң жигирмә жиллиғиниң хатимиси сүпитидә бийил йоллиған Мәктүбиму риваҗлинишимизниң асасий йөнилишлирини ениқлап бәргәнлиги билән қиммәтлик. Қазақстанниң иҗтимаий-ихтисадий тәрәққиятиниң сүръитини йәниму чапсанлитиш мәхситидә он асасий йөнилиштики вәзипиләр илгири сүрүлүп, җумһурийәтниң һәр бир пухрасида чоңқур қанаәтлиниш туйғулирини ойғатқанлиғида шәк йоқ. Өзәм шәхсий дехан егилигиниң рәһбири сүпитидә хелә жиллардин бери йеза егилиги саһасида паалийәт елип бериватимән. Қармиғимдики оттуз гектар йәрдә көмүқонақ өстүрүш билән шуғуллинимән. Өткән жили һәр бир гектардин оттуз центнердин таза дан елинди. Раст, херидарларниң азлиғидин баһаниң мәлум дәриҗидә адәттикидин төвән болғанлиғиниму йошурушниң һаҗити йоқ. Президент бийилқи Мәктүбидә йеза егилиги саһасиға әтраплиқ тохталған һалда: «Һөкүмәткә дәллалларсиз парчилап сетишни дөләт тәрипидин қоллап-қувәтләш механизмини ишләп чиқишни вә җарий қилишни тапшуримән. Дөләт ашлиқ саһасини уюштуруши вә структуризациялиши, бир пүтүн ашлиқ холдингини вуҗутқа кәлтүрүши зөрүр», дәп алаһидә қәйт қилди. Дөләт рәһбириниң йеза егилигини риваҗландуруш бойичә ейтқан бу вә башқиму көрсәтмилири бизни роһландуриду. Ойлаймәнки, Мәктүп тәрәққиятимизниң муһим йөнилишлирини айдиңлаштуруп бәргәнлиги билән әһмийәтлик вә һәр қайсимизни техиму тиришчанлиқ билән әмгәк қилишқа дәвәт қилиду.

Турған ҚУРБАНОВ,

шәхсий дехан егилигиниң рәиси.

Панфилов наһийәси.

Барлиғи хәлиқ мәнпийити үчүн

Җумһурийәт Президенти Нурсултан Назарбаевниң қазақстанлиқларға йоллиған бийилқи әнъәнивий Мәктүби кәң җамаәтчилик тәрипидин зор қанаәтлиниш билән қобул қилинди вә қизғин муһакимә қилинмақта. Әлвәттә, Дөләт рәһбири мәмликәтниң стратегиялик тәрәққият йолиниң асасий йөнилишлирини өткән жиллар давамидиму қазақстанлиқларға ениқ ейтип-билдүрүп кәлгән еди. Мениңчә, бийилқи Мәктүпниң әһмийити шуниңдики, у болсиму Президент бу қетим Қазақстанниң өткән 20 жил ичидә бесип өткән тәрәққият йолиниң йәкүнини чиқирип, униң келәчәк истиқбалиға кәң тохталди. Дөләт рәһбири өз Мәктүбидә саламәтлик сақлаш системисиниң сүпәтлик түрдә тәрәққий етиватқанлиғиға, хәлиқниң саламәтлиги жилдин-жилға яхшилиниватқанлиғиға, өлүм көрсәткүчиниң төвәнләватқанлиғиға, шундиму әмәлгә ашурулушқа тегишлик чарә-тәдбирләрниң аз әмәслигигә әтраплиқ тохталди. Мәсилән, Мәктүптә: «Медицина хизмитидин пайдилинишни вә униң сүпитини ашуруш инсан ихтидариниң дәриҗисини көтиришниң, сағлам һаят тәризини илгирилитишниң йәнә бир муһим йөнилиши болуп һесаплиниду. Һазир «Саламатты Қазақстан — 2015» Дөләт программиси әмәлгә ашурулуватиду. Саламәтликни сақлаш системиси сүпәтлик тәрәққий етиватиду. Хәлиқ саламәтлиги әһвалиниң яхши көрсәткүчи қолға кәлтүрүлди. Туғут вә һаят кәчүрүш узақлиғи көпәйди. Қан айлиними системиси ағриқлиридин йүз беридиған өлүм көрсәткүчи 1,7 һәссә төвәнлиди...»,  дейилгән. Буни мән хәлиқниң саламәтлигини сақлаш йолида дөләт тәрипидин қолға елинған изгү ишларниң ипадиси, дәп чүшинимән. Мениңчә, маарип, медицина саһасиниң хадимлири, студент-яшлар, Президент Мәктүбини чоң разимәнлик һис-туйғулар илкидә қарши алди. Сәвәви, униңда алға сүрүлгән он йөнилишниң һәммиси бүгүнки әвлатниң тәләп-еһтияҗлирини қанаәтләндүрүш мәхсити түпәйли барлиққа кәлгән. Бу изгүлүкләрниң һәммисини Президентимизниң тоғра сәяситиниң мевиси, дәп қобул қилимән.

Диләрәм РАЗИЕВА,

врач-эндикринолог.

Алмута шәһири.

Үмүт-ишәнчимизни ашурди

Йошурушниң һаҗити йоқки, Дөләт рәһбири Нурсултан Әбиш оғли Назарбаевниң һәр жили җумһурийәт хәлқигә йоллайдиған әнъәнивий Мәктүплири мустәқил елимиз һаятидики муһим вақиә болуп һесаплиниду. Бу қетимқи «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» намлиқ Мәктүптиму җәмийәт һаятиниң барлиқ саһалири әкис етип, һәр бир қазақстанлиқниң бүгүнки күни вә келәчиги көздә тутулған. Мән ейтқан болар едимки, униңда бәлгүләнгән вәзипиләр миқияслиқлиғи вә иҗтимаий җәһәттин әһмийәтлиги бойичә илгәрки барлиқ Мәктүпләрдин алаһидә пәриқлинип туриду. Шундақ екән, Президентимизниң Мәктүбини, униңда баян қилинған мәхсәт-вәзипиләргә бағлиқ, программилиқ һөҗҗәт, дәп тәриплисиму болиду. Әйнә шу программилиқ һөҗҗәт мәмликәттики әһвални чоңқур тәһлил қилиш асасида вуҗутқа кәлди, дәп ойлаймән. Униңда пәқәт җумһурийитимиз тәрәққияти үчүнла әмәс, бәлки һәр бир адәмниң турмуш-тәғдири үчүн улуғвар вәзипиниң, чоңқур җавапкәрликниң әкис әткәнлигини билип-сезивелишқа болиду. Чүнки Мәктүптә адәмләрниң барлиқ арман-мәхсәтлири һәм үмүт-ишәнчилири өз ипадисини тапқан. Мәсилән, Президент униңда «Қазақстан йолиниң йеңи басқучи — бу ихтисатни күчәйтишниң, хәлиқниң паравәнлигини ашурушниң йеңи вәзипилири», дәп алаһидә тәкитлиди. Өткән жили аһалини иш билән тәминләш программисиниң синақтин өткәнлигини аммивий әхбарат васитилири арқилиқ яхши билимиз. Бу қетим болса, Дөләт рәһбири мәзкүр программини толуқ җарий қилиш қолға елинидиғанлиғини елан қилди. Униң әмәлгә ашурулуши, Мәктүптә тәкитләнгинидәк, бир йерим миллион қазақстанлиқни иш билән тәминләйду. Мәктүп билән тонушуш җәриянида мән Президентниң җумһурийитимизниң иҗтимаий йолини тәстиқлигәнлигигә йәнә бир қетим көз йәткүздүм. Мәсилән дуниявий, ихтисадий боһранниң тәсиридин, бир қатар мәмликәтләрдә иҗтимаий программиларни әмәлгә ашуруш тохтитилғанда, Қазақстанда, әксичә, иҗтимаий сәясәтни күчәйтиш йоли давамлаштурулмақта. Иш һәққи, пенсияләр, стипендияләр миқдариниң турақлиқ дегидәк өсүши әйнә шуниң нәтиҗиси, дәп ойлаймән. Нурсултан Назарбаев, һәр қачанқидәк, бу қетимму маарип мәсилисигә алаһидә диққәт бөлди вә шу арқилиқ, биз, саһа хадимлириғиму чоң вәзипә жүклиди. Мәсилән, у Қазақстанда инсан капиталиниң сүпәтлик өсүшигә тохтилип, «оқутуш җәрияниға заманивий методикилар билән технологияләрни җарий қилиш, ...униң тәрбийәвий әһмийитини күчәйтиш муһим», дәп тәкитлиди. Һәқиқәтәнму, мениңчә, инсан капиталиниң сүпәт җәһәттин өсүши ихтисатни, иҗтимаий вә сәясий саһаларни йеңилаш бойичә дөләт тәрипидин көрүлүватқан чариләрниң асасий күтүлүватқан нәтиҗиси болуши керәк. Қисқиси, Президентниң Мәктүби мениңда Қазақстанниң һәр қандақ боһранларға, заманивий синақларға қаримай, буниңдин кейинму утуқлуқ тәрәққий етишини давамлаштуриду, дегән ишәнчини техиму күчәйтти. Шундақ екән, һәр бир қазақстанлиқ дөлитимизни йәниму мустәһкәмләш, гүлләндүрүш үчүн, өз паравәнлигимизни ашуруш үчүн Дөләт рәһбириниң стратегиясини әмәлгә ашурушқа күч-қувитимизни сәрип қилишимиз шәрт, дәп һесаплаймән.

Гүлмира МӘСИМОВА,

И.Саттаров намидики Ғәйрәт оттура мәктивиниң муәллими.

Әмгәкчиқазақ наһийәси.  

Келәчигимиз үчүн хизмәт қилиду

Елимизниң келәчәктики тәрәққияти, хәлиқниң иҗтимаий әһвалини яхшилаш қандақ йөнилиш алидиғанлиғи Дөләт рәһбириниң әнъәнивий Мәктүплиридә ениқ өз ипадисини тапидиғанлиғини биз яхши билимиз. Президентниң бу қетим Парламент минбиридин елан қилған «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» намлиқ Қазақстан хәлқигә йоллиған Мәктүбини аһали адәттикидәк чоң тәвриниш илкидә қобул қилди. Мәктүптә Президент мәмликитимизниң йеқинқи он жиллиқтики тәрәққиятиниң муһим йөнилишлиригә тохталди. Шуниң ичидә гражданларни иш билән тәминләш, кәспий билимини мукәммәлләштүрүш, йеза йәрлиридә тиҗарәтни тәрәққий әткүзүшкә йеқиндин ярдәм көрситиш, әмгәк ресурслириниң нәтиҗидарлиғини ашуруш, адәмләрни Қазақстанниң ихтисади тәрәққий әткән мәркәзлиригә ишқа орунлаштуруш охшаш мәсилиләргә алаһидә көңүл бөлди. Президент Қазақстанниң қудритини ашуруш үчүн регионларни тәрәққий әткүзүш керәк екәнлигини тилға елип, заводлар билән фабрикиларни көпләп селип, йеңи иш орунлирини ечип, иҗтимаий инфрақурулумни сүръәтлик тәрәққий әткүзүшниң һаҗәтлигини ениқ мисаллар билән ейтип өтти. Елимизда кейинки жилларда Президентимизниң тәшәббуси билән индустриал-инновациялик тәрәққият плани утуқлуқ әмәлгә ашурулуватиду. Мошу программа даирисидики көңүлгә пүккән барлиқ чарә-тәдбирләрниң иҗтимаий әһмийити алаһидә екәнлигини ейтмисақму чүшинишлик. Шуңлашқа Президент әмәлгә ашурулуватқан һәр қандақ программа әң алди билән адәмләргә хизмәт қилиши керәк екәнлигини қайта-қайта тәкитлиди. Шуниң билән биллә хәлиқни иш билән тәминләш йөнилишидә қолға елиниватқан барлиқ ишларниң өз нәтиҗисини беридиғанлиғиму гуман туғдурмиса керәк. Мәсилән, иш билән тәминләш Дөләт рәһбириниң Мәктүбидики он йөнилишниң ичидә алаһидә бөлүнүп тилға елиниду. Келәчәктә мошу йөнилиш бойичә ениқ ишлар әмәлгә ашурулмақчи. Бу тоғрилиқ Президент Һөкүмәткә ениқ тапшурмиларни бәрди. Мениң пикримчә, у тапшуруқлар сөзсиз орунлиниду. Униңға Қазақстанниң һазирқи ихтисадий әһвали толуқ мүмкинчилик бериду. Умумән Мәктүптә хәлиқниң иҗтимаий һимайә қилинишиға алаһидә әһмийәт берилгән. Әнди билим бериш билән саламәтликни сақлаш саһалирини яхшилаш тоғрилиқму ениқ пикирләрниң ейтилғанлиғи һәммимизниң көңлидин чиқти дәп ойлаймән. Санаәт билән йеза егилигиму тәләпкә мувапиқ тәрәққий әткүзүлмәкчи. Қушниң қош қанитини әслитидиған бу икки саһаниң тәң тәрәққий әткүзүлүши йеза йәрлиридә истиқамәт қиливатқан барлиқ хәлиқниң мәхсәт-муддиалириға толуқ җавап беридиғанлиғи ениқ.

Модәнгүл ҒОҖАРАЕВА,

Чоң Дехан оттура мәктивиниң муәллими.

Уйғур наһийәси.

636 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы