• Хәйрихаһлиқ
  • 22 Мамыр, 2019

Яхшилиқ қилишқа яралған

Гөһәрбүви ИСМАЙИЛҖАНОВА, «Уйғур авази» Җумһурийәтлик Уйғур этномәдәнийәт мәркизи йенидики Нураний анилар кеңишиниң рәиси Гүлҗаһан Муратовани тонумайдиған уйғурлар камдин-кам болса керәк. У көпчиликкә өзиниң кәң хәйрихаһлиқ паалийити арқилиқ тонуш. Бу меһри дәрия инсан нәләргә бармиди, кимләр билән учрашмиди десиңизчу? Бирдә Яркәнттә, бирдә Чонҗида, гайида Алмутида жүридиған сахавәтлик ана һәрдайим адәмләргә яхшилиқ қилишқа алдирайду. Гүлҗаһан Муратова бу қетим йәнә йолға чиқти. Мәхсити: муһтаҗларға халисанә ярдимини көрситиш. Гүлҗаһан һаҗим хәйри-еһсанлиқ паалийитини дәсләп киндик қени төкүлгән Уйғур наһийәсидә башлап, андин иккинчи ана жути — Яркәнт тәвәсигә кәлди. Панфилов наһийәсидә оттуз жилдин ошуқ вақит бухгалтер болуп ишләп, һазир кәнҗә оғли билән Алмутида истиқамәт қиливатқан анимизниң хәйрихаһлиқ паалийитидин гезитханларни хәвәрдар қилишқа бизму алдираймиз. Чүнки жиғлиғанни бәзләп, жиқилғанни йөләватқан Гүлҗаһан һаҗим көпбалилиқ, турмуш шараити төвән, баққучисидин айрилған аилиләрни озуқ-түлүк билән тәминләш билән биллә әндиликтә муһтаҗларға өй селип бериш мәхситиниму әмәлгә ашуруватиду. “Гүлҗаһан һаҗим Яркәнткә кәпту” дегәнни аңлап, дәрһал униң өйигә йетип бардуқ. — Қазақстан Җумһурийитиниң Тунҗа Президенти – Елбасы Нурсултан Назарбаевниң «Келәчәккә нишан: мәнивий йеңилиниш» мақалисидики «Туған жер» лайиһисини диққәт билән оқуп чиқтим. Униңда Елбасы тиҗарәтчиләрни туғулған йеригә униң адәмлиригә меһир-шәпқәтлик болушқа чақириду. Мошу мәхсәттә елимиздә муһтаҗ җанларға аилимиз намидин тапқан тапавитимизниң бир қисмини сәрип қилиш тәшәббусумни пәрзәнтлиримгә ейтиведим, балилирим қоллап-қувәтлиди. Һели ядимда, буниңдин 25 жил илгири йәни Мустәқилликниң дәсләпки жиллири, дукан покәйлиридә йемәк-ичмәк йоқниң орнида еди. Мана мошундақ күнләрдә жутдашлиримға азду-тола қол учумизни бериш мәхситидә бир мишкаптин ун тарқатмақчи болдуқ. Ишинәмсиләр, дуканларда ун йоқ. Шуниң билән Қоңурөләндин буғдай сетивелип, уни түгмәндә тартқузуп, тарқатқан едуқ. У чағда, имканийитимизниң баричә, 20 аилигә ианә қилған екәнмиз. Мана шуниңдин бери хелә жиллар житим-йесир, баққучисидин айрилғанларға азду-тола ярдимимизни көрситип келиватимиз , – дәйду ана. Һәқиқәтәнму Г.Муратова 25 жилдин бери мундақ соваплиқ ишниң бешида жүриду. Бу қетим Уйғур наһийәсидә — 150, Яркәнт тәвәсидә 180 аилигә озуқ-түлүк севитини (униң ичидә ун, май, чай, макарон, гүрүч бар) елип кәлди. Аниниң қутлуқ өйигә җәм болушқан жигитбашлири һәрқайсиси мәһәллиридики муһтаҗ җанларниму биллә елип кәпту. Наһийәниң барлиқ йезилиридин кәлгән жигитбашлири Гүлҗаһан һаҗимниң һиммитигә көпчилик намидин апирин ейтип, пәрзәнтлиригә миннәтдарлиғини изһар қилишти. Наһийәлик Уйғур этномәдәнийәт мәркизи рәисиниң орунбасари Асийәм Сайитова билән ханим-қизлар кеңишиниң рәиси Маһинур Аюпованиму бу қутлуқ босуғида учраттуқ. — Гүлҗаһан һаҗимниң бу хилдики ярдимигә тәшәккүр ейтип, балилириниң иш-оқитигә бәрикәт тиләймиз. Чүнки анимиз наһийәлик билим бөлүмидә бухгалтер болуп ишләп, һазир Алмутида яшаватсиму, у дайимла жутумизға келип, һалимиздин хәвәр елип, туриду. Шундақ екән, жут анисиға мустәһкәм саламәтлик, көңүл хатирҗәмлигини тиләймиз. Бу қетим у 180 аилигә ярдәм көрсәтти. Униң хәйрихаһлиқ паалийити жилдин-жилға кәңийиватиду. Анимизниң Алмута вә униң әтрапидики баққучисидин айрилған яш аниларни һәқсиз турушлуқ өй билән тәмин етиватқанлиғи һәққидики әхбаратни гезит-журналлардин оқуп бәк тәсирләндуқ. Анимиз аман болсун! – дейишти улар. Гүлҗаһан Муратова шуниңдин кейин Талғир наһийәсидә, андин Алмута шәһиридики Қайрат мәһәллисидиму бу хилдики ярдимини көрсәтмәкчи. Бу қетимқи Рамзан ейида у 400 аилигә қол учини беришни көздә тутуватиду. Панфилов наһийәси. Турсунмәһәмәт МӘШҮРОВ чүшәргән сүрәт.

998 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы