• Көргәзмә
• 22 Мамыр, 2019

Тағлар билән далаларниң учришиши

Пайтәхттики Достлуқ өйидә классик язғучи Чиңғиз Айтматовқа беғишланған көргәзмә әйнә шундақ атилиду. Көргәзмини тәнтәнилик ечиш мәрасимиға Қазақстан хәлқи Ассамблеяси Рәисиниң орунбасари – Қазақстан Жумһурийити Президентиниң Мәмурийити ҚХА Кативатиниң мудири Жансейит Түймебаев, Қирғизстанниң Қазақстандики Пәвқуладдә вә Толуқ һоқуқлуқ Әлчиси Жээнбек Кулубаев, язғучиниң сиңлиси Розетта Айтматова, пайтәхт җамаәтчилигиниң вәкиллири қатнашти. – Чиңғиз Айтматов – әдәбият мәйданидики ярқин сима, демәк, у пәқәт қирғиз хәлқиниңла пәрзәнди әмәс. У – дуния граждини. Қазақ хәлқи Айтматовлар аилисиниң тәғдиридә чоң роль ойниди. Дөләт әрбаби Турар Рысқуловниң кәлгүси прозаикниң атиси Төреқулни қанитиниң астиға алғанлиғи һәммигә мәлум. Қазақстанда язғучиниң иҗадийитини наһайити жуқури баһалайду. Бизниң пайтәхттә Айтматовниң исми билән аталған коча бар, – дәп тәкитиди өз сөзидә Жансейит Түймебаев. Қазақ даласиниң Айтматов әсәрлиридә тәсвирлиниши тәсадипи әмәс. Әдип Қалтай Мухамеджанов, Олжас Сүлейменов, Шерхан Муртаза, Зейнолла Қабдолов охшаш көплигән қазақ язғучилири билән йеқин иҗадий һәмкарлиқта болған еди. Чиңғиз Төреқулоғли Мухтар Әвезовни өзиниң устази дәп һесаплатти. Өлмәс әсәрләр муәллипиниң иҗадийитигә беғишланған һәптилик даирисидә Нур-Султанда язғучиларниң яш иҗаткарлар билән учришишлири өткүзүлүп, «Чиңғиз Айтматов: Дәвир. Шәхс. Гуманизм» дәп аталған хәлиқара эсселар конкурсиниң ғалиплири мукапатланди, 79-мәктәп-лицейда Айтматов музейи ечилип, Қазақ дөләт академиялик музыкилиқ драма театрида Чиңғиз Айтматовниң «Пәрәң яғлиқ таңған омиғим» намлиқ повестиниң асасида сәһниләштүрүлгән спектакль қоюлди. Көргәзмини ечиш мәрасимида сөзгә чиққан Жээнбек Кулубаев вә Розетта Айтматова қирғиз хәлқиниң пәхри болған язғучиниң хатирисини әбәдийләштүргини үчүн қазақстанлиқларға миннәтдарлиқ изһар қилди.