• Хәйрихаһлиқ
  • 05 Маусым, 2019

Рамзан — изгүлүк ейи

Гөһәрбүви ИСМАЙИЛҖАНОВА, «Уйғур авази» Алмута вилайәтлик «Атамекен» Тиҗарәтчиләр палатиси Панфилов наһийәлик шөбиси йенидики тәдбирчан ханим-қизлар кеңишининиң рәиси Сүрийәм Һезимованиң тәшәббуси билән он икки ишбиләрмән ханим-қиздин тәркип тапқан мәхсус топ 1-июнь – Хәлиқара балиларни һимайә қилиш күнидә новәттики қетим наһийәни арилап, йеза-авуллардики тәминати начар, көпбалилиқ аилиләргә, баққучисидин айрилған җанларға хәйрихаһлиқ ярдимини көрсәтти. Тәдбирчан ханимлар дәсләп Яркәнт шәһиридики алтә бала өстүрүп тәрбийиләватқан ана Жанна Қызайбекованиң өйигә берип, озуқ-түлүк вә татлиқ-турум билән балилириға оюнчуқлар соға қилди. Сүрийәм Һезимова көпбалилиқ анини наһийәдики тәдбирчанлар намидин тәбриклигәч, елимиздә көпбалилиқ аниларға дөләт тәрипидин көрситиливатқан ғәмхорлуқлар һәққидә ейтип өтти. Шундақла наһийәниң иҗтимаий-ихтисадий саһалириниң тәрәққиятиға тегишлик һәссисини қошуватқан тиҗарәтчи ханим-қизларниң паалийитидин хәвәрдар қилди. — Елимизниң Тунҗа Президенти — Елбасы Нурсултан Назарбаев «Келәчәккә нишан: мәнивий йеңилиниш» программилиқ мақалисида тиҗарәтчиләргә «Туған жер» лайиһиси бойичә зор җавапкәрчиликләр жүкләйду. Биз наһийәдики тәдбирчанлар мошу мәхсәттә тапқинимизниң бир қисмини көпбалилиқ тәминати начар, мүмкинчилиги чәкләнгән балиларға сәрип қилишқа һәрқачан тәйяр, — деди Сүрийәм Турғанқизи. Ишбиләрмән ханим-қизлар бу қетим көпбалилиқ алтә аилигә ярдәм көрсәтти. Улар әнди йеңи оқуш жили һарписида, йәни август ейи кириши биләнла йәнә акция уюштуруп, наһийәни арилап йәнә йолға чиқишни нийәт қилмақта. Һәқиқәтәнму тәдбирчанлиғиға сахавәтлиги ярашқан ханим-қизлар улуқ Роза-рамзан, Қурван һейт мәйрәмлиридә, җумһурийәтлик «Мәктәпкә — йол» акциясидә вә бүгүнкидәк балилар мәйрәмлиридә ярдәмгә муһтаҗлар йенидин тепилишқа адәтләнгән. Панфилов наһийәси. *** Мәлумки, Ислам динидики соваплиқ әмәлләрниң бири – хәйрихаһлиқ. Бу дунияда қайтурумсиз яхшилиқ болмайду. Һәрким өз иш-һәрикитигә лайиқ совапқа еришиду. «Яхшилиқ қил, адәмдин қайтмисиму, Алладин яниду» дәйду конилар. Җүмлидин Рамзан ейи – изгүлүк ейи. Чүнки бу айда соваплар икки һәссилиниду. Бүгүнкидәк яхши ай, яхши күнләрдә Алмута вилайәтлик Уйғур этномәдәнийәт мәркизиниң рәиси, тонулған тиҗарәтчи Закирҗан Кузиевниң һамийлиғида, мәзкүр мәркәзниң әзаси Савут Махмутовниң йетәкчилик қилиши билән озуқ-түлүк бесилған Һүсәйин Һәмраевниң машиниси Яркәнт тәвәсидин чиқип, Уйғур наһийәсиниң йезилирини бесип өтти. Ениғирақ ейтсақ, улар Чонҗа, Баһар, Чоң Ақсу, Чоң Дехан, Ават, Ширин йезилиридики тәминати төвән қириққа йеқин аилини озуқ-түлүк билән тәминлиди. Ушбу изгү ишниң әтрапида болған Уйғур наһийәлик мәдәнийәт мәркизи йенидики жигитбашлар кеңишиниң рәиси Абдукерим Сәйдуллаев билән Чонҗа йезисиниң жигитбеши Үсән Җәлилов мәзкүр йезилардики муһтаҗ аилиләргә озуқ-түлүк мәһсулатлирини (10 килограмм ун, 5 килограмм гүрүч, 5 литр суюқ май, 1 килограмм чай, 5 килограмм қәнт, 6 килограмм макарон) тарқитип чиқишқа ярдәмләшти. Әлвәттә, өзгиләргә ғәмхорлуқ көрситиш һәқиқий әзимәтниң ишидур. Сөз ахирида ушбу изгү башланмини йолға қойған меһир-шәпқәтлик инсанларға миннәтдарлиғимиз чәксиздур. Жуман МАТАЙ. Уйғур наһийәси.

658 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы