• 23-июнь — Қазақстан полицияси күни
• 19 Маусым, 2019

Шамилни «юлтуз» қилған қизчақ

Йолдаш МОЛОТОВ, «Уйғур авази» Мәлумки, 1992-жили 23-июнь күни Қазақстан Җумһурийити Алий Кеңиши «Қазақстан Җумһурийити ички ишлар органлири тоғрилиқ» қанунни қобул қилди. Мошу қанун Қазақстан полициясиниң хизмити вә вәзипилирини бәлгүләп бәргән дәсләпки қанун акти болуп һесаплиниду. 2007-жили Қазақстанниң Тунҗа Президенти Нурсултан Назарбаев қанунниң қобул қилинишиниң 15 жиллиғи мунасивити билән 23-июнь күнини Полиция хадимлири күни қилип бәкитти. Шу жилдин башлап бу күн полиция хадимлирини кәспий мәйрими сүпитидә нишанлинип келиватиду. Қазақстан Полицияси күни — бу полиция хадимлири вә ветеранлириниң әмгәклири баһалинип, уларға иззәт-һөрмәт, миннәтдарлиқ изһар қилинидиған күн. Әлвәттә, бизму, әнъәнә бойичә, узун жиллар давамида һоқуқ қоғдаш органлирида ишләп, утуқларға йәткән бирәр шәхс һәққидә көләмлик мақалә берип, полиция хадимлирини тәбриклигән болар едуқ. Амма бүгүн шу әнъәнилиримиздин сирт чиқип, һазир җәмийитимиздә қизғин муһакимә қилиниватқан, ахирқи вақитларда елимиздә йүз бәргән вақиәләр нуқтәий нәзәридин қариғанда, полиция ишиға тамамән йеңи, иҗабий көзқараш шәкилләндүргән, дунияни өзгәртишкә қабил болған бир сүрәт һәққидә йезишни тоғра көрдуқ. Тәкитләш лазимки, ахирқи икки айда елимизниң чоң шәһәрлиридә қанунсиз наразилиқ намайишлири уюштурулди. Полиция хадимлири течлиқ аһалиниң, дөлитимизниң қануний мәнпийәтлирини һимайә қилип турди. Мәлум болушичә, мошу қанунсиз намайишлар давамида 300гә йеқин полиция хадими зәрдап чәкти. Нур-Султан шәһиридә өткән намайишларниң биридә үч яшлиқ қизчақ қолидики гүлни тәртип һимайисидә турған һәрбийгә суниду. Һәрбийму әлтәк қизниң сунған гүлини хошаллиқ илкидә қобул қилиду. Мошу пәйтни қизниң аниси сүрәткә чүширивелип, Интернетқа салиду. Қисқа вақит ичидә бу сүрәт Интернетта әң көп муһакимә қилинған вақиәгә айланди. Пикир язғанларниң һәммиси наһайити иллиқ ләвзилирини қалдурған. Кейин мәлум болушичә, у жигит һазир Миллий гвардиядә һәрбий борчини өтәватқан он сәккиз яшлиқ Шамил Муһидинов екән. Шамил Алмута вилайити Талғир наһийәсидә туғулуп өскән. — У күни президент сайлими өткәчкә, һәммимиз аваз берип болғандин кейин шәһәр кочилирида җәмийәтлик тәртипни сақлаш үчүн атландуқ, — деди у журналистлар билән болған сөһбәттә. — Әлвәттә, у күни һәммимиз тәшвиш илкидә болдуқ. Сәптә турғинимизда кичиккинә бир қиз келип, маңа мамкап гүлини сунди. Кочида бир йәрдин жулувалған охшайду. Мениң кәйпиятим дәрһал көтирилип, гүлни алдим. Сәпдашлиримниңму тәшвиши йоқиди. Әсли һәрбий инструкциягә мувапиқ, сәптә турғанда қалқанни чүшириш қәтъий мәнъий қилиниду. Шуниңға қаримай, ишимиз тамамлинип, һәрбий қисимға қайтип кәлгинимиздә, командирлар мени махтапму қойди. Әтиси мән һәқиқий рәвиштә Интернет «юлтузиға» айландим. Көп өтмәйла ата-анам телефон қилди. Уларму хошал. Ата-анамға пүткүл елимиздин тамамән натонуш адәмләр телефон қилип, тәшәккүр изһар қипту. Икки күндин кейин һелиқи қиз аниси Саяжан Досжанова билән һәрбий қисимға келип, Шамил Муһидинов билән учрашти. Шамил бу учришишта әлтәк қизға өзиниң соғисини тәғдим қилди. Мошу мақалини тәйярлаш давамида биз Шамилниң ата-анисини тепишқа муйәссәр болдуқ. Улар Талғир наһийәсиниң Қизил Ғәйрәт йезисида истиқамәт қилидекән. — Шамил кичигидинла полиция хадими болушни арман қилатти, —дәйду униң дадиси Азат. — Бу тәсадипи әмәс. Чүнки дадам Муһидин өз вақтида милициядә ишләп, майор унванида истипаға чиқти. Һазир 83 яшқа кирди. Мәнму милициядә ишлидим, һазир пенсиядә. Шамил өз мәйли билән һәрбий сәпкә кәтти. 9-июнь күни йүз бәргән вақиәдин кейин бизгә телефон қилғучилар наһайити көп болди. Уларниң һәммиси бизгә яхши нийәтлирини ейтиватиду. Әлвәттә, аялим Зоһра иккимизниң хошаллиғи чәксиз (күлүп). Шамилниң арқисида бизму «юлтуз» болуп кәттуқ. Телеканаллар келип чүширип кәтти. Растини ейтқанда, кейинки вақитларда йүз бәргән вақиәләр һәммимизни тәшвишкә селип қойди. Амма оғлумизниң мошу мәрданилиқ иши инсанларға дунияда һазирму яхшилиқниң, меһриванлиқниң бар екәнлигигә ишәнчә һасил қилиду. Жуқурида ейтқинимиздәк, бу вақиә Интернетта қизғин муһакимә қилинди. Һәтта шаир Вильям Молотов униңға беғишлап шеирму йезип үлгирипту. Төвәндә шу шеирни диққитиңларға һавалә қиливатимиз. Қизчақ, гүл вә җәңчи Тутуқ асман қапиғин түргән, Асмандинму сүрлүк адәмләр. Ана билән сәйлитип жүргән, Қизчақ басар ушшақ қәдәмләр. Әтрапида йүзлигән адәм, Қизиқтурмас бу лекин уни. Шундақ кетип барғанда беғәм, Көрүп қалди ечилған гүлни. Қоюп ана қолини шу тап, Гүл тәрәпкә жүгриди дәрһал. Вараң-чуруң бир мәһәл тохтап, Орун алди әҗайип бир һал. Үзүвелип гүлни авайлап, Туруп қалди икки топара. Андин маңди алдиға қарап, Җәңчиләргә кийингән қара. Әйнәк ниқап кәйнидә көзләр, Һәҗәплинип қарар сәбигә. Тапалмастин ейтишқа сөзләр, Даҗиғандәк болди кәйнигә. Омақ қизчақ сунди гүлини, Сәптә турған җәңчигә берип. Гүлни әмәс, течлиқ үнини, Турғандәкла шу чағ әкелип. Соғ қалқанни тутсиму өзи, Жүригидә бар екән оти. Тәбәссүмдә ечилип йүзи, Җәңчи гүлин сәбиниң тутти. Теги улуқ бу аддий һаләт, Савақ болғай пүткүл җаһанға. Хәлиқ үчүн болуп сәясәт, Течлиқ керәк дәйду инсанға! Вильям МОЛОТОВ.