• Йеңилиқлар
• 06 Ақпан, 2012

Муһим вәзипиләр қоюлди

Җумһурийитимиздә йеңи сәясий мәвсүмниң башлиниши календарьлиқ жилниң башлинишиға тоғра кәлди. Январьда сайлам өткүзүлүп, көп партиялик Парламент шәкилләнди вә Һөкүмәттә кадрлар алмаштурулди. 27-январьда болса, Президент Сенат вә Мәҗлисниң бирләшкән мәҗлисидә Қазақстан хәлқигә Мәктүп йоллиди. Дөләт рәһбири һәр қачанқидәк, өз Мәктүбини йоллаш үчүн әң қолайлиқ вақитни таллавалди. Бу вақитқа қәдәр мәмликәттә, Нурсултан Назарбаев билдүргәндәк, Қазақстан йолиниң йеңи басқучида, ихтисатни күчәйтиш вә хәлиқ паравәнлигини ашуруш мәхситидә йеңи вәзипиләрни һәл қилишта илгириләш үчүн барлиқ шараитлар яритилди. Президент «Иҗтимаий-ихтисадий йеңилиниш — Қазақстан тәрәққиятиниң асасий йөнилиши» дәп аталған бу қетимқи Мәктүпниң мәзмун-маһийитини ечип беридиған ишниң он асасий йөнилишини бәлгүләп бәрди. Уларниң әмәлгә ашурулуши Қазақстанни турмуш сүпити әң жуқури дөләтләр қатариға елип чиқиду. Аһалини иш билән тәминләш, әрзән өй, регионал тәрәққият, дөләт хизмәтлириниң сүпитини ашуруш, кадрлар ихтидарини яхшилаш, сот вә һоқуқ қоғдаш системилирини йеңилаш, инсан капиталиниң сүпәтлик өсүши, индустриал-инновациялик лайиһиләр вә йеза егилигини тәрәққий әткүзүш әйнә шулар җүмлисидиндур.