• Йеңилиқлар
• 11 Қыркүйек, 2019

Қазақстан – Россия: һәммигә үлгә мунасивәтләр

Қазақстанниң Тунҗа Президенти – Елбасы Нурсултан Назарбаев Россия Федерациясиниң Президенти Владимир Путин билән музакириләр өткүзди, дәп хәвәрлиди Тунҗа Президентниң Мәтбуат хизмитидә. Кремльдики учришиш давамида Нурсултан Назарбаев билән Владимир Путин икки дөләтниң өзара һәмкарлиғиниң асасий мәсилилирини муһакимә қилди. – Қазақстан – Россия мунасивәтлири һәммигә үлгә болалайду. Мән өзара һәмкарлиқниң мошундақ дәриҗигә йетиши үчүн барлиқ күч-ғәйритимни сәрип қилдим. Биз шуниң билән биллә тәрәққий етиватқан, барлиқ әза дөләтләргә пайда елип келиватқан Евразиялик ихтисадий иттипақ қурдуқ, – деди Қазақстанниң Тунҗа Президенти. Елбасы шундақла Россия Президентини Москва шәһириниң күни билән тәбрикләп, утуқ тилиди. – Москва шәһириниң мәйримигә тәклип қилғиниңиз үчүн рәхмәт. Москва һәммимизгә йеқин. Илгири биз мошу йәрдә билим алдуқ, ишлидуқ. Йеза егилиги муваппәқийәтлири көргәзмиси ишлигән жилларниң барлиғи хәлиқлиримизниң достлуғини күчәйтишкә чоң төһпә қошти. Улуқ Ғалибийәтниң 75 жиллиғини нишанлаш һарписида бу дәһшәтлик уруштики ғалибийәткә хәлқимиз бирлиги, өмлүги арқилиқ йәткәнлигини тәкитлигүм келиду, – деди Н.Назарбаев. Өз новитидә Россия Президенти Қазақстанниң Тунҗа Президентиниң иккитәрәплимә мунасивәтләрни қелиплаштуруш вә тәрәққий әткүзүштики ролини алаһидә тәкитлиди. – Һөрмәтлик Нурсултан Әбишоғли, бизгә мәйримимизгә кәлгиниңизгә миннәтдарлиқ изһар қилимән. Сиз Россия – Қазақстан мунасивәтлирини орнатқучи. Бу мунасивәтләр гуманитарлиқ, һәрбий, һәрбий техника саһалирида илгири-кейин болмиған алий дәриҗигә йәтти. Бизниң мунасивәтлиримиз буниңдин кейинму давамлишиду, – деди Россия Президенти.