• Җәмийәтлик тәшкилатларда
• 31 Қазан, 2019

Анилар мәйрими

Рашидәм РӘҺМАНОВА, «Уйғур авази» Йеқинда Әмгәкчиқазақ наһийәсиниң Йеңишәр йезисида өткән мәйрәм қәдирдан, меһриван, қәлби дәрия вә ғәмгүзар аниларға беғишланди. Әгәр, ядиңларда болса, «Анилар мәйрими» дәсләпки қетим буниңдин 20 жил бурун миллий мәдәнийитимизниң җанкөйәри Мәһәмәтҗан Җанбақиевниң тәшәббуси билән Әмгәкчиқазақ наһийәсиниң Көктөбә йезисида башлинип, җай-җайларда өткән еди. Бу қетимқи анилар мәйриминиң әң һөрмәтлик меһманлири — жутниң нураний анилири Ризвангүл Музрәпова, Сания Көлбаева, Галина Оразалина вә башқилар болди. Анилар дәстихан төридин орун алғандин кейин Үмида Абдрашитова «Бөшүк» нахшисини вә Т.Рысқулов намидики оттура мәктәпниң оқуғучи қизлири миллий уссулларни иҗра қилип, чирайлиқ һәм мәналиқ сәһнә көрүнүшини намайиш қилди. Нураний аниларниң ақ дәстихан үстидики дуасидин кейин Әмгәкчиқазақ наһийәлик Уйғур этномәдәнийәт мәркизиниң Йеңишәр йезисидики шөбисиниң рәиси Сархан Имамзарова кәчниң мәхсити билән тонуштуруп, униң уюштурғучилири билән меһманларға миннәтдарлиғини изһар қилди. Җумһурийәтлик Уйғур этномәдәнийәт мәркизи йенидики Ханим-қизлар кеңишиниң рәиси Сәнәм Беширова вә башқарма әзаси Шәмшиқәмәр Абдрахманова, «Нураний анилар» кеңишиниң рәиси Гүлҗаһан Муратова, “Җанан” хәйрихаһлиқ фондиниң рәиси Мезангүл Авамисимова, «Анилар» кеңишиниң рәиси Зорәм Авутова, Әмгәкчиқазақ наһийәлик Уйғур этномәдәний мәркизи рәисиниң орунбасари Нурбүви Насирова, Талғир наһийәлик «Анилар» кеңишиниң рәиси Каминур Сопиева, Ават йезисидики Ханим-қизлар кеңишиниң рәиси Турсунай Абдуллаева вә башқилар аниларға сағлам саламәтлик, узақ өмүр вә көңүл хатирҗәмлигини тилисә, көрнәклик сәнъәткар Турдибуви Аблизова өзиниң изгү-тиләклирини шеирий мисралар арқилиқ изһар қилди. Кәч давамида меһманлар «Юлтуз» вә “Айлин” уссулчи қизлар топлириниң уссуллири билән Юлтузай Қәһриманова, Гүлниса Насаева, Рамина Абдрашитованиң орунлишида нахша вә монологларни, Т.Рысқулов намидики оттура мәктәпниң уйғур тилидики тәйярлиқ топида билим еливатқан гөдәкләрниң аниларға беғишланған шеирлирини тиңшап, бәһримән болди. Әмгәкчиқазақ наһийәси.