• Җәмийәтлик тәшкилатларда
• 31 Қазан, 2019

Достлуқ билән өмлүккә дәвәт қилди

Мәшүр САСИҚОВ, «Уйғур авази» Өткән һәптидә Талғир шәһиридики Агробизнес вә менеджмент колледжиниң мәҗлисләр залида Талғир наһийәлик Анилар кеңишиниң рәиси Мария Сихимбаеваниң уюштуруши билән «Бір шаңырақ аясында» мавзусида форум өтти. Униңға наһийә һакиминиң орунбасари Дарменияр Алғатбекулы, вилайәтлик Анилар кеңишиниң рәиси Жамал Баймадиева, наһийәлик «Қоғамдық келісім» җәмийәтлик бирләшмисиниң рәиси Жумағыз Бутабаева вә наһийәлик Ички сәясәт бөлүминиң башлиғи Толқын Саметова қатнашти. Форумниң асасий мәхсити тәвәдә истиқамәт қиливатқан этносларниң достлуғи билән иҗил-инақлиғини техиму риваҗландуруш болғанлиқтин, бу күни һәрхил милләт вәкиллири өзлириниң миллий урпи-адәт вә әнъәнилири билән тонуштурди. Болупму улар заманниң йеңичә түс елишиға бағлиқ, йәни ХХІ әсирдә унтулуп кетиватқан яки тамамән бүгүнки әвлат вәкиллири хәвәрсиз қалған нәрсиләрдин ибарәт көргәзмиләрни уюштуруп, меһманларниң диққитигә сунди. Шу җүмлидин наһийәдә паалийәт елип бериватқан Талғир наһийәлик Уйғур этномәдәнийәт мәркизиниң рәиси Иминҗан Тохтахунов рәһбәрлигидики уйғурларму миллий алаһидиликлиримизни намайиш қилди. Шундақла бу күни меһманлар уйғур өйидә «Баһар» ансамблиниң концертидин бәһирлинип, һәрқачан милләтара разимәнликни тәрәққий әткүзүш бойичә атқурулуватқан ишларда паалийәтчанлиқ тонутуватқан талғирлиқ уйғурларниң тәдбирчанлиғиға жуқури баһа бәрди. Һәқиқәтәнму, тәвә уйғурлири һәрқандақ мәдәний чарә-тәдбирләргә паал қатнишип, хәлқимизни өзгиләргә тонуштуруватиду. Буниңдин ташқири, миллий нәширлиримизгә муштири топлаш мәвсүмидиму паалийәтчанлиқ көрситиватқанлиғи сөзүмизниң ярқин испатидур, Ишәнчимиз камилки, буниңдин кейинму улар миллий роһини төвәнләтмәй, жутдашлирини вәтәнпәрвәрликкә чақирған һалда, наһийәдики ана тилимизда билим еливатқан балилар билән муштирилар санини техиму көпийишигә күч салиду. Форум давамида Қизил Ғәйрәт йезилиқ Ханим-қизлар кеңишиниң рәиси Гүлбанум Бақиева наһийәлик Уйғур этномәдәнийәт мәркизиниң атқурған ишлири бойичә доклад оқуди. Натиқниң нутқини диққәт билән тиңшиған меһманлар мәркәз паалийитигә жуқури баһа берип, вилайәтлик Анилар кеңишиниң рәиси Жамал Баймадиева Гүлбанум Бақиеваға өзи рәһбәрлик қилидиған кеңәш намидин Тәшәккүрнамә тапшурди. Аһали арисида һәқиқий достлуқни тәрғип қилиш мәхситидә өткән форум барлиқ этнос вәкиллириниң бирликтә орунлиған қазақчә «Ана» нахшиси билән аяқлашти.