• Хәйрихаһлиқ
• 06 Қараша, 2019

Мәрданә жигитләр «Пәрзәнткә» алдирайду

Мәшүр САСИҚОВ, «Уйғур авази» Хәйри-сахавәтлик ишларға кәлгәндә, бизниң миллитимиз һечкимдин қалмай, қандақла әһвал йүз бәрмисун, биринчиләрдин болуп қол учини сунушқа алдирайду. Әнди мошундақ ишларни әнъәнигә айландурған мәрт-мәрданә жигитлиримиз арисида өзлириниң исим-нәсибини аташни әсла халимайдиғанларму бар. Йеқинда әйнә шундақ жигитләрниң биртопи өзиниң меһир-шәпқити түпәйли атмишқа йеқин житим балиға баш-пана болуватқан Аминәм һаҗим Һаҗибаева рәһбәрлигидики «Пәрзәнт» балилар өйидә тәрбийилиниватқанларни Алмута шәһиридики «Fіnіk» ресторанида меһман қилди. Һаятида хошаллиқ күнләр толиму аз бу балиларға шатлиқ дәмлирини һәдийә қилишни халиған жигитләр бу йәрдә мол дәстихан йейипла қалмастин, уларниң көңүллирини көтириш мәхситидә аниматорларниму тәклип қипту. Асасән янчуғи дөң пулдарлар тамақлинидиған мундақ җайларниң таамидин һөзүрлинип дәм тартқан балилар мультфильм қәһриманлири биләнму көңүллири қанғичә ойнап-күлүп, һадуқ чиқарди. Үзидә қанчә күлкә яңримисун, бәрибир жүригиниң қетида бир йәрдә қандақту мискинлик ипадилинип турған бу балиларниң биркүнлүк хошаллиғини көргиниңиздә, уларни қанитиниң астиға алған Аминәм һаҗим Һаҗибаеваниң қәлби дәрия инсан екәнлигигә қайил болисиз. Һә, әнди у яқни қоллап-қувәтләп қоюшни инсаний борчи һесаплиған хәйри-сахавәтлик жигитләргә апирин әйлимәй мүмкин әмәс. — Аминәм һаҗим, бәзидә ата-ана бир-икки, нери кәтсә үч пәрзәнтниң һөддисидин аран чиқиду. Сиз атмишқа йеқин балини қандақ тәрбийиләватисиз? — дәп соридуқ һәйран қалғанлиғимизни йошуралмай. — Биринчидин, әлвәттә, мениң ярдәмчилирим бар. Иккинчидин, уларға баш-пана болушумға улуқ Алла таала егәм маңа күч-қувәт, мәдәт бериватиду. Әнди наинсап, турмушниң азирақ еғирчилиқлириға чидимай, кәйпи-сапаниң кәйнигә кирип, Алла бәргән пәрзәндини ташлиған ата-аниларниң балилирини мән тәрбийилимисәм, улар кимгә керәк? Әлвәттә, бақидиғанлар тепилиду. Һөкүмәтлик балилар өйлириму моҗут. Мениң балилиримниң алаһидилиги, уларниң һәммиси Ислам йолида тәрбийилиниду. Буни бизниң «Пәрзәнт» балилар өйиниң утуғи дәп ишәшлик ейталаймән. Өзәңләрға мәлумки, диндин азирақ хәвири бар бала һечқачан яман йолға кирмәйду. — Бая бир йәрдә чоң мечит селиватимиз дегәндәк қилип қалдиңиз? — Шундақ, Наурызбай наһийәсидә һашамәтлик мечит селиватимиз. Униңда барлиқ шараитлар моҗут. Мәсилән, көплигән мечитларда йоқ, мәхсус аҗизлар үчүн бөлмиләр ясиливатиду. Шу бөлмиләрдә асасән намаз өтәшкә кәлгән балилиқ аялларниң пәрзәнтлири, анилири Алла алдидики пәрзини толуқ өтигәнгә қәдәр, ойнап туридиған болиду. Уларға бизниң қизлиримиз қарайду. Буниңдин ташқири, заманивий жуюнуш, тәрәт елиш бөлмилири болиду. — Бу йәрдә, әлвәттә, «Шунчә балини беқиватқан адәмниң мечит селишқа мәбләғни қәйәрдин еливатиду?» дегән соалниң туғулуши тәбиий... — Йошуридиған һечнәрсимиз йоқ. Балиларниң тамиғи билән кийим-кечиги тамамән һәқсиз десәм, хаталашмаймән. Чүнки бизгә бу тәрәптин қол учини сунуватқан сахавәтлик инсанлар наһайити көп. Өзимиздә бирнәччә ашхана ишләйду. Раст, уларни һазирчә вақитлиқ йепип қойдуқ. Шундақла бирмунчә пайда тепиш мәнбәлиримизму йоқ әмәс. Бу йәрдә көпчиликкә ейтарим бар. Бизгә хәйрихаһлиқ қиливатқанлар көп вақитларда бирла түрлүк нәрсә елип келидудә, һә, биз өзимизгә керәк нәрсиләрни сетивалимиз. Уларға «мону нәрсә бизгә һазирчә керәк әмәс, униң орниға пулини бериветиңлар» десәк, һамийлиримиз бизни «пулға амрақ охшайду» дәп ойлайдекән. Әсла ундақ әмәс. Балиларниң һәммә нәрсиси тәл-төкүз болғини дурусқу ахир. — Балилириңизниң арисида уйғурлар барму? — Илгири наһайити аз болидиған. Жилдин-жилға уларниң сани көпийиватиду. Буниңға немә сәвәп билмидим, әйтәвир, миллитимиз арисида пәрзәндини талаға ташлиғанларниң көпийиши ечинарлиқ. Һаятта немә иш болмайду, бирақ балисини житим қилған ата-анидин башқиларға бирәр яхшилиқниң келидиғанлиғиға шәхсән мән ишәнмәймән. Һазир, хаталашмисам, биздә онға йеқин уйғур пәрзәнди тәрбийилиниватиду. Мәрт акилириниң арқисида башлири көккә йәткән балилар уларниң йолиға йәнә тәшналиқ билән қарайдиғанлиғини йошурмиди. Өз новитидә бу мәрт-мәрданә жигитләр уларни пат-пат йоқлап турушқа вәдә беришти. Һә, бу жигитләрниң вәдисидә чоқум туридиғанлиғиға ишәнчимиз камил.