• Хәйрихаһлиқ
  • 13 Қараша, 2019

Гүлҗаһан ана бу қетим Пәнҗимдә өй селип бәрди

Гөһәрбүви ИСМАЙИЛҖАНОВА, «Уйғур авази» Җумһурийәтлик Уйғур этномәдәнийәт мәркизи йенидики «Нураний анилар” кеңишиниң рәиси Гүлҗаһан Муратовани яркәнтликләрму яхши тонуйду. Чүнки Яркәнт униң иккинчи жути. Панфилов наһийәлик Билим бөлүмидә бухгалтер болуп ишләп, һөрмәтлик дәм елишқа чиққандин буян Алмутида яшайду. Ана бу тәвәдә өтүватқан чоң-кичик мәрасимларға паал қатнишиду. Униңдин ташқири Гүлҗаһан Муратова Яркәнткә жилиға икки-үч қетим «рәсмий» келип кетиду. Ундақ дейишимиз, у һәр қетим тапқининиң мәлум қисмини һаҗәтмәнләргә ианә қилиш үчүн келиду. Бу қетимму худди шундақ болди. Биз мошу жилниң август ейида сахавәтлик анимизниң Панфилов наһийәсидики көпбалилиқ, баққучисидин айрилған, тапавити төвән аилиләрниң балилири үчүн 1 миллион 555 миң тәңгә сәрип қилғанлиғиниң гувачиси болған едуқ. Әнди мошу жили 3-июнь күни Пәнҗим йезисида пәвқуладдә әһвал йүз берип, тохтимай яққан ямғурниң ақивитидин йезини су бесип кәтти. Ақивәттә йезиниң төвәнки қисми, йәни Турпанйүзи мәһәллисидики Лутпулла, Мусаев, Желтоқсан, Сейфуллин, Өмәр Муһәммәдий кочилиридики 31 өй, 180 һойла-арам су астида қалған еди. Бу әһвалдин хәвәр тапқан ана теч олтиралмиди. Пәнҗим жутиға һазир өзи истиқамәт қиливатқан «Қайрат» мәһәллисиниң турғунлириниң бешини қошуп, халисанә ярдимини әвитипму йәнә көңли имин тапмиди. Ундақ болғини, иҗтимаий торларда бу әһвал һәққидә һәрхил тәхминләр тарап кәткән еди. Шуниң үчүнму Гүлҗаһан анимиз дәрру алақиға чиқип, Пәнҗим йезисиниң баш жигитбеши Адилҗан Ғоҗамбәрдиевтин болған вақиәниң тәпсилатини, шу чағдики әйни әһвалдин хәвәр алди. Шундақла Мәңсүр Беширов аилисиниң қораҗайиниң икки қетим су астида қалғанлиғини уқуп-билди. Мана мошуниңдин кейин сахавәтлик ана Мәңсүр Бешировниң аилисигә өй селип бериш мәхситидә ишқа киришти. Шундақ қилип, август ейида қурулуш ишлири башлинип кәтти. Пәнҗимликләр аниниң тәшәббусини қоллап-қувәтләп, бир кишидәк жутдишиға яр-йөләк болди. Бу ишниң бешида йәнә шу Адилҗан Ғоҗамбәрдиев башлиқ Ясинҗан Тохтахунов, Қурванҗан Һәмраев, Абдухелил Надиров, Мәсимҗан Тохтахунов, Һакимҗан Давутов, Расул Еләмов, Арупҗан Қарамов охшаш жигитбашлириниң уюштуруши билән жутдашлар һашар ясап, қурулуш ишлириға һәммисини бир кишидәк сәпәрвәр қилди. Йеқинда пәнҗимликләр көптин күткән хошаллиқниң гувачиси болди. Бешировлар аилиси йеңи өйгә көчүп кириши мунасивити билән Пәнҗим йеза округиниң һакими Ерлан Оспанбаев башлиған жут-жамаәтчилик вәкиллири Мәңсүр Бешировниң аилә әзалирини хошаллиғи билән тәбрикләш үчүн қутлуқ өйигә қәдәм тәшрип қилди. Дәсләп Молутҗан Тохтахунов елимизниң Тунҗа Президенти – Елбасы Нурсултан Назарбаевниң «Келәчәккә нишан: мәнивий йеңилиниш» мақалисидики «Туған жер» лайиһиси даирисидә өзиниң мәрт-мәрданилиғини әмәлдә көрситип келиватқан Гүлҗаһан һаҗим Муратовани көпчиликкә тонуштурғандин кейин Пәнҗим йеза округиниң һакими Ерлан Оспанбаев язда болған су бесиш ақивитидики пәвқуладдә әһвал һәққидә ейтип өтти. – Хәлқимиздә «От билән су — тилсиз йеға» дейилиду. Әйнә шу тилсиз йеға йүз бәргән күни биз жутдашларниң өмлүгини, инақлиғини йәнә бир қетим байқидуқ. Наһийә рәһбәрлигиниң уюштуруши вә жутдашлиримизниң халисанә ярдими арқилиқ 180 һойла-арам лай-латқидин тазилинип, қора-җайлар селинди. Әнди зәрдап чәккән үч аилиниң биригә «Алтынкөл төмүр йол станицияси», йәнә бир аилигә «Қурғақ порт» ярдәмләшкән болса, Бешировлар аилисигә сахавәтлик анимиз қол учини созди. Анимиз аман болсун. Мән бу пәвқуладдә әһвалда жутдашларниң һал-әһвалидин хәвәр тапқан көпчиликкә миннәтдарлиғимни билдүримән. Бу күни наһийәлик Уйғур этномәдәнийәт мәркизиниң рәиси Ризайдин Әйсаев, жутдашлар намидин Әхмәтҗан Надиров, жигитбашлири Қурванҗан Яқупов, Қурванҗан Һәмраев вә башқилар сөз елип Гүлҗаһан Муратованиң 20 жилдин ошуқ вақит шуғуллиниватқан хәйри-еһсанлиқ паалийитини тәкитләп, житимларни бағриға бесип, оқуғучиларға мәдәткар болуватқанлиғиға апирин ейтишти. Новәттә сөз алған Гүлҗаһан һаҗим Муратова мундақ деди: – Пәнҗимдики әһвал мениму тәврәндүрмәй қоймиди. Бу жут маңа ят әмәс. Улуқ Вәтән уруши жиллири мениң акам мошу жуттики мәктәптә мудирлиқ қилған екән. Әнди бу аилигә ярдәм қолумизни созуш үчүн тәшәббусни көтириведим, маңа Asar-Ume.kz һәрикити әзалири йеқиндин ярдәм көрситиш нийитини билдүрди. Уларниң арисида аддий хәлиқтин башлап, зияли, шоумен, блогерларму бар. Биздики мәхсәт — ярдәмгә муһтаҗларға яр-йөләк болуш, маддий җәһәттин қоллап-қувәтләш. Мениң тәшәббусимни қоллап-қувәтлигән пәнҗимлик қериндашларға, қурулушчи жигитләргә миннәтдарлиғимни изһар қилимән. Мошу өйдә Мәңсүр инимиз билән Роза сиңлимиз нәвриләрниң шатлиғиға сөйүнүп, бәрикәтлик һаят кәчүрсекән дәп тиләймән. Шуниңдин кейин өйниң рәмзлик лентиси қийилип, меһманлар йеңи үлгидики өйниң бөлмилирини арилап чиқти. Шуниңдин кейин көпчилик Бешировлар аилиси намидин «Караван сарай» кафесида әрвалар роһиға дуа тәгбир қилип, бу йәрдиму Гүлҗаһан һаҗим Муратованиң меһир-сахавәтлик ишлириға миннәтдарлиғини изһар қилғучилар көп болди. Панфилов наһийәси. Турсунмәһәмәт МӘШҮРОВ чүшәргән сүрәт. Сехи инсан, Гүлҗаһан ана! Парлап турар қәлбиңиздә нур-иман, Нийитиңиз яхшилиқ, хәйри-еһсан. Өзгиләрниң бәхтидин шатлинисиз, Җисмиңизға исмиңиз мас Гүлҗаһан! Қәлбләрдин орун алмақ өзи амәт, Муһим әмәс гәр көркәм ташқи қамәт. Сехилиқ дил паклиғи, гөзәллиги, Өмүрниң иззити шу – әшу раһәт! Гаһ, һәммә иш йешилмәс ахчиларда, Есил хисләт бар сиздәк яхшиларда. «Аҗизларни йөлигәнләр яшнисун», — Дәп күйләйду һапизлар нахшиларда. Мәнму яздим сизгә атап нур-тиләк, Язмисам шаирлиғим бу нә керәк. Мәдһийигә әрзийду һиммитиңиз, Чүнки Сиздә хәлқим дәп соққан жүрәк. Меһри-вапа, яхшилиқ қияс гүлгә, Хислитиңиз яшларға ибрәт-үлгә. Барчә инсан, еһ, шундақ болса әгәр, Һаят беғи айланмас зади чөлгә! Йол тепип йәңгән сәвәп-баниларға, Миң тәшәккүр сиз кәби Аниларға. Керәк болса һаят үчүн җан берип, Иллиқлиқ бәргән талай ханиларға! Еһтирам һәм тәсәддуқ Аниларға ! Шәмсимуһәммәд НИЯЗОВ. Пәнҗим йезиси, Панфилов наһийәси.  

961 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы