• Хәйрихаһлиқ
• 25 Желтоқсан, 2019

Аишаму ярдәмгә муһтаҗ

«Баламниң тапиниға киргән тикән, мениң көзүмгә кирсун» дәйдекән анилар. Мошу бир ибарә арқилиқ Ана меһриниң чәксизлигини, Аниниң улуғварлиғини һис қилишқа болиду. Дәрт-һәсрәт қошлап кәлгәндә бу кәлкүнгә йәнила шу анилар туған болидекән. Аиша дунияға кәлгән аилиму бүгүнки күндә әшундақ қайғулуқ күнләрни баштин кәчүрмәктә. Бир әвлатниң бешиға кәлгән бәш еғир мусибәттин кейин, дунияға наресидә келип, әндила баш көтиришкән еди. Әпсус, гөдәк туғулушидинла тәғдирниң еғир синиғиға дуч кәлди. Һели үч яшқа толған Аиша мошу күнгичә 6 рәт операция үстилигә йетишқа мәҗбур болди. Дохтурлар гөдәккә омуртқа кистиси, жулун, ДЦП вә башқиму диагнозларни коюшти. Әндила тили чиқип, җени арам тапқан пәйтләрдә күлидиған гөдәк улардин тамамән бехәвәр. Ата-аниси, бова-момилири болса, дил азавиға мәһкүм болушти. Йеқинда улар йәрлик дохтурларниң мәслиһити билән түркиялик мутәхәссисләргә мураҗиәт қилишқан еди. Улардин иҗабий җавапму кәлди. Алдимиздики январь ейиниң бешида новәттики операция қилинмақчи. Нәрқи — 20 миң АҚШ доллири. Шүкри, аримизда башқиларниң тәғдиригә бепәрва қаримайдиған меһриван, һисдаш адәмләр һелиму йоқ әмәс. Әйнә шундақ инсанлар түпәйли вә бир топ яш жигит-қизлардин ибарәт волонтерлар командисиниң күч чиқириши билән һаҗәт мәбләғниң йерими һесап чотқа чүшти. Туздыбастав йезисиниң Мәдәнийәт өйидә яш сәнъәткарлиримиз хәйрихаһлиқ концертини өткүзди. Өткән һәптидә Дружба мәһәллисиниң мечитида, бу қетим Султанқорғандики мечитта хәйрихаһлиқ йәрмәңкә уюштурулуватиду. Уларға миннәтдарлиғимиз чәксиз. Операция қәрәлигә азла вақит қалди. Һазир пүтүн бир әвлат гөдәк бешида пәрванә. Улар һелиму җәмийәткә, адәмләргә үмүт артиду. Аллаға сиғинип, аяққа туруп кетишини сорайду. Қени әмсә, әзиз замандаш, бизму кичиккинә Аишаниң тәғдиригә ара чүшүп, қилчә болсиму ярдәм қилайли. Гөдәкләр күлкиси билән аләм гөзәл болса, соваплиқ ишлар билән адәм гөзәлғу... Аишаниң һесап чоти. KaspіCold 5169497180836383 ИНН: 740219401473 (Зухра Усеинова) Зульфира ӘЙНИДИНОВА. Алмута шәһири.