- Хәйрихаһлиқ
- 15 Қазан, 2012
Бәргән қол — соғулмас
— Сиз Қиш бовайма!
— Яқ. Қиш бовайлар йеңи жилда келидиғу.
Бу сәккиз яшлиқ Амир билән Дмитрийниң сөһбити. Паләч ағриғиға (ДЦП) дучар болған Амир һазир Алмутидики нака балилар мәктәп-интернатида билим еливатиду. «Paul Hartmann» ширкитиниң Қазақстандики вакаләтханисиниң рәһбири Дмитрий Дятлов болса, «Амир» нака балилар җәмийәтлик хәйрихаһлиқ фондиниң тәшәббуси билән уюштурулған хәйрихаһлиқ акциягә қатнишиш үчүн кәлгән.
— Бизниң ширкәтниң Қазақстанда паалийәт елип бериватқиниға анчә көп вақит болмиди,— дәйду Дмитрий Дятлов. — Паалийитимизни мошундақ хәйрихаһлиқ акциягә қатнишиштин башлашни тоғра көрдуқ. Бу бизниң бир қетимлиқ акциямиз әмәс. Келәчәктә буни давамлиқ әмәлгә ашурушни мәхсәт қиливатимиз.
— Бизниң ширкәтниң мәһсулатлири Германиядә ишләнгән — дәп қошумчә қилди мәзкүр ширкәтниң йәнә бир вәкили Гүлзарәм Өмәрова. — Сүпитиму наһайити жуқури. Бүгүн биз бу йәргә җараһәт теңиш, суни сиңдүрүвалидиған йөгәк материаллирини, умумән, гигиенилиқ васитилирини елип кәлдуқ. Булар нака балиларниң һаятини кичиккинә болсиму йеникләштүриду дәп ойлаймән.
Хәйрихаһлиқ акцияниң ахирида сөз алған нака балилар мәктәп-интернати мудириниң оқуш ишлири бойичә орунбасари Сауле Турысбекова сахавәтлик инсанларға өзиниң чәксиз миннәтдарлиғини изһар қилди.
Акция қатнашқучилирини мәктәпниң һойлисиғичә, тәмтиләп узитип чиққан Амир йәнә Дмитрийға мураҗиәт қилип:
— Мән Қиш бовай әмәс дегән едиңиз, бизгә нурғун соғиларни елип кәпсизғу. Демәк, Қиш бовайлар пәқәт йеңи жилдила кәлмәйдекәндә — деди.
— Әлвәттә, сениңчә болсун. Амма йеңи жилда йәнә соғилар билән келимән дәп, вәдә беримән — деди Дмитрий хошлишип.
Йолдаш МОЛОТОВ.
1056 рет
көрсетілді0
пікір
