• Җәмийәтлик тәшкилатларда
• 24 Қыркүйек, 2020

Яхши сөз — җанға озуқ

Сабирәм ӘНВӘРОВА,
«Уйғур авази»

Уйғурларда «жигитбеши» дегән уқум чоң роль ойнайду. Чүнки бу хәлқимизниң турмуш әнъәнисигә сиңип, әҗдаттин әвлатқа йәткән борч. Мәлумки, халиған адәм жигитбеши болалмайду, у хәлиқниң хаһиши билән таллавелинған абройлуқ, ишбиләрмән әзимәт болуши керәк. Бүгүнки күндә Уйғур наһийәсидики жутлардиму жигитбашлирисиз иш пүтмәйдиған болди. Һәр қандақ мәсилидә жут авал жигитбеши билән мәслиһәтлишиду. Йеза һакимлириниң оң қолиға айланған жигитбашлириға жүкләнгән җавапкәрлик интайин жуқури. Буни мошу йолниң жүкини һапашлап, хәлиқ үчүн пай-петәк болуп жүргән адәмләр яхши чүшиниду.

Җүмлидин, он жилдин буян шу жүкни зиммисигә артип келиватқан әрләрниң бири – Дардамту йезисиниң жигитбеши Селимахун Әлаев. Бу күнләрдә йәтмиш яшлиғини қарши алған мөтивәрниң беминнәт әмгигидин жутдашлири аләмчә миннәтдар. Хош, бу абройлуқ инсанниң паалийитини жуқури баһалайдиған наһийәниң чоң жигитбеши Абдукерим Сәйдуллаев вә милләтпәрвәр инсанлар Үсән Җәлилов, Атуш Сатуков, Сейит Бәкриев, Розахун Насиров, Сирдаш Йолдашовлар тәвәллуди һарписида Селимахун Әлаевни туғулған күни билән тәбрикләп, һөрмәт билдүрүп қайтти. Жут атисиға айланған жигитбешиниң тенигә саламәтлик, ишлириға утуқ тиләп, үстигә чапан япти.
«Бу мениң туғулған күнимгә әң есил соға болди. Чүнки бу дунияда хәлиқниң миннәтдарлиғидин артуқ соға йоқ», деди йәтмишниң даваниға қәдәм басқан жигитбеши. Бәзи чағларда әмгиги етиварға елинмай қалидиған жигитбашлириниң роһини көтирип, рәғбәтләндүрүш үчүн орден-медальларниң һаҗити йоқ екәнлиги ениқ. «Яхши сөз җан озуғи», демәкчи, уларға жүрәктин чиққан бир-икки еғиз иллиқ сөз ейтилса, шуниң өзи купайә...