• Җәмийәтлик тәшкилатларда
  • 24 Қыркүйек, 2020

Наһийә һакими билән учрашти

Йеқинда җумһурийәтлик Уйғур этномәдәнийәт мәркизиниң бир топ вәкиллири Әмгәкчиқазақ наһийәсиниң һакими Қуанышбек Қашқымбаев билән учрашти. Әскә салсақ, Қуанышбек Қалиоғли бу хизмәткә 2020-жили июль ейиниң бешида киришкән еди.

Рашидәм РӘҺМАНОВА, 
«Уйғур авази»

Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов һакимға меһманларни тонуштуруп өткәндин кейин Қуанышбек Қалиоғли қисқа вақит ичидә атқурған ишлириға тохтилип, Әмгәкчиқазақ наһийәсидә һәл қилинишини тәләп қилидиған мәсилиләр әтрапида сөзлиди. Пандемия тәсиридин нурғунлиған адәмләрниң қийинчилиқларға дуч келиватқанлиғи яшлар арисидики ишсизлиқ, саһалар бойичә хадимларниң тапчиллиғи, ичимлик таза су, кона вә тар мәктәпләр проблемилири тоғрилиқ ейтип өтти. 34 милләтниң вәкили яшайдиған Әмгәкчиқазақ наһийәсидики милләтләрара достлуқ вә қериндашлиқ тоғрисида иллиқ пикирлирини ейтип, уйғур хәлқиниң әмгәксөйгүчлүгигә вә башқиму яхши тәрәплиригә тохталди. Наһийә миқиясида хәлиқләр оттурисидики достлуқниң буниңдин кейинму мошундақ давамлишидиғанлиғи, униң иҗтимаий-ихтисадий һаятини яхшилаш үчүн җиддий ишларниң елип берилидиғанлиғи һәққидә әтраплиқ сөз болди.
Андин ҖУЭМ рәисиниң орунбасари, медицина пәнлириниң намзити Әбәйдуллам Җаппаров җумһурийәтлик Уйғур этомәдәнийәт мәркизиниң рәиси, Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси Шаһимәрдан Нурумовниң салимини йоллап, жумһурийәтлик Уйғур этномәдәнийәт мәркизиниң паалийити һәққидә ейтип өтти.
«Уйғур авази» гезитиниң баш муһәррири Ершат Әсмәтов Қазақстанда уйғур тилида нәшир қилинидиған бирдин-бир рәсмий «Уйғур авази» гезитиниң Қазақстан Җумһурийитиниң Тунҗа Президенти – Елбасы Нурсултан Назарбаевниң вә ҚҖ Президенти Қасым-Жомарт Тоқаевниң дана сәяситини, көпмилләтлик мустәқил мәмликитимизниң пүтүнлүги билән турақлиқлиғини, елимиздики милләтләрара инақлиқ билән разимәнликни, дөлитимизниң иҗтимаий-ихтисадий тәрәққиятини тәрғибат қилиштики ролиға тохталди. 70 миңдин ошуқ уйғур аһалиси бар чоң наһийәдә гезитниң 3000 оқурмәни бар екәнлигини йәткүзүп, уларниң қатарини толуқтуруш үчүн буниңғичә атқурулған ишлар һәққидә ейтип бәрди.
ҖУЭМниң иҗраий мудири Зихруллам Қурванбақиев мәркәзниң миллий мәктәпләрни қоллап-қувәтләш йөнилишидики паалийити һәққидә тонуштурса, ҖУЭМ башқарма әзаси Алмас Ахмоллаев яшларни сағлам һаят тәризигә җәлип қилиштики ишлири һәққидә ейтип өтти.
Әмгәкчиқазақ наһийәсиниң һакими Қуанышбек Қашқымбаев \ уйғурлар наһийәниң иҗтимаий-ихтисадий, мәдәний тәрәққиятини риваҗландурушқа мунасип төһпә қошуп келиватқанлиғини вә келәчәктиму шундақ болидиғанлиғини алаһидә қәйт қилди.

Әмгәкчиқазақнаһийәси.

5909 рет

көрсетілді

16

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы