• Җәмийәтлик тәшкилатларда
• 22 Қазан, 2020

Көпчилик аваз билән сайланди

Йеқинда җумһурийәтлик Уйғур этномәдәнийәт мәркизи бюросиниң кәңәйтилгән мәҗлиси болуп өтти. Униңға мәркәзниң бюро әзалири, жигитбашлири вә башқиму җәмийәтлик ишларниң активистлири қатнашти. Мәҗлистә юмшитилған карантин қаидилиригә толуқ риайә қилинди.
Жиғинни киришмә сөз билән ачқан ҖУЭМниң иҗраий мудири Зихруллам Қурванбақиев жиғилған жамаәтчиликни мәркәз тәрипидин әмәлгә ашурулуватқан ишлардин хәвәрдар қилип, бу қетимқи башқошушта күн тәртивидә ЖУЭМ Алмута шәһәрлик шөбиси Жетису наһийәлик Уйғур этномәдәнийәт мәркизиниң рәиси билән баш жигитбешини сайлаш мәсилисиниң қарилидиғанлиғини ейтти. Шуниңдин кейин сөзгә чиққан ҖУЭМ йенидики Жигитбашлири кеңишиниң рәиси Ярмәһәмәт Кебиров, униң орунбасарлири Сабит Йүсүпов билән Октябрь Қурбанниязов, мәркәзниң Алмута шәһәрлик шөбиси Жигитбашлири кеңишиниң рәиси Азат Ибрагимов бүгүнкидәк мурәккәп шараитта хәлқимизниң бирлик-иттипақлиғини мустәһкәмләп, бу йөнилиштә мәркәз ишини техиму җанландурушниң нәқәдәр муһимлиғини, униң үчүн рәһбәрлик тәркивигә һәқиқий мәнадики милләтпәрвәр, қолидин иш келидиған нийити таза, хәлиқни тоғра йолға башлайдиған адәмләрниң кириши лазимлиғини тәкитлиди. Жиғин қатнашқучилиридин Султанқорған мәһәллисидики җәмийәтлик ишларниң активисти Бәхтияр Әзимов, Һөҗҗәт мәлисиниң баш жигитбеши Тудахун Тайипов вә униң орунбасари Тохтахун Қожаев, Аэродром мәһәллисиниң чоң жигитбеши Исмайилжан Садиқов, Жетису наһийәлик баш жигитбешиниң орунбасари Махмутҗан Самсақов, «Көкмайсә» микрорайониниң турғуни, миллий мәдәнийитимизниң җанкөйәри Полат Һезимов вә башқилар сөзгә чиқип, күн тәртивидики мәсилә бойичә өз пикирлирини оттуриға ташлиди.
Жиғин ахирида көпчиликниң авази билән һәм ҖУЭМ бюросиниң қарариға бенаән тәклип қилинған бирдин-бир намзат - «Көкмайсә» микрорайониниң жигитбеши Әркин Анайәтов ҖУЭМ Алмута шәһәрлик шөбиси Жетису наһийәлик Уйғур этномәдәнийәт мәркизиниң вә наһийәлик Жигитбашлири кеңишиниң рәиси болуп сайланди.