• Бизниң җанкөйәрлиримиз
• 27 Қараша, 2020

Үсүпҗанниң үлгилик ишлири

Бәхтишат СОПИЕВ,
«Уйғур авази»

Алмутидики Заря Востока мәһәллисини билмәйдиған адәм йоқ. Аммибап яйма базар тоғрилиқ сөз болса, адәмләр алди билән Заря Востока мәһәллисини көз алдиға кәлтүриду. Бу йәрдә чоң уйғур жути бар. Атақлиқ алим Мурат Һәмраевниң намида уйғур мәктиви моҗут. Өткәндә бир баш қошушта мошу жутниң турғуни, җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Ярмәһәмәт Кебиров «бизниң мәлидә жигирмидин ошуқ жигитбеши бар» дәп қалди. Һәрбир кочиниң өз жигитбеши бар охшайду. Демәк, бу кичик жут әмәс. Йәнә келип, у «жуқарқи» вә «төвәнки» дәп иккигә бөлүниду. Әву бир жиллири бу мәлидә почтиниң хизмити сәл асқап қеливеди, мошу мәһәллиниң турғуни Аблеким ака гезитимизни редакциядин өзи әкелип муштириларға тарқитип жүрди. Демәкчи болғиним, бу йәрдиму бизниң җанкөйәрлиримиз йетәрлик. Шуларниң бири - төвәнки мәлиниң жигитбеши Үсүпҗан Бәраев. Ярмәһәмәт акиниң Үсүпҗан һәққидә ейтари көп.
– Үсүпҗан - әсли байсейитлиқ. Уйғур мәктивидә оқуған. Жүриги «уйғурум» дәп соқиду. Шуңлашқа униң жутдарчилиқ ишлириға арилишип жүргинигә 20 жилдин ашти. Бурун коча жигитбеши болса, һазир төвәнки мәлиниң чоң жигитбеши. «Һардим» дегинини аңлимаймиз. Бу айлиқ төлимәйдиған ишта бизгә шундақ адәмләр керәк. Жутниң көңлидин чиқмақ оңай әмәс, – дәйду Ярмәһәмәт ака. – Бүгүн униң тәвәллуди, шуниң үчүн көпирәк Үсүпҗан һәққидә ейтиватимән. Болмиса Сираждин Велиюев, Дилшат Илахунов, Йолдаш Әлиев, Туғлуқ Қаһаров, Пәрһат Һәйрәмов, Әхмәтҗан Зәйнамов, Сәдирдин Нәзәров, Талғат Мәһәмәтов, Нурамбәг Абдуллаев, Һосман Зәйнудинов қатарлиқ коча жигитбашлириниң һәрбириниң жут үчүн қиливатқан әмгигини жуқури баһалаймән. Барлиғи «жутум» дәп жүгрәп жүриду.
Әву бир жиллири адәмләр базарға бешичә кирип кәткәндә, Үсүпҗан нәпсини тартип, тапқан-тәргининиң бир бөлүгини китапларни нәшир қилишқа, мәктәпкә, һал-оқити төвән аилиләргә хираҗәт қилғинини жутдашлири унтуғини йоқ.
Икки оғул өстүрүп, бәш нәврә көргән Үсүпҗан билән Росхан Бәраевлар уларниму милләтпәрвәрлик роһта тәрбийилимәктә. Чоң оғли Әлишер Көкчетав шәһәрлик прокурориниң орунбасари, Әркин дадиси охшаш әл хизмитидә. Бәраевларниң беши қошулса, өзлириниң әмәс, әлниң ғемини қилиду. Уларниң аиләвий шиари әйнә шундақ.