• Йеңилиқлар
• 27 Қараша, 2020

Йеқинлишиш тили

Йеқинда пайтәхттики “Достлуқ өйидә” Қазақстан хәлқи Асссамблеясиниң «Мың бала» мәдәний-ақартиш лайиһисиниң йәкүни чиқирилди.
«Мың бала» лайиһиси яшлар арисида роһий вә вәтәнпәрвәрлик қәдрийәтләрни, дөләт тилини тәрәққий әткүзүшкә вә түрлүк милләтләр вәкиллири арисида қазақ хәлқиниң әнъәнилири һәм тарихини тәрғип қилишқа қаритилған.
Мәмликәттики эпидемиологиялик әһвал һесапқа елинип, бийил конкурс онлайн-тәртиптә өтти.
«Мың бала» лайиһиси регионлуқ чарә-тәдбирләр ғалиплирини мукапатлаш мәрасимиға ҚХА Рәисиниң орунбасари – Қазақстан хәлқи Ассамблеяси Кативатиниң рәһбири Жансейит Түймебаев, Әхбарат вә җәмийәтлик тәрәққият министриниң орунбасари Марат Әзилханов, ҚХА Рәисиниң орунбасари, ҚХА Журналистлар клубиниң рәиси Майя Бекбаева, Әмәлий вә этносәясәт институтиниң мудири Талғат Қалиев, шундақла ҚХА әзалири вә этномәдәнийәт һәм яшлар бирләшмилириниң вәкиллири қатнашти.
ҚХА Рәисиниң орунбасари Жансейит Түймебаев тәбрик сөзидә «Мың бала» лайиһисиниң дөләт тили – бирлик тили, «Отан», «туған жер», «салт-дәстүр», «бауырластық», «достық»... чүшәнчилириниң балиларни йеқинлаштуруш ишида чоң роль ойнайдиғанлиғини тәкитлиди.
– «Мың бала» лайиһиси дөләт тилини билиш, қазақ хәлқиниң мәдәнийити вә урпи-адәтлирини чүшиниш арқилиқ өсүватқан гражданларниң – мәмликәтниң келәчәк егилириниң достлуғини, бирлигини күчәйтишкә қаритилған, – дәп тәкитлиди ҚХА Рәисиниң орунбасари. – Жил мабайнида мәмликәтниң барлиқ регионлирида лайиһә даирисидә қазақ тилини үгиниш бойичә «Тіл мектебі» программиси ишләнди, коммуникативлиқ тренинглар вә түрлүк милләтләрниң балилири һәм яшлири үчүн «Асыл сөз» мәктивиниң курслири өткүзүлди.
Шундақла Абай тәвәллуди жилида «Abaidyn 175 jyldygy» акцияси әмәлгә ашурулди. Чарә-тәдбир даирисидә жуқурида аталған барлиқ лайиһиләр бойичә ғалиплар мукапатланди. Барлиғи болуп 65 адәм ғалип атилип, улар баһалиқ соғилар вә тәшәккүрнамиләр билән тәғдирләнди.
Ассамблея мәлуматлири бойичә, қатнашқучилар, җүмлидин ғалиплар сани жилдин-жилға көпийиватиду. Мәсилән, 2018-жили - 47, 2019-жили 57 адәм ғалип аталди. Лайиһидики риқабәтму күчлүк: пәқәт өткән жилила «Мың бала» лайиһисигә 383 миң адәм қатнашти.
Бийил мукапатланғанлар арисида Қариғанда вилайити Тилларни үгиниш мәркизиниң методисти Мунира Ағымбаева, иҗтимаий тармақлардики «Abaidyn 175 jyldygy» акциясидә ғалип чиққан мошу регионниң Бухар-Жырау наһийәси Ташоқы йезисидики оттура мәктәпниң оқуғучиси Минара Гучигова, «Асыл сөз» лайиһиси бойичә – Ғәрбий Қазақстан вилайити 35-мәктәп-лицейниң оқуғучиси Тамила Чекаева, Қизилорда вилайити Ж.Нурсейитов намидики 233-оттура мәктәпниң оқуғучиси Алия Шарипаева, Маңғыстав вилайити Н.Оңдасынов намидики 5- оттура мәктәп оқуғучиси Нилюфар Нағметуллаева бар.
– Бу - умумхәлиқ лайиһиси. Униңға қатнишишниң яшлиримизға жуқури чоққиларни егиләшкә вә яхши ишларға орунлишишиға ярдәм қилиду, дәп ойлаймиз. Барлиқ уюштурғучиларға вә қатнашқучиларға миннәтдарлиқ билдүримән! Силәр – хәлиқни бирләштүрүватқан һәқиқий вәтәнпәрвәрләр, –дәп сөзини тамамлиди Жансейит Түймебаев.
Мукапатлаш мәрасиминиң алдида «Асыл сөз» мәктиви даирисидә қазақ хәлқиниң әнъәнилирини вә урпи-адәтлирини үгиниш бойичә коммуникативлиқ онлайн-тренинг өткүзүлди.
Умумән, Қазақстан хәлқи Ассамблеясиниң мәлуматлириға асаслансақ, 2015 – 2019-жилларда «Мың бала» лайиһиси бойичә 73 160 чарә-тәдбир өткүзүлүп, уларға 1 492 516 адәм қатнашса, 286 215 бала қазақ тилини үгинип чиққан.