• Йеңилиқлар
• 03 Желтоқсан, 2020

Конкурс ғалиплири мукапатланди

Президент күни һарписида Алмутидики “Достлуқ өйидә” Қазақстан хәлқи Ассамблеясиниң этножурналистика саһасидики «Шаңырақ» иҗадий конкурсиниң ғалиплирини мукапатлаш мәрасими болуп өтти.
Қазақстан хәлқи Ассамблеяси Рәисиниң орунбасари Жансейит Түймебаев аммивий әхбарат васитилириниң вәкиллирини 1-декабрь –Қазақстан Җумһурийитиниң Тунҗа Президенти күни билән тәбрикләп, мәмликәт сәяситини әхбарат җәһәттин қоллап-қувәтләшкә, җәмийәтлик разимәнлик вә умуммиллий бирликни тәрәққий әткүзүшкә ярдәм қиливатқан, Қазақстан хәлқи Ассамблеяси паалийитиниң йөнилишлирини йорутушқа қатнишиватқан журналистларға тәшәккүр изһар қилди.
– Мәлумки, Қазақстан Җумһурийитиниң Тунҗа Президенти – Елбасы Нурсултан Назарбаевниң рәһбәрлигидә мәмликитимиз дунияниң сәясий хәритисидин мунасип орун егилиди вә жуқури хәлиқара абройға еришти. Барлиқ ислаһатлар вә муһим программилар, мустәқилликниң 30 жилида қолға кәлтүрүлгән утуқлар журналистларниң диққәт нәзәридин сирт қалмиди. Қазақстан хәлқи Ассамблеяси дөләт сәяситини әхбарат җәһәттин қоллап-қувәтләшкә, җәмийәтлик разимәнлик вә умуммиллий бирликни күчәйтишкә һәссә қошқан журналистларни қоллап-қувәтләш мәхситидә һәр жили «Шаңырақ» җумһурийәтлик конкурсини өткүзиду, – дәп тәкитлиди Жансейит Түймебаев.
Җумһурийәт җамаәтчилиги бийил түрлүк шәкилләрдә улуқ қазақ шаири Абай Қунанбаевниң 175 жиллиғи, улуқ алим Абу Насир әл-Фарабиниң 1150 жиллиғи, Қазақстан хәлқи Ассамблеясиниң 25 жиллиғи охшаш муһим вақиәләрни атап өтти. Журналистлар аһали арисида шундақ әһмийәтлик мәйрәмләрни кәң миқияслиқ тәрғип қилишқа чоң һәссә қошти вә алаһидә қоллап-қувәтлиди.
– Қазақстан Җумһурийитиниң Президенти Қазақстан хәлқигә йоллиған Мәктүбидә түрлүк иҗтимаий вә миллий топлар оттурисида разимәнликниң зөрүр екәнлигини атап көрсәтти. Елимиз журналистикиси җәмийәтлик разимәнликни тәрәққий әткүзүш, җәмийәтниң бирлигини сақлаш, иғвагәрлик әхбаратларға берилмәслик керәклиги тоғрилиқ мавзуларни көпләп көтириши керәк. Дөләт тилиниң мәртивисини көтириштә вә хәлиққә дөләт сәяситини чүшәндүрүштә журналистлар алаһидә роль ойнайду. Биз аммивий әхбарат васитилириниң барлиқ вәкиллири билән қоюқ өзара һәрикәтни күчәйтишкә турақлиқ күч чиқирип келиватимиз. Пурсәттин пайдилинип, әхбарат җәһәттин қоллап-қувәтләш көрситиватқиниңлар үчүн алаһидә тәшәккүр изһар қилимән! Қазақстан хәлқи Ассамблеясиниң «Шаңырақ» җумһурийәтлик конкурсиниң ғалиплирини чин жүрәктин тәбрикләймән, – дәп тәкитлиди ҚХА Рәисиниң орунбасари.
Чарә-тәдбиргә этномәдәнийәт бирләшмилириниң вәкиллири, Ассамблея әзалири вә җумһурийәтлик аммивий әхбарат васитилириниң баш муһәррирлири қатнашти.
Ахирида шуни қошумчә қилиш орунлуқки, мукапатланғанларниң арисида «Қазақ газеттері» ҖЧЙниң тәркивигә киридиған «Ана тілі» гезитиниң баш муһәррири Жанарбек Әшимжан вә «Қазақ газеттері» ҖЧЙ сайтиниң муһәррири Берік Бейсенұлы бар. Биз кәсипдашлиримизни сәмимий тәбрикләп, кәспий паалийитигә иҗадий утуқлар тиләймиз.