• Йеңилиқлар
• 03 Желтоқсан, 2020

Пенсия төләмлирини кимләр алалайду

Шөһрәт МӘСИМОВ,
«Уйғур авази»

Һәммигә мәлумки, бүгүнки күндә елимиздә аяллар үчүн пенсиягә чиқиш йешини басқучлуқ көпәйтиш җәрияни кетип бариду. Әйнә шуниңға бағлиқ пенсиягә чиқиши керәк болған қазақстанлиқ аяллар мошу жилниң ахириғичә Бирпүтүн пенсия топлаш фондиға мураҗиәт қилип, пенсия төләмлирини рәсмийләштүрүши керәк.
Йошурушниң һаҗити йоқки, пенсиягә чиққан вә пенсия йешиға йәткән қазақстанлиқларниң арисида Бирпүтүн пенсия топлаш фондиға (БПТФ) мураҗиәт қилмайдиғанларму бар екән. Мәсилән, бүгүнки күндә 63 яшқа йәткән әрләр вә 59,5 яшқа йәткән вә улардин чоң аяллар әйнә шулар җүмлисидиндур.
Әйнә шуниңға бағлиқ БПТФ шундақ гражданларниң пенсия төләмлирини елиш һоқуқиниң бар екәнлиги тоғрилиқ хәвәрләндүриду. Болупму Фонд хадимлири аяқлишиватқан жилда 59,5 яшқа толидиған аялларға алаһидә мураҗиәт қилиду. Гәп шуниңдики, әгәр улар төләм рәсмийләштүрүш үчүн мошу жилниң ахириғичә мураҗиәт қилмиса, у чағда улар төләмни пәқәт келәр жили 60 яшқа толғандила рәсмийләштүрәләйду.
Бу йәрдә гезитханларда «Пенсия төләмлири қандақ рәсмийләштүрүлиду вә төлиниду?» дегән соалниң туғулуши тәбиий. Әйнә шуниңға мунасивәтлик БПТФтин төлинидиған пенсия төләмлириниң уни алғучи мураҗиәт қилған күндин тартип бәлгүлинип, топланған пенсия пули түгигичә әмәлгә ашурулидиғанлиғини әслитип өтмәкчимиз.
Пенсиягә чиқиш йешиниң йетишигә бағлиқ әризә бериш үчүн «Гражданлар үчүн һөкүмәт» дөләт корпорациясигә мураҗиәт қилиш керәк. Ейтмақчи, улар пенсиягә чиқиш йешиға он күн қалғанда әризә бериш имканийитигә егә. БПТФ әризини қарап чиққандин кейин пенсия төләмлириниң һесаплап чиқирилған миқдарини дөләт корпорациясигә әвәтиду. Төләм пенсия алғучиға пенсия билән тәң төлиниду. Буниңда БПТФтин төлинидиған төләм тегишлик жилға бәлгүләнгән яшаш минимуминиң 54 пайизидин кам болмаслиғи керәк. Һазир у 17 641 тәңгини тәшкил қилиду. Әгәр төләм бәлгүләш үчүн мураҗиәт қилған чағда топланған пенсия пулиниң миқдари әң аз пенсия миқдариниң он икки һәссисидин ашмиса, барлиқ ахча пенсиягә чиққучиға шу чағдила берилиду. Һазирқи пәйттә у 485 292 тәңгә. Башқичә ейтқанда, әгәр топланған ахча мошу миқдардин аз болса, у толуқ вә дәрру берилиду. Шундақла БПТФтин топланған пенсия пули башқа мәмликәткә турақлиқ яшашқа кәткәндә, биринчи вә иккинчи топтики накалиқ бәлгүләнгәндә, дәпин қилған вә мирасқа алған әһвалда, әллик яшқа киргәндә ихтиярий пенсия бәдәллири һесавиға төлиниду.
Әнди бу мәсилә бойичә тәпсилий әхбарат алмақчи болсиңиз беваситә Бирпүтүн пенсия топлаш фондиниң бөлүмчилиригә яки «Гражданлар үчүн һөкүмәт» дөләт корпорациясиниң шөбисигә мураҗиәт қилсиңиз болиду.