• 1-декабрь — Тунҗа Президент күни
• 03 Желтоқсан, 2020

Қазақстан бизниң қәлбимиздә

Қазақстан Җумһурийити – өзиниң илмий, тәтқиқатчилиқ, иҗадий қабилийитини әмәлгә ашуруш, мустәқил дөләтниң гүллиниши үчүн яшаш, әмгәк қилиш, хошаллиқ вә меһриванлиққа толуп-ташқан бәхитлик һаятни қуруш имканийитигә егә болған һәрхил милләт вәкиллири үчүн Вәтән болуп һесаплиниду. Биз Қазақстан хәлқи Ассамблеясиниң рәиси, Қазақстан Җумһурийитиниң Тунҗа Президенти Нурсултан Әбишоғли Назарбаевниң дана сәясити нәтиҗисидә “дайим өзгиришләр йүз берип туридиған дунияда бирла турақлиқ фундаменталлиқ қәдир-қиммәт бар – бу җәмийәтниң бирлиги вә милләтләрара разимәнлик. Нәқ мошу муһим амил кәлгүси дунияда бизниң риқабәтчилигимизни бәлгүләйду”, дегән сөзлирини тәкрарлап һармаймиз.
Биз, қазақстанлиқларни, течлиқ, бирлик, милләтләрара разимәнлик, вәтәнпәрвәрлик, достлуқ, толерантлиқ охшаш умумий әхлақий қәдир-қиммәтләр бирләштүриду. Қазақстан хәлқиниң мәдәний бирлиги мәдәнийәтләр вә әдәбиятларниң өзара тәсириниң тарихий әнъәнисигә асасланған. Биз вәтинимиз үчүн қайтиланмас вә надир болған муһитта кәлгүси әвлатни вәтәнпәрвәрлик, этникларара толерантлиқниң вә җәмийәтлик разимәнликниң қазақстанлиқ моделиға һөрмәт билдүрүш роһида тәрбийиләймиз.
Биз улуқ қазақ хәлқигә алаһидә миннәтдарлиқ һис туйғусини билдүримиз. Миллий аң-сәвийәниң, миллий тәпәккүрниң, этномәдәний алаһидиликниң шәкиллинишидә қазақ тилиниң, қазақ әдәбиятиниң вә қазақ мәдәнийитиниң роли бөләкчә.
Биз — мәдәнийәтләрниң вә цивилизацияләрниң диалоги тәрәпдари. Әйнә шу арқилиқ дуния бирләшмилиригә көплигән милләтләрниң вә хәлиқләрниң һәмдостлуғи сүпитидә турақлиқниң үлгиси болуватимиз. Бизни өтмүш үчүн пәхирлиниш, һазирқи күнгә тегишлик баһа бериш вә келәчәккә иҗабий көзқараш һис-туйғуси бирләштүриду.
Җумһурийәттә нурғунлиған этномәдәнийәт мәркәзлири, миллий аммивий әхбарат васитилири, театрлар вә иҗадий коллективлар қурулуп, муваппәқийәтлик паалийәт елип бериватиду. Миллий мәдәнийәт, сәнъәт вә әдәбият тәрәққий етиватиду. Көрнәклик язғучилар вә шаирлар, драматурглар вә публицистлар өзлириниң әсәрлирини яритиватиду. Қазақ, рус, уйғур, украин, поляк, инглиз, немис, корей, өзбәк, түрк, қурд вә башқиму тилларда гезитлар нәшир қилиниватиду.
Мәмликитимиздә утуқлуқ әмәлгә ашурулуватқан “Рухани жаңғыру” программиси хәлиқләрниң өтмүшиниң бүгүнки күниниң вә келәчигиниң утуқлирини бағлаштуридиған платформисиға айланди. У Қазақстан хәлқиниң һаятини, тарихини вә роһини йеңилашни өз ичигә алиду, мәдәнийәтни, миллий алаһидиликни сақлайду, умуммиллий вәтәнпәрвәрликни бәрпа қилиду һәм шәкилләндүриду. Пүткүл җәмийәтни мәнивий вә интеллектуаллиқ йеңилаш – бу аң-сәвийәни заманивийлаштуруш дегән сөз. “Билимгә интилиш, йеңи идеяләргә очуқ болуш, миллий кодни вә Қазақстанниң эволюциялик тәрәққият йолини сақлаш – бу умуммиллий тарихий аң-сәвийәниң вә бирпүтүн қәдир-қиммәтниң мустәһкәм асасини шәкилләндүридиған мәнбәләрдур”... дәп тәкитлиди Қазақстан Җумһурийитиниң Тунҗа Президенти Н.Ә. Назарбаев ҚХА сессиялириниң биридә. – Биз күчлүк вә җавапкәр адәмләрдин тәркип тапқан бир хәлиқ, пикирләр вә тәпәккүрләр обризини нәқ мошундақ қайта қуруш керәк”.
Көпхиллиқтики бирлик принципи – бизниң сәяситимизниң асаси. “130 этносниң барлиғи заманивий Қазақстанниң қияпитини яритиду. Бу — көзүмизниң қаричуғидәк сақлаш керәк болған бизниң алтун байлиғимиз – дәп билдүрди Елбасы Н.Ә. Назарбаев. – Барлиғимиз Қазақстан йериниң балилири, униңға болған муһәббәт бизни бирләштүриду”.
Бийил елимиздә икки чоң сәнә нишанланмақта: бу Қазақстан хәлқи Ассамблеясиниң қурулғиниға 25 жил вә Асасий Қанун – мәмликәт Конституциясиниң қобул қилинғиниға 25 жил. Биз 6-март күни Алмутидики Достлуқ өйидә дөлитимиз тарихидики муһим вақиәләргә беғишланған “дүгләк үстәл” өткүздуқ. Қазақстан хәлқи Ассамблеясиниң 25 жиллиғида биз мошу вақит җәриянида қол йәткүзгән утуқлиримизни көпәйтишимиз, өзимизниң полиэтниклиғимизни вә алаһидилигимизни сақлап қелишимиз керәк.
Улуқ шаир, философ, мутәпәккүр Абай Қунанбаевниң 175 жиллиқ тәвәллуди нишанлиниватқан үстимиздики жилда униң “Қара сөзлириниң” һәрқайсиси алаһидә мәзмунға егә болмақта. Биз улуқ Абайниң әсәрлирини қайта нәшир қилип, өзимиз үчүн нурғунлиған йеңилиқларни ечиватимиз, йеңи упуқларға чиқиватимиз. Шаир алтинчи сөзидә “Бирлик әқилдә болуши керәк” дегән пикирни ейтқан екән.
Қазақстан Җумһурийитиниң Президенти Қасым-Жомарт Кемелоғли Тоқаев милләтләр бирлигини әң асасий қәдир-қиммәт, дәп елан қилди. Биз уни көзүмизниң қаричуғидәк сақлишимиз керәк. Қазақстандики барлиқ этносларниң вәкиллири умумий мәдәний бошлуқта, мәдәнийәтләр һәм динларниң барлиқ шараитида яшап келиватиду.
ҚХАниң уюштуруши билән “Қазақстан мениң тәғдиримдә” намлиқ хәлиқара “дүгләк үстәл” уюштурулди. Униң даирисидә “Қазақстан мениң тәғдиримдә” намлиқ хрестоматия тонуштурулди. Уни М.Әвезов намидики Әдәбият вә сәнъәт институти нәшир қилди. Қазақстанда ялғуз мәнивий асас билән қелиплашқан полимәдәний бошлуқ бизниң мәдәнийәтлиримизниң вә әдәбиятлиримизниң турақлиқ тәрәққий етишигә түрткә болуватиду.
Заманивий дунияниң трансмәдәний көрүнүши миллий мәдәний кодсиз вә миллий мәдәнийәтләрсиз вә әдәбиятларсиз толуқ болуши мүмкин әмәс.
Қазақстанда яшаватқан белорусьлар ихтисатниң, билимниң, мәдәнийәтниң, әдәбиятниң тәрәққий етишигә чоң үлүш қошуп келиватиду. Қазақстандики Белорусь мәдәнийәт мәркизи көплигән яхши ишларниң тәшәббускари болуп кәлмәктә. Җүмлидин Анилар кеңиши яш әвлатни һәм яшларни вәтәнпәрвәрлик роһта тәрбийиләшкә алаһидә диққәт ағдуруп, актив паалийәт елип бериватиду.
Биз Вәтинимиз – Қазақстанға, умумий өйүмизгә вә барлиқ қазақстанлиқларға течлиқ вә паравәнлик, муваппәқийәт һәм амәт тиләймиз! Вәтинимизниң гүллиниши үчүн һәрбиримизниң қошуватқан үлүши алаһидә баһалиниду. Биз турақлиқни һәм мустәқилликни мустәһкәмләп, утуқлар вә йеңи муваппәқийәтләр йолида қол тутушуп маңимиз.

Светлана АНАНЬЕВА,
Алмута шәһәрлик ҚХАниң илмий-экспертлар топи
рәисиниң орунбасари.