• 1-декабрь — Тунҗа Президент күни
• 03 Желтоқсан, 2020

Елбасыни тәбриклиди

Қазақстанниң Тунҗа Президенти Нурсултан Назарбаевни дөләт рәһбәрлири, сабиқ президентлар, сабиқ һөкүмәт башлиқлири, сәясий әрбаплар, бизнес саһасиниң вәкиллири мәйрәм билән тәбриклиди.
Өзбәкстан Җумһурийитиниң Президенти Шавкәт Мирзияев Нурсултан Назарбаевқа мустәһкәм саламәтлик, бәхит-саадәт вә мәмликәт пайдисиға әмәлгә ашуруватқан паалийитигә чоң утуқлар, қериндаш Қазақстан хәлқигә болса течлиқ, хатирҗәмлик, турақлиқ тәрәққият вә гүллиниш тилиди.
«Тунҗа Президент күни – бу Қазақстанниң көпмилләтлик хәлқи таллавалған тарихий йол, течлиқ вә турақлиқлиқниң, милләтниң бирлиги вә разимәнлигиниң надир рәмзи. Сиз мәмликәт лидери, суверен Қазақстанни мисли көрүлмигән утуқларға елип кәлгән нәтиҗидарлиқ ислаһатларниң асасини салғучи, дуния бирләшмиси етирап қилған аләмшумул тәшәббусларниң муәллипи, тәҗрибилик вә атақлиқ сәясәтчи, хәлқигә һәм Вәтинигә хизмәт қилишни өз борчум дәп һесаплап, җанпидалиқ билән әмгәк қилған рәһбәр сүпитидә чоң һөрмәт-еһтирамға ериштиңиз», дәп язди Шавкәт Мирзияев.
АҚШниң 66-дөләт кативи Кондолиза Райс өз тәбригидә Нурсултан Назарбаевниң Қазақстанниң изчил тәрәққий етишидә алаһидә роль ойниғанлиғини тәкитлиди.
«АҚШниң биринчи президенти Джордж Вашингтон қандақ қилип Америка қәдрийәтлирини биз келәчәктә немә қилидиғинимизниң асасиға айландуруш керәклигини билгән еди. Сизниң өзиңизниң гөзәл елиңиз –Қазақстан үчүн әмәлгә ашурғиниңиз нәқ шундақ болди. Сизниң ядро қуралидин ваз кечиш вә әҗайип пайтәхтни бәрпа қилиштин тартип, һакимийәтни течлиқ йоли билән өткүзүп беришкичә болған қарарлириңизғичә шундақ дәп ейтсақ болиду», дейилиду телеграммида.
Түркияниң сабиқ президенти Абдулла Гүл өз тәбригидә Қазақстанниң Тунҗа Президентиниң яш дөләтниң шәкиллинишигә вә хәлиқара һәмкарлиқниң күчийишигә қошқан һәссисини атап көрсәтти.
«Сизгә мустәһкәм саламәтлик, хатирҗәмлик тиләймән. Қазақстан хәлқиниң келәчиги ярқин вә парлақ екәнлигигә ишәнчим камил. Қазақстан түркий дунияда алаһидә орунни егиләйду. Қазақстан — Түркия мунасивәтлириниң техиму риваҗлинишиға тиләкдашмән», дейилиду телеграммида.
Бүйүк Британияниң сабиқ премьер-министри Тони Блэр өз тәбригидә Қазақстанниң Тунҗа Президентиниң мустәқил мәмликәт тарихида муһим роль ойниғанлиғини тәкитлиди.
«Мәмликәтниң утуққа йетиши вә турақлиқлиғи көп җәһәттин Президент Нурсултан Назарбаевниң лидерлиғи билән шәртләнгән. Қазақстанни келәчәктә күтүватқан синақлар вә ислаһатларниң қандақ болушиға қаримай, һазир мәмликәт келәчәккә ишәшлик нәзәр ташлаватиду», дәп язди Тони Блэр.