• Йеңилиқлар
• 10 Желтоқсан, 2020

Мәйрәм қандақ нишанлиниду

Мустәқиллик күни шәрипигә қазақстанлиқларни 60тин ошуқ җумһурийәтлик чарә-тәдбир күтүватиду. Чарә-тәдбирләрниң көпчилиги онлайн-тәртиптә өтиду.
Мәсилән, 11-декабрьда “Берел” дөләт тарих-мәдәнийәт қоруқ-мирасгаһи вә қарғу һәм начар көридиған гражданлар үчүн җумһурийәтлик китапхана онлайн-тәртиптә китап көргәзмилирини өткүзиду. 14-декабрьда “Мәдәнийәтләрниң йеқинлишиш мәркизи” дөләт мирасгаһида “Улуқ ипәк йолидики мәдәнийәт вә дин” мирасгаһ экспозицияси тәнтәнилик ечилиду, уни офлайн-тәртиптә зиярәт қилишқа болиду. 14-декабрьда «Алматы-Арена» спорт сарийида муз үстидә фигурилиқ тейилиш бойичә җумһурийәт чемпионати башлиниду. 15-декабрьда Алмута турғунлири Абай намидики дөләт академиялик опера вә балет театрида өтидиған “Тәуелсіздік қырандары” концертини тамашә қилалайду.
Мәркизий дөләт мирасгаһи “Желтоқсан – тәуелсіздіктің бастауы” көргәзмисигә онлайн-сәяһәт уюштуриду. Униңдин ташқири Миллий мирасгаһниң Facebookтики сәһиписидә “Мәмликитимизниң әркинлиги – Мустәқиллик” онлайн-дәрисини көрүшкә болиду.
16-декабрьда “Хабар” телеканилида Казахконцерт артистлириниң “Тәуелсіздік – тұғырым” концерти көрситилиду. 16-декабрьда “Астана балет” театри офлайн-тәртиптә “Султан Бейбарыс” қоюлумини көрсәтсә, “Астана опера” театри мәйрәм шәрипигә концерт өткүзиду.
Әвезов намидики Қазақ дөләт театри 16-декабрьда тамашибинларни “Қазақтар” спектаклиға тәклип қилиду. Sats ComUnity балилар театр-студиясидә тәрбийиләнгүчиләр “Мениң Қазақстаним, мениң диярим!” нами билән алаһидә тәбрик тәйярлайду.
“Ұлы дала – Тәуелсіз ел!” мәйрәмлик концерти мәркизий чарә-тәдбирләрниң бири болиду. 17-декабрьда “Хабар” телеканилиниң эфирида тамашибинлар дөләт концерт тәшкилатлириниң җумһурийәтлик концерт-гастроль мәркизиниң “Сәлем, Елорда!” йеңи гала-концертини тамашә қилалайду.
Мәйрәмлик чарә-тәдбирләр 18-декабрьдиму давамлишиду. YouTube-канилида Қ. Ғоҗамияров намидики Дөләт академиялик Уйғур музыкилиқ-комедия театриниң “Тәбәссүм” мәйрәмлик шоу-программисини көрүшкә болиду.