• Йеңилиқлар
• 04 Ақпан, 2021

Ават техиму аватлашмақта

Бу күнләрдә Панфилов наһийәсиниң һакими Талғат Өмирәлиев билән йеза вә шәһәр округлири һакимлири турғунлар алдида өткән жили атқурулған вә келәчәктә әмәлгә ашурулидиған ишлар һәққидә һесават бәрмәктә. Жиғинларға қатнишиватқан турғунларниң ейтари аз әмәс. Улар асасән «өй селиш үчүн йәр бөлүнсә, йоллар ясалса, кочилар аватлаштурулуп, электр йоруғи тартилса» дегән пикир-тәклиплири билән мураҗиәт қиливатиду. 
 

Гөһәрбүви  ИСМАЙИЛҖАНОВА,

«Уйғур авази»

Йеқинда Пәнҗим йеза округиға қарашлиқ Ават йезисиниң турғуни, жут мөтивәри, пешқәдәм устаз Нариман Тохтаев билән учришип қалдим. Узун жиллар маарип саһасида ишләп, һөрмәтлик дәм елишта жүргән Нариман Тохтаев һели жутдарчилиқ ишларда җанкөйдүрүп жүриду.
 — Ават – қедимий һәм ават жут. Хәлқи ишләмчан, йери мунбәт, милләтләрара достлуғимиз мустәһкәм. Йезида 240тин ошуқ түтүн болуп, 2000ға йеқин аһали бар. Йошурушниң һаҗити йоқ, бизниң йезиниң турғунлири наһийә вә округ һакиминиң баш қошушлирида өзимиздики моҗут проблемиларни ейтип, муң-муһтаҗимизни һакимийәткә йәткүзүватқинимизға хелә жиллар болди. Мана бу жили бизниң тилигимиз орунланди. Хошаллиғимизниң чеки йоқ: Ават йезисидики икки чоң кочиға электр йоруғи тартилди.
 Умумән, ахирқи үч-төрт жилда жутимиз тониғусиз дәрижидә өзгәрди. Йезимизда йеңи мәктәп қәд көтәрди. ФАПмубәрпа болди. Шәхсийләр һесавиға дукан, ресторан, мечит селинип, пайдилинишқа бериливатиду. Лекин, немишкиду, кочиларға электр йоруғи тартилмай қалған еди. Мәктәптә чүштин кейин иккинчи сменида оқуйдиған оқуғучилар өйгә кәч қайтиду. Кочилар қараңғу болғанлиқтин, улар хелила қийналди. Шуңа биз бирлишип, мошу мәсилини һәл қилса екән, дегән тәклип-истәклиримизни изһар қилиштин задила ялиқмидуқ. Жуқурида тәкитлигинимдәк, йеқинда бу мәсилимизму йешимини тапти. Буниң үчүн наһийә һакимиға вә мунасивәтлик башқиму шәхсләргә чәксиз миннәтдарлиғимизни билдүримиз, – деди мөтивәр хошаллиғини йошуралмай.

 Панфилов наһийәси.