• Йеңилиқлар
• 10 Ақпан, 2021

Жүргүзгүчи гуванамилирини бериш давамлишамду

Йеқинда Қазақстан Җумһурийити Ички ишлар министрлиги мәмурий полиция комитети башлиғиниң орунбасари Серик Тусунов идаридә болуп өткән онлайн-брифингта буниңдин кейин Қазақстанда жүргүзгүчи гуванамилири вә транспортниң техникилиқ паспортлириниң берилишигә бағлиқ гәп қозғиди. 
Буниңға Җумһурийитимиз Президенти Қасым-Жомарт Тоқаевниң әгәр мәзкүр һөҗҗәтләр Қазақстан Җумһурийитидә берилгән болса, уларни өзи билән елип жүрүш шәрт әмәслиги тоғрилиқ қанунни имзалиши сәвәп болди.
С.Тусуновниң сөзичә, Қазақстанда мәзкүр һөҗҗәтләрни бериш буниңдин кейинму давамлишиду. У мәзкүр дөләт хизмитини иҗтимаий әһмийәтлик дәп атиди. “Бу - иҗтимаий әһмийәткә егә дөләт хизмитидур, у аһалимизниң транспорт активлиғиға тәсир қилиду, шуниң үчүн бу һөҗҗәтләрни бериш давамлишиду” деди у. Униң мәлуматлиричә, һәр жили мәмликәттә 500 миңға йеқин адәм жүргүзгүчи гуванамилирини алиду. Шундақла 1,5 миллионға йеқин транспорт васитисиниң тиркәлгәнлиги тоғрилиқ гуванамә берилиду.
“Биз мәзкүр ишни давамлаштуримиз. Жуқурида аталған һөҗҗәтләр гражданлиримизниң хәлиқара һәрикәтләргә қатнишиши, уларни ишқа орунлаштуруш, шундақла жүргүзгүчиниң дәриҗисини тәстиқләш, транспортни сетиш вә башқиму гражданлиқ һоқуқ-мунасивәтләр үчүн һаҗәт” дәп чүшәндүрди у.
Әмәлдар «Әгәр полиция хадими жүргүзгүчи гуванамисини тәләп қилса яки униң йоқлуғи үчүн җәриман селиш билән қорқутса немә қилиш керәк?» дегән соалғиму изаһ бәрди.
“Әгәр полиция инспектори һөҗҗәтләрни көрситишни тәләп қилса, 102 номериға яки ички бехәтәрлик бөлүмигә телефон қилишқа болиду. Шундақла сот тәркивидә мәмурий протоколни толтурушни тәләп қилиши мүмкин. Бу йәрдә сизниң һоқуқиңиз чәкләнмигән. Лекин биз йеңи қанунни һәрбир хадимимизға чүшәндүрдуқ вә тегишлик көрсәтмә бәрдуқ. Ойлаймизки, қанунға қарши һәрикәтләр вә чүшәнмәсликләр болмайду” дәп вәдә қилди С.Тусунов.
Йеқинда биз, қазақстанлиқлар, үстимиздики жилниң 13-февралидин тартип жүргүзгүчи гуванамисисиз вә техпаспортсиз йол қатналайдиғанлиғи һәққидә хәвәр қилған едуқ. Мәзкүр қанун 2021-жилниң 28-январида Сенатта қобул қилинип, Президент Қасым-Жомарт Тоқаев тәрипидин имзаланди.