• Йеңилиқлар
• 10 Ақпан, 2021

Бехәтәрлик саһасидики сүпәтлик өзгириш

Нурсултан Назарбаев Бехәтәрлик кеңишиниң мәҗлисини өткүзди. Бехәтәрлик кеңишиниң рәиси мәҗлисни ечип, һазир Қазақстанниң башқа мәмликәтләр билән бирқатарда бехәтәрлик саһасиниң сүпәтлик өзгириш вақтиға кәлгәнлигини тәкитлиди.
– Биз дөләт вә бирпүтүн милләт сүпитидә кәскин бурулуш басқучиға кәлдуқ. Таҗсиман вирус пандемияси өзигә хас чәк болди. У алдимиздики барлиқ он жиллиқларға тәсир қилиду. Һазирниң өзидә миллий бехәтәрликниң әнъәнивий ховуп-синақлири өзгирип, йеңи ассиметрик вә гибрид ховуплар пәйда болуватиду, – деди Елбасы.
 Нурсултан Назарбаев Қазақстан Җумһурийити вә Қазақстан җәмийитиниң һазирқи шараиттики миллий бехәтәрлигиниң йеңи түзүлүшини ишләп чиқишниң зөрүр екәнлигини атап көрсәтти.
– Ихтисадий, технологиялик, иҗтимаий реаллиқлар вә ташқи шараит қанчилик өзгәрмисун, бизниң миллий мәнпийәтлиримиз өзгәрмәйду. Булар –Қазақстанниң суверенитети вә территориясиниң пүтүнлүги, бирлик вә сәясий турақлиқлиқ, гражданларниң саламәтлиги вә иҗтимаий адаләтлик. Миллий бехәтәрлик стратегияси мошу қәдрийәтләрни сақлаштин, бийил биз 30 жиллиғини нишанлайдиған мустәқиллик утуқлирини мустәһкәмләштин ибарәт, – деди Тунҗа Президент.
Күн тәртивидики биринчи мәсилини муһакимә қилиш даирисидә Президент ярдәмчиси – Бехәтәрлик кеңишиниң кативи Әсет Исекешев йеңи стратегияниң асасий яндишишлири билән тонуштурди. Униңда тәклип қилиниватқан чариләр ховупларни жүгәнләшниң заманивий усуллириға вә миллий бехәтәрликниң тәңпуң иҗтимаий-ихтисадий һәм иҗтимаий-сәясий тәрәққият билән аҗралмас өзара бағлиқ екәнлигигә асаслиниду.
Нурсултан Назарбаев биологиялик бехәтәрлик ховупиға қарши турушниң узақ вақит күн тәртивидә болидиғанлиғиға, чүнки жуқумлуқ вә башқа ағриқларниң аләмшумул ховуп дәриҗисигә чиққанлиғиға диққәтни җәлип қилди. Шуниңға мунасивәтлик биологиялик бехәтәрлик вә җәмийәтлик саламәтлик бехәтәрлиги саһасида асасий ховупларниң тәсирини йоқитиш бойичә нәтиҗидарлиқ чариләрни ишләп чиқишниң муһим екәнлиги тәкитләнди.
– Әнди саламәтликни сақлаш саһасиға миллий бехәтәрлик вә иҗтимаий турақлиқлиқниң асаслиқ тәркивий қисми сүпитидә яндишиш керәк. Пандемия шараитида иҗтимаий-ихтисадий чиқим-хираҗәтләр муқәррәрдур. Һәммидин авал бу гражданлар кириминиң қисқираватқанлиғи, регионлар, саһалар, шәһәр вә йеза оттурисидики тәңсизликниң өсүватқанлиғи. Буниң үстидә мәхсәтчанлиқ ишләш лазим. Аһалиниң иҗтимаий җәһәттин аҗиз топлирини комплекслиқ қоллап-қувәтләш муһим, – деди Бехәтәрлик кеңишиниң рәиси.
Нурсултан Назарбаев ихтисадий бехәтәрликни, кибербехәтәрликни, әхбарат бехәтәрлигини вә болупму инсан капитали бехәтәрлигини тәминләш мәсилилиригә алаһидә диққәт ағдурди.
– Һәқиқий ховуп – бу минерал-хам әшия баһалириниң төвәнлиши әмәс, бәлки милләтниң әқлий иқтидари сүпитиниң төвәнлишиш ховупи. Һәммидин авал у билим дәриҗисигә мунасивәтлик. Буниңда биз тәрәққий әткән әлләрдин җиддий кейин қеливатимиз. Билим бизниң йеқинқи он жилдики миллий идеямизгә айлиниши керәк, – деди Елбасы.
Бехәтәрлик кеңишиниң рәиси униңдин ташқири миллий бехәтәрликниң «классикилиқ» түрлириниң – асасий ховуплар ташқи оюнчилар қариму-қаршилиғиниң өсүшигә, Мәркизий Азия вә униң әтрапида турақсизлиқ зонисиниң пәйда болушиниң мүмкин екәнлигигә бағлиқ болған ташқи вә һәрбий түрлирииниң муһим екәнлигини атап көрсәтти.
Мәҗлис қатнашқучилири муһакимә йәкүни бойичә йеңи Миллий бехәтәрлик стратегиясиниң концептуал яндишишлирини мақуллиди.
Иккинчи мәсилини муһакимә қилиш даирисидә Қураллиқ күчләр қурулушиниң Қазақстан Җумһурийитиниң тегишлик һәрбий бехәтәрлигини тәминләшкә қаритилған аспектлири қаралди.
Елбасы һәрбий ишта йеңи технологияләрниң, қурал-ярақ вә һәрбий техника ишләпчиқиришта технологиялик җәриянларниң җарий қилинишини һесапқа елип, Қураллиқ күчләрни мукәммәлләштүрүшниң зөрүр екәнлигигә диққәтни җәлип қилди. 
– Қураллиқ күчләрни қайта қуралландуруш вә мудапиә санаитини тәрәққий әткүзүш бойичә 2030-жилғичә бәлгүләнгән концепция армияни тәминләш бойичә узақ муддәтлик йөнилишни бәлгүләйду вә йеңи технологиялик синақларға җавап бериду. Елимизниң мудапиә санаити униң мудапиә қабилийитиниң муһим қисми болуп һесаплиниду вә Қураллиқ күчләрниң тәләп-еһтияҗлириға нишан қилинған, – деди Тунҗа Президент. 
Нурсултан Назарбаев мәҗлис йәкүни бойичә Қураллиқ күчләрниң, башқа әскәрләр вә һәрбий ясақларниң җәңгивар тәйярлиғини, территориялик мудапиә күчлириниң қудритини ашурушқа қаритилған бирқатар ениқ тапшурмиларни бәрди.