• "30 Тәуелсіздік жылдары"
• 25 Ақпан, 2021

Мустәқиллик тойиниң меһмини

Рашидәм РӘҺМАНОВА, 
«Уйғур авази»

Мустәқиллик тәңтуши болған Хетипҗан Идрисов елимиз тарихидики муқәддәс күн – 1991-жили 16-декабрьда Әмгәкчиқазақ наһийәсиниң Челәк йезисида Низамдин вә Кәнҗиханниң аилисидә дунияға кәлди. Хетипҗандин кейин йәнә үч қиз вә бир оғул туғулди. Хетипҗанни бова-момиси Өмәрҗан билән Мерванәм өз тәрбийисигә алди. 
Мошу йәрдә Хетипҗанниң бовиси Өмәрҗан Идрисов һәққидә ейтип өтүшни тоғра көрүватимән. У 1923-жили Челәк тәвәсиниң Ғәйрәт йезисида дунияға кәлгән. Улуқ Вәтән уруши башланғанда у әндила 18 яшқа кәлгән еди. 1942-жили у акиси Низамниң арқисидинла фронтқа чақиртилди. Өмәрҗан ата «Сталинград мудапиәси үчүн», «Җәңгивар хизмити үчүн», «Германия үстидин ғалибийәт қазанғанлиғи үчүн» медальлири билән тәғдирлинип, аман-есән елигә қайтти. Уруштин кейинки течлиқ вә әмгәк дәвридә Өмәр Идрисов «Авангард» совхозида от өчәргүчи болуп ишләп, һөрмәтлик дәм елишқа чиқти. Рәпиқиси Мерванәм билән алтә бала тепип, уларни җәмийәткә лайиқ инсанлардин қилип тәрбийиләп, қатарға қошти. 
Өмәрҗан ата урушниң дәрдини өз көзи билән көргәнликтин, урушниң кесиридин йеқинидин айрилғанниң қайғу-һәсритини яхши биләтти. Шуңлашқиму дәсләп туғулған арзулуқ нәврисиниң исмини уруш мәйданида қаза болған қейинатиси Хетипҗанниң һөрмитигә атиди вә өз тәрбийисигә алди. Шуниң билән у җүпти Мерванәмниң көйүк отини бираз болсиму бесишқа тиришти. Бирақ кичик Хетипҗанға әс киргичә бовиси Өмәр вапат болуп, уни момиси Мерванәм чоң қилди. 
Хетипҗанниң ата-аниси өзлири рус мәктивидә оқуған болсиму, пәрзәнтлириниң барлиғини ана тилидики Абдулла Розибақиев намидики уйғур оттура мәктәпкә бәрди. Чүнки, улар әвладиниң ана тилимиз, мәдәнийитимиз, тарихимиз вә урпи-адәтлиримизни билип, чоң болушини халиди. Хетипҗан мәктәптә әла оқуди. Униң билимгә иштияқ бағлишида муәллими Гөһәрбүви Идрисованиң әмгиги зор болди. Шундақла у кичик чағлиридинла спортқа йеқин болуп өсти. Шу сәвәплик уни дадиси алтә йешида «Лачин» клубиниң әркин күрәш секциясигә бәрди. Бу йәрдә у тонулған мәшиқләндүргүчи Абдуғени Исмайиловниң тәрбийисидә болуп, талай мусабиқиләрдә тәңтушлири билән күч синашти.
Мәлумки, 2001-жили Мустәқилликниң 10 жиллиғи мунасивәтлик Қазақстанниң барлиқ тәвәлиридики «Мустәқиллик тәңтушлири», йәни 1991-жили 16-декабрь күни туғулған балиларни чоң мәйрәмни атап өтүшкә җәлип қилинди. Улар өзлири истиқамәт қиливатқан вилайәт мәркәзлиригә тәклип қилинди. Әмгәкчиқазақ наһийәсидин төрт бала Талдиқорғандики вилайәтниң шу чағдики һакими Шалбай Кулмахановниң һозурида болуп қайтти.
– Әлвәттә, Мустәқил Қазақстанниң көпбалилиқ уйғур аилисидә, йәнә келип елимиз тарихи үчүн муһим күндә туғулғанлиғим сәвәплик мән өзәмни бәхитлик дәп һесаплаймән. Аллаға сансиз шүкрики, момам мени бәш йешимдин Челәктики Мәһәмәт һаҗим имамниң алдиға апирип, диний саватимниңму ечилишиға сәвәп болди. Бирла арминим бар еди. Бу болсиму, өз динимға, хәлқимгә вә, әлвәттә, вәтинимгә пайдилиқ инсан болушум һәм пәрзәнтлиримни лайиқ тәрбийиләш еди. Аста-аста арманлирим рояпқа чиқиватиду. Шуңлашқиму мән бәхитликмән! – дәйду Хетипҗан бова-момисиға, ата-анисиға, устазлириға вә елигә болған разилиғини билдүрүп.
Хетипҗан оттура мәктәпни тамамлиғандин кейин Алмута шәһәрлик медицина колледжида чиш ортопеди мутәхәссислиги бойичә билим алди. Һазир у рәпиқиси Гүлнисәм, оғли Муһәммәд, қизлири Хадиджа вә Ханифа билән Алмута шәһиридә яшайду. Аиләвий тиҗарәт билән шуғуллиниду. Тапқан пайдисидин бәлгүлүк қисмини хәйрихаһлиқ ишларға хираҗиәт қилиду. Амма, шәриәтниң қанунлириға бағлиқ, бу ишларниң көпчиликкә елан қилинишини тоғра көрмәйду. 

Әмгәкчиқазақ наһийәси.